Ձեր վստահելի աղբյուրը

ԱԺ արտահերթ նստաշրջանի օրակարգում քննարկվում է «Սահմանամերձ համայնքների սոցիալական աջակցության մասին» նախագիծը, որը կարգավորում է ՀՀ կառավարության հաստատած ցանկում ներառված 31 սահմանամերձ համայնքներին աջակցություն ցուցաբերելու գործընթացը, մասնավորապես՝ բնակիչները պետական բյուջեից մասամբ կփոխհատուցվեն սպառած բնական գազի, էլեկտրական էներգիայի և ոռոգման ջրի վարձավճարների համար:

Ըստ նախագծի հարկերը կվճարվեն համայնքային բյուջե: Սահմանամերձ համայնքների բնակիչների կողմից գազի ու էլեկտրաէներգիայի վճարների դեպքում դրանք կփոխհատուցվեն ծառայությունները մատուցողներին համամասնաբար և միայն մի դեպքում քաղաքացուն կտրվի գումարը՝ խոսքն այն անձանց մասին է, ովքեր բնական գազի սպառող չեն: Կառավարությունը որոշում է կայացրել նրանց տալ փոխհատուցում՝ այլընտրանքային ջեռուցում իրականացնելու համար: Ի դեպ, կառավարությունը դեմ է, որ գումար տրվի սահմանամերձ համայնքների բնակիչներին, քանի որ այդ դեպքում վստահ չէին կարող լինել, որ այն հասցեական օգտագործում կունենա: Իսկ գործադիրի նպատակն է լուծել կենսակերպի որոշակի բարելավման խնդիրը:

Ոռոգման ջրի դիմաց փոխհատուցումը կկազմի 50 տոկոս, իսկ ահա հողի հարկն ու գույքահարկը կփոխհատուցվեն:

Իր խոսքում ընդդիմադիր պատգամավոր Նիկոլ Փաշինյանը հայտարարեց, որ նախագծի վերաբերյալ իր գնահատականը կախված կլինի նրանից, թե ինչ չափաքանակ կսահմանի կառավարությունը: Բայց պատգամավորը հույս հայտնեց, որ այդ չափաքանակները կլինեն շոշափելի: Նա նաև քննարկումից դուրս առաջարկ հնչեցրեց ՝ հնարավո՞ր է, որ սահմանապահ համայնքների դպրոցների երեխաները ևս ընդգրկվեն դպրոցական սնունդ ծրագրի մեջ;

«Ընդ որում դա կարելի է անել առանց ծախսերը մեծացնելու, ուղղակի բյուջեի մեջ որոշակի վերահաշվարկներ իրականացնելու միջոցով»,- նկատեց Ն.Փաշինյանը: 

Կառավարության ներկայացուցիչը նշեց, որ հարցը կարևոր է, բայց այն այս նախագծով լուծվող չէ, և պատկան մարմինները դեռ կզբաղվեն դրանով:

Հավանության արժանանալու դեպքում օրենքը կգործի 2015թ-ի հունվարի 1-ից մինչև 2018թ-ը, այնուհետ կառավարությունը կգնահատի արդյունքները և ըստ այդմ որոշում կկայացվի հետագայի մասով: