Ձեր վստահելի աղբյուրը

«Ալիևի վարչակարգը բառեր չի հասկանում: Եթե մենք ցանկանում ենք արդյունքի հասնել, եթե մենք ցանկանում ենք իրականում փոխել իրավիճակը, ապա ժամանակն է պատժամիջոցներ սահմանել»,-«Ամերիկայի ձայնին» տված հարցազրույցում հայտարարել է Ադրբեջանում ձերբակալված կոնֆլիկտաբան Արիֆ Յունուսի եղբայրը՝ քաղաքական վտարանդի Ռամիզ Յունուսը՝ անդրադառնալով երկրում մարդու իրավունքների խախտումներին:

Նրա խոսքերով՝ Ադրբեջանի դեմ առաջին հերթին պետք է տնտեսական պատժամիջոցներ սահմանվեն, պետք է արգելվի մուտքը ԵՄ երկրներ ու ԱՄՆ այն բոլոր պաշտոնատար անձանց համար, ովքեր առնչություն ունեն քաղաքական որոշումների ընդունման հետ: «Բացի այդ, անհրաժեշտ է փակել նրանց բանկային հաշիվները, զրկել նրանց անշարժ գույքից, միայն այդ դեպքում նրանք էականորեն կզգան դրանք: Ադրբեջանի վրա ազդեցության այլ միջոցներ ես չեմ տեսնում»,-նշել է Յունուսը:

Յունուսը նկատել է, որ Ադրբեջանում միայն 2014-ի ընթացքում շատ մեծ թվով մարդիկ են ձերբակալվել՝ ակտիվիստներ, քաղաքացիական հասարակության ու ՀԿ-ների ներկայացուցիչներ, որոնք երկրում պաշտպանում են արևմտյան արժեքները:

Այն հարցին, թե ինչպես է նա վերաբերում Ադրբեջանի նախագահի այն հայտարարությունը, որ «քաղբանտարկյալ» հասկացություն գոյություն չունի, Ռամիզ Յունուսը պատասխանել է՝ հենց նման արդարացումներ են կիրառում այլ ավտորիտար երկրների ներկայացուցիչները ևս: Նրա խոսքերով՝ Ադրբեջանի նախագահը հղում է հենց Եվրախորհրդարանի բանաձևին, որը ձայների մեծամասնությամբ մերժվել էր: Յունուսն ընդգծում է, որ այս ամենը խավիարային քաղաքականության հետևանք է, որի լոբբին արվում է Ադրբեջանի կառավարության կողմից, և այդ հարցում նրան օգնում են արևմտյան ընկերությունները, առաջին հերթին՝ British Petroleum-ը, որը պաշտպանում է Ադրբեջանում իր բիզնես շահերը:

«Այսօր բոլորին ազատազրկում են կամ խուլիգանության համար կամ դարձնում են ընդդիմադիր թմրամոլներ կամ լրտեսներ: Ադրբեջանում ներկայիս իրավիճակը հիշեցնում է Իրանում 1979 թվականը, երբ մեկ ակնթարթում Արևմուտքը երկիր կորցրեց»,-նշել է Յունուսը:

«Ես վախենում եմ երկրում Իրանի 1979-ի իրադարձությունների կրկնությունից, քանի որ այն ուժերը, որոնք կարող են դա անել, այսօր իրականում էլ առկա են, իսկ այն ուժերը, որոնք կարող էին և Եվրամայդան անցկացնել Ադրբեջանում, ցավոք, ներկայումս ճնշված են: Նրանց մի մասը մեկնել է, մի մասը ձերբակալված է, մի մասին էլ պարզապես վերացրել են»,-շեշտել է Յունուսը:

Անդրադառնալով այն հարցին, թե ինչ գիտի նա իր եղբոր մասին, Ռամիզ Յունուսն ասել է, որ վերջինս ազգային անվտանգության նախարարությունում լիակատար մեկուսացման մեջ է, նրա հետ ոչ մի կապ չկա, ոչ մի նամակագրություն: Միակ բանը, որ հաղորդել է փաստաբանը, նա ողջ է: «Ես չեմ կարող ոչինչ ասել, քանի որ քաջատեղյակ եմ՝ այդ կառուցվածքը հայտնի է նրանով, որ այնտեղ կիրառում են ճնշման ամենասուր մեթողներ թե՛ հոգեբանական, թե՛ ֆիզիկական»,-պատմել է Յունուսը:

Նա պատասխանել է այն հարցին, թե ինչպես է դարձել քաղաքական վտարանդի՝ հիշեցնելով, որ 2003-ին Ադրբեջանում ցավալի իրադարձություններ են եղել, նախագահական ընտրություններից կես տարի առաջ մահացել է նախագահ Հեյդար Ալիևը, սակայն ադրբեջանական իշխանությունները փորձում էին ձգձգել այդ տեղեկությունը հայտնելը ընդհուպ մինչև ընտրություններ: Դրանք կայացան աշնանը, և այդպիսով Իլհամ Ալիևը եկավ իշխանության, չնայած որ ընտրություններում հաղթել էր ընդդիմության առաջնորդ Իսա Գամբարը:

«Ցավոք, 2003-ի հոկտեմբերի 15-ի լույս 16-ի գիշերը սկսվեցին զանգվածային ձերբակալություններ, մարդիկ դուրս եկան փողոց, քաղաքացիներ մահացան ոստիկանության հետ բախումներում, սկսվեցին բռնաճնշումներ, շատ մեծ թվով մարդիկ գաղթեցին Ադրբեջանից, ես էլ նրանց շարքում էի»,-եզրափակել է Յունուսը: