Ձեր վստահելի աղբյուրը

Հունիսի 10-ից Ծաղկաձորում ընթանում է Եվրասիական երիտասարդական երկրորդ համաժողովը, որին ինչպես պարզվեց, Լեռնային Ղարաբաղից մասնակիցներ ներկայացված չեն, մինչդեռ հեռավոր Մոլդովայից էլ մասնակից ունենք: Այս տեղեկատվությունը նախօրեին ուղղակի պայթեցրեց համացանցը և համաժողովի կազմակերպիչների` Հայաստանի երիտասարդական հիմնադրամի և Եվրասիական համագործակցության զարգացման հիմնադրամի հասցեին սուր քննադատություն հնչեց: Խնդիրը նրանում է, որ հանրությունը արցախցի երիտասարդների չմասնակցելը այս համաժողովին կապեց Աստանայում Ղազախստանի նախագահ Նազարբաևի տխրահռչակ ելույթի հետ:

Facebook-ի առավել ակտիվ օգտատերերն էլ անմիջական հարցով դիմեցին ՀԵՀ նախագահ Կարեն Ավագյանին, ահա այդ գրառումներից մեկը. «Նոր տեղեկացա, որ «Երիտասարդ Եվրասիա» համաժողովին վերջին պահին կազմակերպիչները, որից մեկը հենց ՀԵՀ-ն է, արգելել են մասնակցել Արցախից մասնակիցներին, որոնք արդեն հրավիրված էին։ Ոնց հասկանում եմ, Նազարբաեւի հայտարարությունը ավելի մեծ ազդեցություն ունի Հայաստանի երիտասասրդական հիմնադրամի վրա, քան մնացած բոլոր հանգամանքները։ Հետաքրքիր կլիներ իմանալ, թե ինչ է եղել իրականում»:

Panorama.am-ին ՀԵՀ-ից տեղեկացրեցին, որ հրավիրյալների հարցով զբաղվել է բացառապես Եվրասիական համագործակցության զարգացման հիմնադրամը, բայց ի սկզբանե Արցախից հրավիրվածներ եղել են` դա նույնիսկ չքննարկվող հարց է:

ՀԵՀ-ի պարզաբանումն այս հարցի կապակցությամբ կներկայացնենք հաջորդիվ. այս պահին ավելի կարևոր է լսել Եվրասիական համագործակցության զարգացման հիմնադրամի նախագահ Մհեր Սիմոնյանի պարզաբանումը այս տհաճ իրավիճակի վերաբերյալ:

Վերջինս, սակայն, հավաստիացրեց, որ եթե համաժողովին այս պահին Լեռնային Ղարաբաղից մասնակիցներ չկան, ապա դա ոչ իրենց մեղքով է, ժամանակավոր է` այսօր երեկոյան նրանք արդեն կմիանան ԱՊՀ, Բալթյան երկրներից ժամանած երիտասարդներին. «Ղարաբաղին հրավերն ուղարկվել է, բայց մասնակիցները անձնական խնդիրների պատճառով չկարողացան հենց սկզբից մասնակցել: Բայց նրանք արդեն ճանապարհ են ընկել և երեկոյան կմիանան համաժողովի մասնակիցներին»:

Հարցին` գուցե ոչ թե անձնական խնդիրներն, այլ Նազարբաևի ելույթն է իսկապես ազդել նրանց չմասնակցելու վրա Մ.Սիմոնյանը շտապեց պատասխանել. «Ոչ-ոչ, դա զուտ անձնական խնդիրներով է պայմանավորված և այսօր նրանք կմիանան մյուսներին»:

Ըստ մեր զրուցակցի` Լեռնային Ղարաբաղից համաժողովին կմասնակցի երեք երիտասարդ: Հարցին` եթե կային անձնական խնդիրներ, ինչու չէր կարելի այլ երիտասարդների հրավիրել, որպեսզի կազմակերպիչները զերծ մնային նման քննադատությունից Մ. Սիմոնյանն ասաց, որ մասնակիցների ընտրությունը հեշտ խնդիր չէ և այդ գործընթացը այսքան հապշտապ անել հնարավոր չէր: Բայց ուրախ է, որ ամեն ինչ կարգավորվեց և արցախցի երիտասարդները կլինեն Ծաղկաձորում:

Նախորդող հրապարակում`

Եվրասիական երիտասարդական երկրորդ համաժողովի մեկնարկը կտրվի վաղը Ծաղկաձորում