Ձեր վստահելի աղբյուրը

Եվրոպայի խորհրդի խորհրդարանական վեհաժողովի հաստատմանը այսօր Նիդերլանդները ներկայացնող պատգամավոր Թինի Կոքսը ներկայացրեց վեհաժողովի Բյուրոյի կայացրած որոշումները։ Բյուրոյի որոշումներում ներառված էր նաև ԵԽԽՎ բյուրոյի սեպտեմբերի 2-ին Փարիզում կայացրած որոշումը, որով Լեռնային Ղարաբաղի հակամարտության վերաբերյալ ադրբեջանական 2 բանաձևերի նախագծերն ուղարկվում են ԵԽԽՎ քաղաքական հարցերով հանձնաժողով, որն էլ պետք է պատրաստի համատեղ զեկույց։ Զեկույցը վերնագրվել է «Լեռնային Ղարաբաղում և Ադրբեջանի մյուս օկուպացված տարածքներում բռնությունների աճ»։

Panorama.am-ի թղթակիցը Ստրասբուրգից հայտնում է, որ բյուրոյի որոշմանը, սակայն, անհամաձայնություն հայտնեց հայկական պատվիրակության ղեկավար Հերմինե Նաղդալյանը, ով բողոքարկեց բյուրոյի որոշումը և առաջարկեց հարցն ուղարկել մոնիտորինգի կոմիտե՝ ի գիտություն։ Սակայն, քվեարկության արդյունքում առաջարկը մերժվեց 41 կողմ, 74 դեմ ձայներով։

Հերմինե Նաղդալյանը մինչ բյուրոյի որոշմանն անհամաձայնություն հայտնելը հանդես եկավ ելույթով և ասաց, որ Հայաստանը միջազգային կառույցներին կոչ է անում զգուշավորություն ցուցաբերել Լեռնային Ղարաբաղի հակամարտության հետ կապված հարցերում, քանի որ ԼՂ հակամարտության կարգավորման հարցում հիմնարար է ԵԱՀԿ Մինսկի խմբի գործունեությունը, որն էլ պետք է գտնի խնդրի կարգավորման խաղաղ տարբերակը։

«Սա միակ միջազգային կառույցն է, որն ունի մանդատ՝ ԼՂ հակամարտության կարգավորման համար, որին աջակցում են միջազգային կառույցները, ԵՄ-ն և մեր կազմակերպությունը։ Մենք կոչ ենք անում Վեհաժողովին՝ խուսափել այնպիսի քայլերից, որոնք կարող են բացասական ազդեցություն ունենալ ԼՂ հակամարտության խաղաղ կարգավորման վրա»․- ասաց Հերմինե Նաղդալյանը՝ ԵԽԽՎ-ի ուշադրությունը հրավիրելով փաստաթղթի անվան վրա՝ այն է «Լեռնային Ղարաբաղում և Ադրբեջանի մյուս օկուպացված տարածքներում բռնությունների աճ», որն արդեն իսկ խոսում է՝ կանխորոշելով սուբյեկտիվությունը։

«Իրավիճակն այնքան փխրուն է, որ ցանկացած քայլ կարող է լարվածություն առաջացնել սահմանին։Մենք հավատացած ենք, որ այս վեհաժողովը պետք է քայլեր ձեռնարկի հայ և ադրբեջանցի պատվիրակների միջև վստահության հաստատման համար, քան նոր պատերազմներ կառուցի։ ԵԽԽՎ-ն պետք է իր առաջնային նպատակը կատարի՝ մարդու իրավունքների և հիմնարար ազատությունների պաշտպանությունը»,-ասաց ՀՀ պատվիրակության ղեկավարը՝ ևս մեկ անգամ կոչ անելով ԵԽԽՎ անդամներին՝ «շատ զգույշ լինել Լեռնային Ղարաբաղի հակամարտության հետ կապված հարցում, որը մեզ համար կարևոր և կենսական է»։

Հիշեցնենք, որ բանաձևի նախագծերը ներկայացվել էին ԵԽԽՎ ամառային նստաշրջանում։ Բանաձևերի նախագծերից մեկը ներկայացրել էր ԵԽԽՎ-ում ադրբեջանական պատվիրակության անդամ Էլհան Սուլեյմանովը, երկրորդը ԵԽԽՎ-ում Հունաստանի պատգամավոր, Հունաստանի նախկին արտգործնախարար ԹեոդորաԲակոյանիսը։

Հիշեցնենք նաև, որ հայկական պատվիրակության անդամ, ԲՀԿ խմբակցության պատգամավոր Նաիրա Զոհրաբյանն իր ելույթում անընդունելի է համարել ներկայացված նախաձեռնությունը՝ կոչ անելով ԵԽԽՎ-ին մնալ իր մանդատի շրջանակներում ու չանել քայլել, որոնք վնասելու են բանակցային գործընթացին ու էլ ավելի են սրելու կողմերի միջեւ առկա անվստահությունը: