Ձեր վստահելի աղբյուրը

Panorama.am-ի թղթակիցը Ստրասբուրգում զրուցել է ՀՀ ԱԺ փոխնախագահ, Եվրոպայի խորհրդի խորհրդարանական վեհաժողովում ՀՀ պատվիրակության ղեկավար Հերմինե Նաղդալյանի հետ։

-Տիկին Նաղդալյան, այսօր ԵԽԽՎ նախագահ Անն Բրասյորը ԵԽԽՎ ամբիոնից ասաց, որ ԵԽԽՎ- ն պատրաստ է աջակցել ղարաբաղյան խնդրի կարգավորմանը` ԵԱՀԿ Մինսկի խմբի շրջանակներում, ինչպես նաև ցանկություն հայտնեց աշխատել ԵԽԽՎ-ում հայ և ադրբեջանցի պատգամավորների հետ` վստահության մթնոլորտ ստեղծելու համար, ինչն էլ կօգնի գործընթացին: Ինչպիսի՞ն է ձեր մոտեցումն այս հարցին:
-Մինչ օրս Եվրոպայի խորհրդի խորհրդարանական վեհաժողովը 2 անգամ փորձ արել է ժամանակավոր կոմիտեի կարգավիճակով ներգրավվել վստահության կառուցման գործում: Առաջինը Ռասել Ջոնսոնի նախաձեռնած ժամանակավոր հանձնաժողովն էր, որից հետո փորձ կատարվեց «վերանորոգելու» այն Մելվութ Չավուշօղլուի նախագահության ժամանակ, սակայն երկու դեպքում էլ փորձը ցույց տվեց, որ այդ ձևաչափը չի աշխատում և այն չկարողացավ անգամ գտնել քննարկման կամ աշխատանքի իր առարկան:

Այստեղ կարևոր է այն, որ գործընթացը հիմնականում օգտագործվում է որպես ևս մեկ լրացուցիչ հարթակ` հակահայկական քարոզչության համար: Եվ առաջին հերթին հենց այս հանգամանքը մեզ համար հիմք է, որպեսզի մենք ձեռնպահ մնանք նման ձևաչափի ստեղծումից կամ վերստեղծումից, քանի որ համարում ենք, որ նման ճանապարհով փորձ է կատարվում Մինսկի խմբին խանգարող կամ խոչընդոտող ինչ որ գործողություններ կատարել, ինչը պարզապես անթույլատրելի կլիներ:Նախօրեին Անն Բրասյորի հետ հանդիպման ժամանակ նա նույնպես արծարծեց այս թեման, ասելով, որ ինքն էլ է փորձ կատարել հայ և ադրբեջանցի պատվիրակների ղեկավարների ձևաչափով գործընթաց սկսել և փորձել վստահության մթնոլորտ ստեղծել, սակայն իրեն չի հաջողվել:
Կարծում եմ, այդպես էլ պետք է լիներ, որովհետև ինչ վստահության մասին կարելի է խոսել, երբ սահմանին միջադեպեր են տեղի ունենում, երբ սահմանին երիտասարդներ են զոհվում: Ադրբեջանի կողմից իրականացվող քայլերը չեն խոսում այն մասին, որ կա վստահության ստեղծման ցանկություն:

Իհարկե, տեղյակ եմ հայ և ադրբեջանական պատվիրակությունների ղեկավարների մակարդակով հանդիպումների մասին և լիովին կիսում են հայկական պատվիրակության նախկին ղեկավար Դավիթ Հարությունյանի դիրքորոշումը, որ Ռամիլ Սաֆարով երևույթի պայմաններում մենք խոսելու որևէ ընդհանուր թեմա չունենք։

Այնպես որ, ներկայումս այս թեմային անդրադառնալը հեռանկար չունի։ Իհարկե հասկանում եմ, որ ԵԽ-ն ցանկանում է բարձրացնել իր դերակատարումը կոնֆլիկտող կողմերի հարաբերությունները բարելավելու համար, սակայն չեմ տեսնում որևէ ռեալ հիմք, որը թույլ կտա այն իրագործել, հատկապես ԵԽ-ն չունի ռեալ գործիք՝ այս գործընթացների վրա ազդելու համար։

-Տիկին Նաղդալյան, այսօր ԵԽԽՎ ամբիոնից ելույթ ունեցավ Ադրբեջանի նախագահը, ինչպիսի՞ն է ձեր տպավորությունը նրա ելույթից։
-Ադրբեջանի նախագահի պահվածքը վայել չէր Եվրոպայի խորհրդում նախագահող երկրի նախագահին, ոչ էլ վայել էր ԵԽ անդամ պետության ղեկավարին։ Ցուցադրական տոնայնությունը, որով Ալիևը խոսում էր պատվիրակների հետ, մատ թափ տալով և բացարձակ ժխտողական մոտեցմամբ՝ առանց հիմնավոր փաստարկների, պատվիրակների մեծ մասին զարմացրել էր։ Եթե Ալիևը նպատակ էր դրել, ինչպես իր խոսքում ասաց, իր երկիրը ներկայացնել լավ կողմերով, կարծում եմ նրա նպատակը չիրականացավ։

Առանձնացնեմ պատգամավորներից մեկի հարցը՝ ուղղված Ալիևին, որտեղ պատգամավորը բարձրացնում էր սահմանին տեղի ունեցող միջադեպերի հարցը։ Ալիևն իր պատասխանում ասաց, որ համանախագահողները հաճախ են իրեն այդ հարցը տալիս։

Այս պատասխանից արդեն երևում է, որ սա մտահոգիչ է և՛ Մինսկի խմբի համանախագահողների համար, և՛ միջազգային հանրության համար և այդ հարցը հատուկ տրվում է Ադրբեջանի նախագահին։ Կարծում եմ, այսպիսով Ալիևը ակամայից ցույց տվեց, թե ինչպիսին է համանախագահողների վերաբերմունքը ադրբեջանական դիրքորոշման նկատմամբ։

Ընդհանրապես, Ադրբեջանի նախագահությունը շատ խնդրահարույց է, ինչի մասին այսօր ևս բարձրաձայնեցին ԵԽԽՎ պատվիրակները։
 

Նախորդող հրապարակումներ`

Ճի՞շտ էր որոշումը` որևէ հարց չուղղել Ալիևին. Հովհաննիսյանի մեկնաբանությունը
ԵԽԽՎ-ում Ալիևը պաշտպանվում էր՝ «հարձակվելով» պատգամավորների վրա
Եվրոպան ականտես է Ալիևի ոչ ադեկվատությանն իր ողջ հմայքով. Ա.Հովհաննիսյան
Ալիևի ելույթի ժամանակ ակտիվիստները կապել են բերանները (լուսանկար)
Հայկական պատվիրակությունը որևէ հարցով չի դիմի Ալիևին. Հ.Նաղդալյան