Ձեր վստահելի աղբյուրը

«Այս պահին ընթանում է ծառայողական քննություն, որի արդյունքով կտրվեն բոլոր հարցերի պատասխանները: Ծառայողական քննության արդյունքներից հետո ամեն ինչ պարզ կդառնա»,-այսօր  «Եռաբլուր» զինվորական պանթեոնում զինվորական արարողակարգով ադրբեջանական զինուժի կողմից խոցված ԼՂՀ ՊԲ «ՄԻ-24» ուղղաթիռի անձնակազմի անդամների՝ հրամանատար, մայոր Սերգեյ Սահակյանին, անձնակազմի անդամներ, ավագ լեյտենանտ Սարգիս Նազարյանի և լեյտենանտ Ազատ Սահակյանի հուղարկավորության արարողությունից հետո ասաց  ԼՂՀ ՊԲ հրամանատար Մովսես Հակոբյանը` պատասխանելով լրագրողի հարցին, թե ինչու էր ուղղաթիռը  շփման գծին այդքան մոտ թռիչք կատարում:

Նա նշեց, որ Ադրբեջանը իրավասու չէ և չի կարող սահմանափակել Արցախի Հանրապետության օդային տարածքը:

«Արցախում միշտ էլ իրականացվել են թռիքներ և թռիչքները շարունակվելու են: Բոլոր միջադեպերը ազդում են բանակի վրա, սակայն դա չի նշանակում, որ բանակը հոգեբանորեն անկում է ապրելու»,-նշեց Մ.Հակոբյանը:

Նրա խոսքով, բանակը ստեղծված է պատերազմելու համար և ուղղաթիռի հետ կապված միջադեպը պատերազմի մի դրվագն է:

«Բանակը միշտ էլ բերված է այնպիսի պատրաստվածության, որ ցանկացած պահի պատրաստ է համարժեք պատասխան տալ հակառակորդի ոտնձգություններին»,-ասաց ԼՂՀ ՊԲ հրամանատարը:

Մ.Հակոբյանը նշեց, որ չի կարող գնահատական տալ միջազգային կազմակերպությունների գործողություններին՝ ուղղաթիռի խոցման հետ կապված, քանի որ նրանք իրեն չեն ենթարկվում:

Նախորդիվ`
Սեյրան Օհանյան. Հակառակորդը, թիկունքից հարվածելով հայկական բանակին, միշտ դիմահար ուժեղ հարված է ստանալու
«Եռաբլուր»-ում զինվորական արարողակարգով հուղարկավորում են խոցված ուղղաթիռի անձնակազմի անդամներին (լուսանկարներ, տեսանյութ)