Ձեր վստահելի աղբյուրը

«Շատ ավելի հեշտ է փորձել հարկային և մաքսային ծառայությունների լծակներով հսկել երեք հարյուր խոշոր ձեռնարկությունները, քան քառասուն-քառասունհինգ հազար փոքր և միջին ձեռնարկությունները: Ինչո՞ւ ունենալով մարտունակ հարկային և մաքսային ծառայություններ`իշխանությունները փոխանակ կենտրոնանան այդ երեք հարյուրի վրա, ընկել են ՓՄՁ-ների հետևից: Մի տարբերակն այն է, որ ոչ մի մարտունակ մաքսային կամ հարկային չունենք, և պետությունն անզոր է այդ խոշոր ձեռնարկատերերի դեմ: Խեղճ իշխանությունները ՓՄՁ-ների միջոցով փորձում են խոշորներին ստվերից հանել: Երկրորդ տարբերակը, ես ավելի շատ դրան եմ հավատում, այն է, որ իշխանություններն իրենք հենց մաս են կազմում այդ երեք հարյուր խոշոր ձեռնարկատերերին, և օգտագործում են իշխանական լծակները սեփական հարստացման նպատակով»,- հայտարարեց ՀԱԿ խմբակցության պատգամավոր Լևոն Զուրաբյանը` ԱԺ-ում շրջանառության հարկի մասին օրենքի փոփոխությունների շուրջ քննարկումների ժամանակ:

Ըստ նրա՝ Հայաստանում գոյություն ունի ծանրագույն կառավարման ճգնաժամ: Զուրաբյանը նշեց, որ միակ ելքը դեմոկրատական հեղափոխությունն է:

ԲՀԿ խմբակցության պատգամավոր Միքայել Մելքումյանը հայտարարեց, որ օրենքի հետաձգման հարցն ավելի շատ քաղաքական երևույթ է, և ոչ՝ բովանդակային: Նրա խոսքերով՝ նորմալ չէ ընդունել օրենքը և ի վիճակի չլինել այն կատարել:

Ըստ Մելքումյանի՝ ՀՆԱ-ի կշռում ամենամեծ ոլորտը առևտուրն է, բայց միևնույն ժամանակ այն ամենաստվերայինն է:

«Այսօր մենք պետք է լուրջ հակաճգնաժամային ծրագիր ունենայինք»,- ասաց պատգամավորը՝ նշելով ՌԴ կառավարության կողմից մշակած հակաճգնաժամային ծրագրի օրինակը:

Պատգամավորի խոսքերով՝ ՀՀ դրամի արժևորումը պետք է հենց հակաճգնաժամային ծրագրի շրջանակներում լինի: Մելքումյանը հայտարարեց, որ իրենց խմբակցությունը ձեռնպահ է քվեարկելու օրենքի հետաձգման հարցում:

Հանրապետական խմբակցության ղեկավար Վահրամ Բաղդասարյանը նշեց, որ երբ օրենքն ընդունվել էր, բոլորը կողմ էին արտահայտվել դրան: Բաղդասարյանի խոսքերով՝ որոշակի լռությունից հետո ակտիվ միտինգներ եղան:

«Կան խնդիրներ: Ես անձամբ հանդիպեցի քաղաքացիների հետ: Կան արդարացի պահանջներ»,- հայտարարեց Բաղդասարյանը: Նա նշեց, որ այդ խնդիրներն ուսումնասիրություն են պահանջում: Նա հավելեց, որ կառավարությունը և Հանրապետական խմբակցությունը շահագրգռված են, որ այս խնդիրը շուտափույթ լուծում ստանա: Բաղդասարյանի խոսքերով՝ կա վարչարարության խնդիր, անվստահության մթնոլորտ: Նա հույս հայտնեց, որ հնարավոր կլինի վերականգնել հավատը նրանց նկատմամբ: Բաղդասարյանի կարծիքով՝ բոլորի հետ պետք է հավասար լինել:

«Այստեղ հնչեց՝ ձուկը պետք է բռնել գլխից, թե պոչից արտահայտությունը: Բայց ես կասեմ՝ ձուկը պետք է բռնել ամբողջությամբ»,- հայտարարեց Բաղդասարյանը:

Նախորդող հրապարակումներ՝
«Պետք է անպայման քաղաքական «տանիքնե՞ր» փնտրեք». Ռուբիկ Հակոբյան
«Մեզ մոտ ռեֆորմների արդյունքում հարստանում են ռեֆորմ անողները». Արամ Մանուկյան
«ՓՄՁ-ներին դարձնում ենք քավության նոխազը». Հեղինե Բիշարյան
«Ասում են՝ ձուկը գլխից է հոտում, հիմա մենք խոսում ենք պոչի մասին». Հեղինե Բիշարյան