Ձեր վստահելի աղբյուրը

«Լրագրողներ առանց սահմանների» միջազգային իրավապաշտպան կազմակերպության գլխավոր քարտուղար Քրիստոֆ Դելորը բաց նամակ է հղել Ֆրանսիայի նախագահ Ֆրանսուա Օլանդին` կոչ անելով նրան բարձրաձայնել Ադրբեջանում մարդու իրավունքների խախտումների մասին՝ ազատ արձակելով ձերբակալված լրագրողներին ու բլոգերներին՝ միաժամանակ հիշեցնելով ադրբեջանցի պաշտոնակից Իլհամ Ալիևին այս ոլորտում ստանձնած պարտավորությունների մասին: Նամակը հրապարակվել է կազմակերպության կայքում:

«Լրագրողներ առանց սահմաններին» ցանկանում է ուշադրություն գրավել ադրբեջանական ԶԼՄ-ներում հոգնականության վերացման խնդրին: 2014-ին մամուլի ազատության ինդեքսում Ադրբեջանը զբաղեցնում է 160-րդ տեղը 180 երկրների շարքում: Արդեն իսկ մեծամասամբ իշխանական օղակների կողմից վերահսկվող լրատվամիջոցների դաշտում ուժեղացել է լրագրողների, բլոգերների և անկախ լրատվական գործակալությունների ճնշման քաղաքականությունը»,- նշված է հայտարարության մեջ:

Ինչպես նկատում է «Լրագրողներ առանց սահմանների» կազմակերպության գլխավոր քարտուղարը, Ադրբեջանի իշխանություններն ամբողջությամբ վերահսկում են լրատվադաշտը: Անկախ թերթերը պայքար են մղում գոյատևելու համար: Նրանցից առաջատարն «Ազադլիգ» թերթն է, որն այլևս չի կարողանում վճարել տիեզերական չափերի հասնող տույժերը. այն մոտ է տապալմանը: Մեկ այլ՝ «Զերկալո» թերթն էլ հարկադրված էր մայիսին կասեցնել գործունեությունը:

Առնվազն 13 լրագրողներ ու զգալի թվով բլոգերներ ճաղերի հետևում են իրենց իսկ գործունեության պատճառով: Նրանցից մի քանիսի առողջական վիճակը, ինչպես «Խուրալ» ադրբեջանական թերթի խմբագիր Ավազ Զեյնալիինը, ծանր է: Համաձայն աղբյուրի՝ իշխանությանը քննադատող լրատվականները բախվում են ամեն տիպի սպառնալիքների հետ, օրինակ՝ մահվան սպառնալիք, հարձակում, շանտաժ, զրպարտություն: Այն սպառնալիքները, որ ստանում են անկախ լրագրողները, նրանց փոխարեն շատերին կհարկադրեր հեռանալ երկրից: Այսպես, ապրիլի 18-ին «Զերկալո» անկախ թերթի աշխատակից Ռաուֆ Միրկադիրովին արտաքսել են Թուրքիայից Ադրբեջան: Բաքու ժամանելուն պես վերջինիս ձերբակալել են՝ մեղադրելով Հայաստանի օգտին լրտեսության համար:

Այս ամառ իշխանությունները սկսել են հետապնդումներն այն ՀԿ-ների նկատմամբ, որոնք աջակցում են լրատվադաշտի ներկայացուցիչներին: Դրանք են օրինակ Լրագրողների ազատության և անվտանգության կենտրոնը, Լրատվադաշտի պաշտպանության ինստիտուտը, IREX-ը, և այլն: Ադրբեջանի իշխանությունները սառեցրել են նրանց բանկային հաշիվները, նրանց ղեկավարները ստիպված են եղել փախչել երկրից: Մեծ մասը գործունեության կասեցումից բացի այլ տարբերակ չուներ:

«Չնայած որ մենք լավ ենք հասկանում Բաքվի հետ սերտ հարաբերությունների տնտեսական ու ռազմավարական առավելությունները, այնուհանդերձ, գործընկերների միջև անկեղծ երկխոսությունը չի շրջանցի հիմնարար ազատությունները»,-ասել է Դելորը՝ ընդգծելով, թե լրատվադաշտում հոգնականության վերացումը որոշ առումներով բարդեցնում է օրենքին հետևելն ու կոռուպցիայի դեմ պայքարն Ադրբեջանում, առանց որոնց էլ Բաքուն երբևէ չի դիտվի հուսալի գործընկեր:

«Ուստի, մենք Ձեզ խնդրում ենք բարձրաձայնել այս հարցն ադրբեջանցի պաշտոնակցի հետ Փարիզում հանդիպելիս: Մենք նաև կոչ ենք անում Ձեզ հստակ կերպով մատնացույց անել նախագահ Ալիևին, թե կառավարության կողմից մամուլի ազատության խախտումները համատեղելի չեն ինչպես Փարիզի ու Բաքվի սերտ հարաբերությունների, այլև Ադրբեջանի՝ Եվրոպայի խորհրդի նախարարների կոմիտեում երկրի նախագահության հետ»,-նշված է հրապարակման մեջ: