Ձեր վստահելի աղբյուրը

«Ցանկացած միության անդամակցությունից առաջ իշխանությունը ծանրութեթև է անում բոլոր դրական ու բացասական հետևանքները: Գլոբալ աշխարհում չկա գործնականում մի որոշում, որն իր մեջ միայն դրական հետևանքներ ներառի»,-ԱԺ ամբիոնից հայտարարեց ԱԺ փոխխոսնակ Էդուարդ Շարմազանովը՝ խոսելով Եվրասիական տնտեսական միությանը Հայաստանի անդամակցության պայմանագրի մասին:

Նրա խոսքով, Եվրասիական տնտեսական միությանն անդամակցելու որոշումն ընդունելուց առաջ Հայաստանի իշխանությունները մանրամասն ուսումնասիրել են հնարավոր դրական և բացասական հետևանքները:

«Հարցը, որ այսօր քննարկվում է խորհրդարանում, շատ կարևոր է մեր երկրի ապագա զարգացման համար, ուստի խորհրդարանի ամբիոնից հնչող տարբեր կարծիքները և զգացմունքային գնահատականները սպասելի են և բնական: Սակայն, բնական չէ իրականության չափից ավելի ուռճացումը»,- ասաց նա՝ անդրադառնալով հնչող քննադատություններին:

Է. Շարմազամովի խոսքով, Հայաստանի համար դրական է այն, որ ԵՏՄ անդամակցությամբ երկրի տնտեսվարողների, ժողովրդի  համար բացվում է 170 միլիոնանոց շուկա. «Սա հստակ դրական է: Երկրորդ՝ Հայաստանը հնարավորություն է ունենում սահմանին գազ ստանալ 189 դոլարով, իսկ ո՞րն էր այլընտրանքը: Այլընտրանքը կլիներ 400-500 դոլար: Սա մեր ժողովրդի համար, մեր հասարակ քաղաքացու գրպանին ազդելո՞ւ էր, թե չէ: Մեր ժողովուրդն այսօր է դժվարությամբ վճարում: Եթե լիներ 400- 500 դոլար սահմանի վրա գազի գինը, ինչպե՞ս էիք բաժանելու: Եթե գազի տեղ գիտեք, նավթի տեղ գիտեք, ասեք իմանանք: Եթե մեզ չեք ասում, գոնե ժողովրդի համար ասեք: Չի կարելի պոպուլիզմով զբաղվել»:

Նա նաև կարևորեց այն հանգամանքը, որ Հայաստանը նավթամթերքը ներկրում է 30 տոկոս ազատված մաքսատուրքով. «Հիմա սա դրական է՞, թե՝ բացասական: Դրական է: Հաջորդը՝ շուրջ 720 առաջին անհրաժեշտության ապրանքներ 5 տարի չեն թանկանալու: Սա մեր ժողովրդի համար լավ է, բայց դուք սրա մասին չեք խոսում»:

Ինչ վերաբերում է անվտանգության հարցին, ԱԺ փոխխոսնակն ասաց, որ Ռուսաստանը Հայաստանին զենք և զինամթերք վաճառում է Ռուսաստանի ներքին գործարանային գներով. «Մի պետության համար, որի թիվ մեկ խնդիրն անվտանգության ապահովումն է, այլընտրանք կա՞: Եթե գիտեք մի պետություն, որը կարող է իր ներքին գործարանային գներով մեզ զենք ու զինամթերք տալ, ասեք: Չգիտեք, որովհետև չկա նման պետություն»:

Ինչ վերաբերում է ԱԺ պատգամավոր Ալեքսանդր Արզումանյանի այն դիտարկմանը, թե Հայաստանը ԵՏՄ-ին անդամակցելով կորցնում է ինքնիշխանությունը, Է. Շարմազանովն ասաց. «Մենք մեր ազատությունը, անկախությունը սրբորեն պահում ենք: Ասում եք մենք ինքնիշխանության կորուստ կունենանք: Այդ ՆԱՏՕ-ի անդամ բոլոր երկրներն ինքնիշխանության կորուստ ունե՞ն: Եվրամիության անդամ բոլոր պետություններն ինքնիշխանության կորուստ ունե՞ն: Դե ինձ հիմա մի պետություն ասեք, որ ինքնուրույն որոշում է կայացնում, չկա նման բան: Դա նոնսենս է»:

Մեկ այլ դիտարկման վերաբերյալ էլ, թե անդամակցելով ԵՏՄ-ին՝ Հայաստանը մեկուսանալու է, նա ասաց. «Մեզ համար 170 միլիոնանոց շուկա է բացվում: Չեմ հասկանում՝ ի՞նչ մեկուսացման մասին է խոսքը: Ավելին, եթե չգիտեք, ասեմ, որ Եվրամիության պաշտոնյաները, դեսպանները բացահայտ ասում են, որ իրենք պատրաստ են շարունակել Հայաստանի հետ համագործակցությունը: Այսինքն, մարդիկ մեր առաջ դռները չեն փակում, և այն զգացմունքային արտահայտությունները, որ կային սեպտեմբերի 3-ից հետո, տեսանք, որ այլևս չկան: Հայաստանը, գնալով Եվասիական տնտեսական միություն, չի հայտարարում` ես գնում եմ այստեղ և վետո եմ դնում Արևմուտքի և Եվրամիության վրա»:

Արցախին սպառնացող հնարավոր վտանգների մասին էլ հնչող հայտարարությունների վերաբերյալ Է. Շարմազազնովն ասաց. «Մեզանի՞ց եք Արցախը պաշտպանում: Արցախի իշխանությունները հազար անգամ ասել են, որ իրենք Եվրասիական տնտեսական միություն մտնելու հայտ չեն ներկայացրել: Մեր խնդիրն է Արցախի միջազգային ճանաչումը: Եվրասիական տնտեսական միությունը ոչ մի կապ չունի ոչ Արցախի սահմանների հետ, ոչ էլ Արցախի ճանաչման հետ: Մեր հասարակությանը թյուրիմացության մեջ մի գցեք»:

Ելույթի վերջում ԱԺ փոխխոսնակը նշեց. «Եվրասիական տնտեսական միությանն անդամակցելու որոշումը պայմանավորված է Հայաստանի անկախության, անվտանգության ամրապնդմամբ, ինչպես նաև Հայաստանի և Արցախի թե տնտեսական, թե քաղաքական հզորությամբ»: