Ձեր վստահելի աղբյուրը

Հակառակորդի կողմից հրադադարի խախտումները լարվածություն ստեղծելու և Արցախի շուրջ բանակցային գործանթացի՝ վերջնագծին չհասցնելու փորձ են: Այսօր հարավ-արևմտյան սահմանագոտում տեղակայված հենակետ այցելության ժամանակ տված մամուլի ասուլիսում նման կարծիք հայտնեց ՀՀ պաշտպանության նախարար Սեյրան Օհանյանը:

«Մեզ պարտադրել են պատերազմ, որի ընթացքում մենք հաջողություններ ենք ունեցել և այսօր էլ պարտադրում են ուժերի, սպառազինությունների մրցավազք, և մենք առանց որևէ երրորդ ուժի մեր առջև դրված խնդիրներն իրականացնում ենք: Միայն ու միայն երկխոսության, ռազմաքաղաքական շրջանակներում վստահության եզրերի ձևավորման արդյուքնում կարող ենք ստեղծել մթնոլորտ բանակցային գործընթացն առաջ տանելու ուղղությամբ»,- ասաց նախարարը:

Նա նկատեց, որ վստահության եզրերը դիպուկահարների հետքաշումն է, դիվերսիոն հետախուզական գործողություններից հրաժարումը, անհրաժեշտության դեպքում՝ միջազգային հետաքննության անցկացումը:

Նախարար Օհանյանն անդրադարձավ սահմանի հարավ-արևմտյան հատվածում հակառակորդի վերջին ակտիվությանը և նշեց, որ դա ևս լարվածություն ստեղծելու փորձ է եղել, որը կանխվել է մեր զինված ուժերի ստորաբաժանումների կողմից և բերվել է նախկին վիճակին:

Panorama.am-ի թղթակցի խնդրանքով նախարարն անդրադարձավ ՀՀ-ում Ամերիկայի դեսպան Ջոն Հեֆֆերնի վերջին հայտարարությանը, որում խոսվել էր 7 շրջանների վերադարձի, ինչպես նաև ստատուս քվոյի՝ վտանգավոր դառնալու մասին ԵԱՀԿ ամերիկացի համանախագահ Ջեյմս Ուորիքի հայտարարութանն ու դրանց հետևանքով սահմանային լարվածության հնարավոր ակտիվացմանը:

Նախ նա նկատեց, որ ՀՀ և ԼՂՀ սահմանագծում լարվածությունն Ադրբեջանի ղեկավարության ոչ կառուցողական աշխատանքի շնորհիվ է:

«Նրանք միշտ էլ փորձում են քաղաքական տարբեր իրադարձությունների շրջանականերում լարվածություն ստեղծել: Նրանց «եռանդը» մարում է մեր արժանի հարվածներից, պատժելուց հետո: Անկասկասծ նաև այդ հայտարարությունները որոշակի ազդում են: Դրանք չպետք է լինեն միակողմանի: Միջազգային կառույցներն իրավիճակին պետք է երկկողմանի, լիարժեք գնահատական տան: Դա պետք է լինի իրադրության սթափ վերլուծության արդյունք»,- ասաց նախարարը:

Ըստ նրա, երկխոսության շրջանակներում մի այնպիսի իրավիճակի պետք հասնել, որ հասկանալի լինի՝ ինչ է նշանակում մեկը մյուսին զիջել: Նա ընդգծեց, որ եթե զիջումը միակողմանի է, դա դառնում է միակողմանի պարտադրանք:

«Ավելի լավ է իրենք ԼՂ ինքնորոշման հարցը խաղաղ պայմաններում լուծելու, Արցախի պատմական, պապական տարածքներում ինքնորոշվելու իրավունքը վերականգնելու ուղղությամբ աշխատեն: Մանացածը, թե ինչ փոխզիջում կլինի, բոլորը քաղաքական, առավել ևս ռազմական փորձագիտության արդյունք պիտի լինի»,- ասաց նախարարը:

Սեյրան Օհանյանի խոսքով, այդ ամենը բերում է նրան, որ հայկական կողմերի սահմաններն ավելի են ամրապնդվում. «Մենք՝ որպես Լեռնային Ղարաբաղի ժողովրդի անվտանգության երաշխավոր, այսօր ամեն ինչ անում ենք, որպեսզի փոխգործունակ կարողությունների ստեղծման միջոցով, ԼՂՀ ղեկավարության և Պաշտպանության բանակի հետ ստեղծենք զսպող մեխանիզմներ:

Անհրաժեշտության դեպքում մեր զինծառայողները ԼՂՀ ՊԲ-ի և ողջ ժողովրդի, հայ ժողովրդի հետ միասին ամեն մի թիզ հողի համար մարտնչելու են»: