Ձեր վստահելի աղբյուրը

«ՀՀ Նախագահի այցը Վրաստան, հայկական պատվիրակությանը վրացական կողմի ցուցաբերած ջերմ ընդունելությունը, կայացած հանդիպումները, ստորագրված փաստաթղթերը, Թբիլիսիում հնչեցված հայտարարությունները ևս մեկ անգամ փաստում են, որ Հայաստանի և Վրաստանի միջև առկա բարձր մակարդակի հարաբերությունները դատապարտված են էլ ավելի զարգանալուն և խորանալուն»,- այս մասին անդրադառնալով  ՀՀ նախագահ Սերժ Սարգսյանի պաշտոնական այցին Վրաստան և հայ-վրացական հարաբերություններին, Panorama.am-ի հետ զրույցում նշեց վրացագետ Ալիկ Էրոյանցը:

Փորձագետը փաստեց, որ ՀՀ նախագահի այցը Վրաաստան կարևոր էր` ընտրված ժամանակաշրջանի առումով, ինչպես նաև տարածաշրջանային զարգացումների տեսանկյունից, քանի որ «շուտով ականատես կլինենք «Մաքսային միությանը» Հայաստանի անդամակցության և Վրաստանի ու ԵՄ միջև «Ասոցացման համաձայնագրի» ստորագրման իրողությանը»:

«Տարբեր մաքսային և տնտեսական գոտիներ ինտեգրվող Հայաստանն ու Վրաստանը հայտնվելու են բոլորովին նոր իրավիճակում, և շատ կարևոր է, որ այդ շրջափուլում հայ-վրացական համագործակցության բարձր մակարդակը ոչ թե տուժի, այլ՝ ընդհակառակը՝ թևակոխի զարգացման ավելի փոխշահավետ հարթություն: Սերժ Սարգսյանի` Վրաստան կատարած այցը ցույց տվեց, որ կա երկուստեք պատրաստակամություն հայ-վրացական հարաբերությունների խորացման և համագործակցության ակտիվացման ուղղությամբ»,- ասաց Ա. Էրոյանցը:

Իր հերթին քաղաքագետ Սերգեյ Մինասյանը մեզ հետ զրույցում ընդգծեց, որ հայ-վրացական հարաբերություններն այս պահին պետք է լինեն առանցքային Հայաստանի Հանրապետության արտաքին քաղաքականության համար: Քաղաքագետը հարաբերությունների առանցքային լինելը նախ պայմանավորեց այն հանգամանքով, որ Հայաստանը և Վրաստանը փորձում են գնալ տարբեր տնտեսական ինտեգրման ճանապարհով:

«Հունիսի 27-ին Վրաստանի ու ԵՄ միջև «Ասոցացման պայմանագրի» ստորագրումից հետո փաստացի Եվրամիության ընդհանուր տնտեսական գոտին սահմանակից կլինի Հայաստանին: Մեզ համար Վրաստանը չափազանց կարևոր կլինի ԵՄ-Հայաստան հետագա ինտեգրացիոն գործընթացներում»,- նկատեց Ս. Մինասյանը:

Միաժամանակ նա նշեց, որ Վրաստանը գտնվում է հակահայկական, թուրք-ադրբեջանական տարածաշրջանային պրոյեկտների առանցքում:

Ըստ փորձագետի, Վրաստանը նույնպես կարևորում է Հայաստանի հետ հարաբերությունների ամրապնդումը:

«Վրաստանում նույնպես հասկանում են Հայաստանի նշանակությունը, առաջին հերթին Հայաստան-Ռուսաստան ռազմավարական հարաբերությունների առումով: Վրաստանում շատ լավ են հասկանում, որ թե՛ Ռուսաստան-Վրաստան հարաբերություններում, թե՛ տարածաշրջանային զարգացումներում Հայաստանը կարող է Վրաստանի դաշնակիցը լինել և աջակցել Վրաստանի ու Ռուսաստանի միջև համագործակցությանը»,- ասաց քաղաքետը:

Անդրադառնալով ջավախքահայության խնդիրներին` Ս. Մինասյանը շեշտեց, որ Ջավախքը ոչ թե խնդիր, այլ կամուրջ պետք է դառնա հայ-վրացական հարաբերություններում:

«Պետք է աջակցել Վրաստանին, որպեսզի Ջավախքն իրապես ներգրավվի Վրաստանի քաղաքական կյանքում, Հայաստանը պետք է սատարի ժողովրդավարական գործընթացները Ջավախքում` արդյունքում ունենալով հզոր և քաղաքական առումով ինտեգրված մի համայնք, որի բնակիչները կլինեն մի կողմից Վրաստանի լիակատար քաղաքացիներ, մյուս կողմից պահպանեն հայ ազգային ինքնության, քաղաքական, լեզվական իրավունքները, ինչն էլ կխթանի հայ-վրացական միջպետական հարաբերությունների զարգացմանը»,- նշեց Սերգեյ Մինասյանը:

Նախորդող հրապարակում`
Սերժ Սարգսյան. Հայաստանն ու Վրաստանը ուժեղ են միմյանցով և միմյանց հետ

Հարակից հրապարակում`
Կ. Ճշմարտիրյան. ԵՏՄ-ին անդամակցելուց հետո Հայաստանը եվրոպական շուկան չի կորցնի