Ձեր վստահելի աղբյուրը

«Նախագահ Սերժ Սարգսյանի որոշումը՝ հայ-թուրքական արձանագրություններն Ազգային ժողովից  հետ կանչելու վերաբերյալ, ցույց է տալիս, որ Հայոց ցեղասպանության 100-րդ տարելիցի համահայկական հռչակագիրը լուրջ տեքստ է, պատրաստ են հռչակագրում նշված քայլերն իրականացնել»,- Panorama.am-ի հետ զրույցում նման դիտարկում արեց թուրքագետ Արտակ Շաքարյանը:

Հիշեցնենք, որ նախագահ Սերժ Սարգսյանը  նամակով դիմել է ՀՀ ԱԺ նախագահ Գալուստ Սահակյանին՝ տեղեկացնելով Հայաստան-Թուրքիա արձանագրությունները ՀՀ ԱԺ-ից հետ կանչելու վերաբերյալ իր որոշման մասին:

Ա. Շաքարյանի խոսքով, հայ-թուրքական արձանագրությունների հետ կանչը հռչակագրով իրականացված քայլերից ամենաառաջինն էր, որ պետք է արվեր՝ փաստելու այդ փաստաթղթի լրջությունը:

«Նախագահը բազմիցս ասել է, որ ողջամիտ ժամկետներն անվերջ չեն, և մենք համբերություն ունենք»,- ասաց թուրքագետը՝ հավելելով, որ ապրիլի 24-ի թուրքական ժխտողականության և մանիպուլյացիաներից առաջ շատ լավ քայլ է՝ ևս մեկ անգամ աշխարհին ցույց տալու հայ-թուրքական հարաբերությունների բացակայության և Հայոց ցեղասպանության փաստը:

Ինչ վերաբերում է արձագանքներին, Ա. Շաքարյանն ասաց, որ Թուրքիան կսկսի չարաշահել այս քայլը՝ ամբողջ աշխարհով հայտարարելու, որ Հայաստանը ևս մեկ անգամ մերժեց Թուրքիայի բաց ձեռքը, պրո-թուրքական ԶԼՄ-ները կսկսեն ավելի շատ արծարծել այս թեման, իսկ ողջամիտ մարդիկ, ովքեր լուրջ կերպով հետևում են գործընթացին, կփաստեն, որ վեց տարին, իրոք, ողջամիտ ժամկետ էր սպասելու համար:

2008թ. ՀՀ նախագահի նախաձեռնությամբ սկսվեց հայ-թուրքական հարաբերությունների կարգավորման նոր փուլ, որի արդյունքում 2009թ. հոկտեմբերի 10-ին Ցյուրիխում Հայաստանի և Թուրքիայի ԱԳ նախարարները ստորագրեցին «Հայաստանի Հանրապետության և Թուրքիայի Հանրապետության միջև դիվանագիտական հարաբերություններ հաստատելու մասին» և «Հայաստանի Հանրապետության եւ Թուրքիայի Հանրապետության միջեւ հարաբերությունների զարգացման մասին» Արձանագրություններ:
Արձանագրությունների ստորագրումից հետո Թուրքիան, կտրուկ փոխելով իր դիրքորոշումը եւ հրաժարվելով «խելամիտ ժամկետներում» և առանց նախապայմանների երկկողմ հարաբերությունները կարգավորելու ձեռք բերված համաձայնությունից, Թուրքիայի Ազգային Մեծ Ժողովում Արձանագրությունների վավերացումը պայմանավորեց ԼՂ-ի հիմնահարցի կարգավորմամբ:
2010թ. ապրիլի 22-ին, հաշվի առնելով թուրքական կողմի պատճառով ստեղծված իրավիճակը, ինչպես նաև արձագանքելով ՀՀ իշխող կոալիցիայի կուսակցությունների քաղաքական խորհուրդների համատեղ դիմումին, ՀՀ նախագահը հրամանագիր ստորագրեց Արձանագրությունների վավերացման գործընթացի կասեցման մասին

Հարակից հրապարակում``
Հռչակագրի հրապարակումը ենթադրում էր, որ արձանագրությունները ԱԺ-ից հետ կկանչվեն. Դեմոյան