Ձեր վստահելի աղբյուրը

«Հիշում եմ և պահանջում. ահա այն առանցքը, որի շուրջ մենք համախմբվում ենք ոգեկոչելու մարդկության դեմ ծրագրված և իրագործված ամենածանր հանցագործության` ցեղասպանության զոհ դարձած հայորդիներին: Պատրաստվում ենք աշխարհին ցույց տալ մեր հանդեպ իրագործած հանցագործության ողջ ծավալն ու սարսափը: Հավաքվելու ենք սգալու և ծրագրելու մեր ժառանգությունը վերադարձնելու ուղիները: Բայց 2015թ-ը մեզ համար չի դառնա ողբի և սգի տարի, մենք դա թույլ չենք տա առաջին հերթին հենց այն պատճառով, որ դա այլևս մեզ կոտորողների երազն ու ցանկությունն է` մեզ վերածել քոչվոր, վտարանդի ու ողբացող մարդկային զանգվածի, զրկելով մեզ ժողովուրդ կոչվելու և հայրենիք ունենալու հնարավորությունից» ,-Հայաստան-Սփյուռք հինգերորդ համաժողովի լիագումար նիստում հայտարարեց ՀՀ նախագահի աշխատակազմի ղեկավար, Պետական հանձնաժողովի անդամ, Հայոց ցեղասպանության 100-րդ տարելիցին նվիրված միջոցառումների աշխատանքները համակարգող Վիգեն Սարգսյանը:

Նրա խոսքով, հայ ազգը կոտորողները չարաչար սխալվեցին իրենց հաշվարկներում և աշխարհով մեկ սփռված հայությունը չդարձավ փոշի, չդարձավ մուրացկան ու չբարոյազրկվեց.«Այլ համախմբվեց, ինչպես կարող է համախմբվել հինավուրց ու իմաստուն ժողովուրդը և իր տեղը գտավ բոլոր այն երկրներում, ուր ճակատագիրը հասցրեց մեր տատերին ու պապերին»:

«Ի՞նչ իմանային Էնվերն ու Թալեաթը, որ ավիրելով աշխարհով մեկ են ցրում մի այնպիսի սերմ, որից պիտի ծնվեին համաշխարհային մեծություններ, մարդիկ, ովքեր ակամայից պետք է դառնային հայոց ժողովրդի դեսպաններ, որն աշխարհին ասելու և տալու բան ուներ»,- հայտարարեց Վ.Սարգսյանը` թվարկելով բոլոր մեծանուն հայերին:

Նախագահի աշխատակազմի ղեկավարը, դիմելով ներկա սփյուռքահայությանը և հենց նրանց վկա կարգելով իր խոսքերին շեշտեց` ողբերգությունը չկոտրեց մեզ, հակառակը` կոփեց, ուժեղացրեց և բարձրացրեց: Այն նաև համախմբեց մեզ, ամրապնդեց հայկական ընտանիքը. «Հայը սովորեց լինել մեկը մյուսին սատարող, ու ունենալ առաջին հանրապետությունը 1918թ-ին: Ունենալ նաև մեր ժողովրդի վաղեմի երազանքը` վաղը 23 տարին տոնող անկախ Հայաստանի Հանրապետություն: Եվ հենց այս մասին է լինելու ցեղասպանության 100-ամյակի ոգեկոչումը, այն լինելու է վերապրելու, համախմբվելու մասին: Ուրեմն հենց Ծիծեռնակաբերդի բարձունքում ոգեկոչման մեր ավանդական ծեսերին զուգընթաց մենք մեծարելու ենք անցնող հարյուրամյակում մեր ժողովուրդը բարձրացնողներին ու ճանաչող դարձնողներին, տոնելու ենք անցնող հարյուրամյակի մեր նվաճումներն ու ձեռքբերումները»,- ընդգծեց նա:

«Հայ ժողովուրդը,-շարունակեց Վիգեն Սարգսյանը,- որպես ցեղասպանություն վերապրած ժողովուրդ ունի նաև մեծ առաքելություն` Հայաստանը ցեղասպանության հանցագործության դեմ միջազգային պայքարի ճանաչված առաջնամարտիկներից է այլևս: Եվ մեր պարտքն է անընդհատ հիշեցնել մարդկությանը, որ կանխարգելումը, ճանաչումը, դատապարտումն ու պատիժը այդ պայքարի կարևորագույն ու անքակտելի գործոններն են: Եվ ուրեմն նաև այդ մասին է լինելու ցեղասպանության 100-ամյակի մեր ոգեկոչումը»:

«Հաջորդ տարի Հայաստանը դառնալու է ցեղասպանություն հանցագործության դեմ պայքարի գլխավոր միջազգային հարթակ. մենք հյուրընկալելու ենք կարևորագույն միջազգային միջոցառումներ, որոնք դառնալու են այդ պայքարի առանցքը` Ընդդեմ Ցեղասպանության հանցագործության գլոբալ ֆորումը, Ցեղասպանագետների միջազգային ընկերակցության 12-րդ համաժողովը և այլն»,- թվարկեց նա` շեշտելով, որ Հայաստանը հարթակ է ստեղծելու ցեղասպանության ենթարկված բոլոր ժողովուրդների համար, որպեսզի բոլոր վերապրածների ձայնը լսելի դառնա, քանի որ ցեղասպանություն հանցագործությունը չի ճանաչում սահմաններ:

«Ուրիշի ցեղասպանություն չի լինում, քանի որ որևէ ժողովրդի բնաջնջում վտանգ է աշխարհի ողջ բնակչության համար»,- հավելեց իր խոսքը Հայոց ցեղասպանության 100-րդ տարելիցին նվիրված միջոցառումների աշխատանքները համակարգող Վիգեն Սարգսյանը: