Ձեր վստահելի աղբյուրը

«Ադրբեջանի արտաքին քաղաքականությունն աստիճանաբար ավելի ագրեսիվ է դառնում: Դա դրսևորվում է ոչ միայն Եվրոպայի խորհրդում, այլև տարբեր միջազգային կազմակերպություններում: Սա խոսում է կամ այն մասին, որ Ալիևի վարչակարգն աստիճանաբար կորցնում է իրականության զգացողությունը, կամ եվրոպական կառույցներն են աստիճանաբար ավելի շատ կարևորում շահերը, քան արժեքները»,- այս մասին անդրադառնալով ԵԽԽՎ-ում Ադրբեջանի նախագահ Իլհամ Ալիևի հայտարարություններին, Panorama.am-ի հետ զրույցում նշեց ՀՀ ԱԺ արտաքին հարաբերությունների մշտական հանձնաժողովի Արտակ Զաքարյանը:

Հիշեցնենք, որ Եվրոպայի խորհրդի նախարարների կոմիտեում Ադրբեջանի նախագահության շրջանակներում իր ելույթի ժամանակ Իլհամ Ալիևը կրկին հակահայկական հայտարարություններով է հանդես եկել: Ադրբեջանում մարդու իրավունքների և ազատությունների վերաբերյալ Խորհրդարանական վեհաժողովի պատգամավորների հարցերին նա պատասխանել է կոպիտ տոնով և մեղադրել մարդու իրավունքների ոտնահարման մեջ եվրոպական ժողովրդավարական պետություններին:

Արտակ Զաքարյանի դիտարկմամբ՝ Ալիևի ագրեսիվ հայտարարությունները պայմանավորված են նրանով, որ միջազգային կազմակերպություններում աժեքային համակարգերի և շահերի համակարգերի միջև որոշակիորեն հավասարության նշան է դրվում:

«Ադրբեջանն ամեն օր ոտնահարում է այն արժեքները, որոնցով ապրում է քաղաքակիրթ մարդկությունը: Այնուամենայնիվ վստահ եմ, որ ԵԽԽՎ պատգամավորների ճնշող մեծամասնությունը երբեք տուրք չի տա Ադրբեջանի ղեկավարի քամահրական վերաբերմունքին այդ արժեքների նկատմամբ»,- նշեց Ա. Զաքարյանը:

Նրա խոսքով՝ Ալիևի վարչակարգի ագրեսիան պայմանավորված է նաև այն իրողությամբ, որ բավական մեծ ծավալի ֆինանսական միջոցներ են ծախսվում միջազգային հարթակներում հակահայկական քաղաքականության ուղղությամբ, սակայն դրանք արդյունք չեն տալիս:

«Այնուամենայնիվ, մենք խորհրդարանական մակարդակով մեր աշխատանքները պետք է ավելի ինտենսիվ դարձնենք, որպեսզի հակահայկական քարոզչությունը, մարդու իրավունքների և մարդասիրական արժեքների դեմ Ադրբեջանի ագրեսիվ քաղաքականությունը հաջողության չհասնի: Նավթի գործոնը, բնական է, աշխարհում մնում է որոշիչ, սակայն այն չպետք է ավելի ազդեցիկ լինի, քան այն արժեքները, որոնցով ապրում է քաղաքակիրթ մարդկությունը»,- ընդգծեց Արտակ Զաքարյանը:

Իր հերթին, ՀՅԴ բյուրոյի Հայ դատի և քաղաքական հարցերի գրասենյակի պատասխանատուԿիրո Մանոյանը կարծում է, որ Իլհամ Ալիևի ելույթը պարզապես հեռու է առողջ բանականությունից:

«Հասկանալի է, որ խոսքի ազատություն է, ով ինչ ուզում է՝ կարող է ասել, սակայն եթե որևէ երկրի նախագահ այս ձևով ու ոճով է խոսում նման ատյանում, եթե մարդն այդքան սուտ խոսելու համարձակություն ունի և խոսքի ազատության անվան տակ Եվրոպայի խորհրդում հանդուրժվում է դա, սկսում եմ մտածել, թե արդյոք այդ ատյանում մենք պետք է մնանք, թե ոչ: Չեմ պատկերացնում, թե ինչպես կարելի է խոսել նման մարդու հետ»,- ասաց Կ. Մանոյանը:

Վերջինիս համոզմամբ՝ Ադրբեջանի նախագահի յուրաքանչյուր ասածի հայատյաց էությունը հստակ պետք է ներկայացվի միջազգային հանրությանը, և չպետք է մտածել, որ այլոք խնդիրները պատկերացնում են այնպես, ինչպես մենք:

«Ալիևն ասում է, թե Հայաստանի նախագահն ասել է, որ հայ-ադրբեջանական հակամարտությունը կրոնական է: Այսինքն՝ այդ նույն դահլիճում Հայաստանի նախագահի ասածն այդքան գլխիվայր ներկայացնելը, էլ չեմ ասում նրա հայտարարությունը, թե այսօրվա Հայաստանը հին ադրբեջանական տարածք է, զարմանալի է ուղղակի: Այդ մարդը մի քիչ էլ որ շարժվի, ուղղակի պետք է կապել-տանել՝ որպես գլուխը կորցրած մարդ, որ կարող է վտանգ ներկայացնել աշխարհի համար»,- շեշտեց Կիրո Մանոյանը: