Ձեր վստահելի աղբյուրը

ՀՀ Ազգային ժողովում այսօր տեղի ունեցավ Եվրամիության Արևելյան գործընկերության «Եվրանեսթ» խորհրդարանական վեհաժողովի չորրորդ լիագումար նիստի պաշտոնական բացումը:

Նիստի բացմանը ներկա էր ՀՀ նախագահ Սերժ Սարգսյանը:

Նիստի պաշտոնական բացմանը  ՀՀ ԱԺ նախագահ Գալուստ Սահակյանը նշեց, որ այս վեհաժողովը պետք է դիտարկել որպես Եվրամիության և Արևելյան գործընկերների միջև բազմակողմ համագործակցության ընդլայնման կարևոր հարթակ, այլ ոչ զուտ ԵՄ-ի հետ երկկողմ փոխգործակցության գործիք:

«Եվրանեսթը էական կշիռ է հաղորդում մեր միջազգային կապերի և խորհրդարանական դիվանագիտությանը՝ լրացուցիչ խթան հանդիսանալով խորհրդարանականների և մեր հասարակաությունների միջև շփումների ակտիվացման համար»,- ասաց Գ.Սահակյանը:

Արդյոք այս հարթակը կնպաստի մասնակից պետությունների միջև համագործակցության ընդլայնմանը, թե ոչ, դա, ըստ ԱԺ նախագահի, կախված կլինի այն հանգամանքից, թե ինչպես կօգտագործվեն վեհաժողովի առանձնաշնորհները:

«Կարևոր եմ համարում պահպանել համագործակցության ոգին և կենտրոնանալ ԵՄ-ի և մեզ համար ընդհանուր հետաքրքրություն ներկայացնող այնպիսի խնդիրների վրա, ինչպիսիք են միջանձնյա հասակարությունների միջև շփումների ընդլայնումը, ժողովրդավարության և օրենքի գերակայության ամրապնդումը, մարդու հիմնարարար իրավունքների և ազատությունների պաշտպանությունը, հանդուրժողական հասարակության ձևավորումը և ներդաշնակ համակեցությունը»,- ասաց Գ.Սահակյանը՝ հավելելով, որ դրանք պետք է լինեն քաղաքական օրակարգում, այլ ոչ թե այն հարցերը, որոնք կարող են դարձնել ոչ կառուցողական վիճաբանության ամբիոն:

ԱԺ նախագահը կոչ արեց պատասխանատվություն ցուցաբերել և առավելագույնը օգուտ քաղել այս վեհաժողովից:

«Վստահ եմ, որ այս վեհաժողովը իր կարևոր դերը կունենա Արևելյան գործընկերության նպատակների իրականացման և Եվրանեսթի գաղափարների կենսագործման հարցում»,-նշեց Գ.Սահակյանը: