Կապիտոլիումում Սերժ Սարգսյանին 1834 թվականի փորագրություն են նվիրել (լուսանկարներ)

Աշխարհում 15:14 11/04/2015

Կապիտոլիումում Սերժ Սարգսյանին 1834 թվականի փորագրություն են նվիրել (լուսանկարներ)

Իտալական մամուլը լայնորեն լուսաբանում է Հայաստանի նախագահ Սերժ Սարգսյանի պաշտոնական այցն այդ երկիր: Ինչպես արդեն տեղեկացրել ենք, նախօրեին հանրապետության ղեկավարը հանդիպում էր ունեցել Հռոմի քաղաքապետ Ինյացիո Մարինոյի հետ: «Il Quotidiano del Lazio» («Լացիոյի օրաթերթ») պարբերականն անդրադարձել է այս այցին, և տեղեկացրել, որ հանդիպումը կայացել է քաղաքապետի աշխատասենյակում, որտեղից տեսարան է բացվում Հռոմի ֆորումի վրա:

Պարբերականն անդրադարձել է Սերժ Սարգսյանի Իտալիա կատարած այցելությանը՝ նշելով, որ այն առնչվում է Օսմանյան կայսրությունում իարկանացված Հայոց ցեղասպանության տարելիցի կապակցությամբ Իտալիայում նախատեսված միջոցառումներին:

Թերթը տեղեկացնում է, որ Առաջին աշխարհամարտի տարիներին տեղի ունեցածը 20-րդ դարի առաջին ցեղասպանությունն է, որի հետևանքով միլիոնավոր մարդիկ են զոհվել:

«Հարկ է հիշել, որ հայերն աշխարհում առաջինն էին, որ քրիստոնեությունն ընդունեցին որպես պետական կրոն»,- գրել է պարբերականն ու հայերին անվանել «Արարատի մարդիկ»՝ նշելով, որ Աստվածաշունչը ջրհեղեղից հետո Արարատի վրա է մարդկությանը նոր կյանք տալիս:

«Լացիոյի օրաթեթրը», որն Իտալիայի մայրաքաղաք Հռոմն ընդգրկող վարչական միավորի՝ Լացիոյի առաջատար լրատվամիջոցն է, տեղեկացնում է նաև, որ կիրակի օրը Հռոմի Ֆրանցիսկոս պապը Հայոց ցեղասպանության զոհերի հիշատակին պատարագ կմատուցի, որին կմասնակցի նաև Սերժ Սարգսյանը: Թերթի տեղեկացմամբ՝ ցեղասպանությանը նվիրված միջոցառումներ տեղի կունենան Իտալիայի բազմաթիվ քաղաքներում:

Ինչ վերաբերում է Կապիտոլիումի՝ Հռոմի քաղաքապետարանում տեղի ունեցած հանդիպմանը, ապա թերթը տեղեկացնում է, որ նախագահ Սարգսյանը և քաղաքապետ Մարինոն քննարկել են Հայաստանի և Հռոմի միջև մշակութային կապերը ակտիվացնելու հնարավորությունները:

Ըստ աղբյուրի՝ հանդիպման վերջում տեղի է ունեցել նվերների փոխանակում. Սերժ Սարգսյանի Հռոմի քաղաքապետին է նվիրել ոլորազարդ՝ Երևանի հիմնադրման սեպագրի բովանդակությամբ: Իր հերթին Ինյացիո Մարինոն հայաստանի նախագահին է նվիրել 1834-ին թվագրվող մի նկար, որտեղ փորագրված է Կոլիզեումը:

Պարբերականը ներկայացրել է նաև լուսանկարներ:

Հռոմի քաղաքապետարանում կայացած հանդիպմանն անդրադարձել է նաև Notizie պարբերականը:

Նախորդող`
Նախագահ. Իտալացիների բարեհաճ վերաբերմունքի շնորհիվ հայերը պատմության ընթացքում մեծ հաջողությունների են հասել իտալական հողի վրա
Սուրբ Աթոռում ՀՀ դեսպան. Սուրբ Պետրոսի տաճարում այս պատարագն աննախադեպ է մի քանի առումով
Սերժ Սարգսյան. Հայերը Հռոմեական ժողովրդի բարեկամն են դեռևս Քրիստոսից առաջ (լուսանկարներ, տեսանյութ)

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: