Ձեր վստահելի աղբյուրը

Իտալական առաջատար Avveniere.it պարբերականն անդրադարձել է  ապրիլի 24-ին Միլանում տեղի ունեցած Հայոց ցեղասպանության զոհերի հիշատակի ոգեկոչման արարողությանը:

Պարբերականի փոխանցմամբ` զոհերի հիշատակի ոգեկոչման արարողության ժամանակ պատարագ է մատուցվել Կարդինալ Անջելո Սկոլայի կողմից, որին ներկա է եղել նաև Իտալիայում ՀՀ արտակարգ և լիազոր դեսպան Սարգիս Ղազարյանը:

«Թուրքական հասարակությունն ավելի բաց է և առաջադիմական, քան իր կառավարությունը, որը, ժխտելով Հայոց ցեղասպանությունը, ի ցույց է դնում իր իրական ինքնությունը: Ցեղասպանության ժամանակ եղել են բազմաթիվ հերոս, արդարակյաց թուրքեր, ովքեր վտանգելով իրենց կյանքն ու ազատությունը, փրկել են հայերին: Ես թուրք գործիչներին հրավիրել եմ Հայոց ցեղասպանությունը ժխտելու փոխարեն հիշելու այդ հերոսներին»,- դեսպան Սարգիս Ղազարյանի խոսքն է մեջբերում պարբերականը:

Անդրադառնալով Միլանում տեղի ունեցած ոգեկոչման արարողությանը` պարբերականը գրում է, որ իր խոսքում Կարդինալ Սկոլան նշել է, որ Ցեղասպանության փորձությունը, որն ապրել են հայերը, այսօր շարունակում է մարտահրավեր մնալ քրիստոնյաների համար: Կարդինալը Ցեղասպանությունների դեմ պայքարում և զոհերի հիշատակը հարգելու գործում կարևորել է եկեղեցական աշխարհի միասնությունը:

«Ցեղասպանության վերջին փուլը դա ժխտողականությունն է, բայց այսօր ձևավորվել է համընդհանուր մի ճակատ, որն այլևս երբեք է ասում Ցեղասպանությանը: Հայոց ցեղասպանությունը հարյուրամյակի առաջին Ցեղասպանությունն էր, հարյուրամյակ, որը դեռ չի ավարտվել: Այսօր Մերձավոր Արևելքում մենք ականատես ենք լինում Իսլամական պետության ցեղասպան գործողություններին, դժբախտաբար սա ցույց է տալիս, որ Ցեղասպանությունները ոչ թե մնացել են պատմության էջերում, այլ շարունակում են քաղաքական բնույթ կրել: Եվ եթե Ցեղասպանության վերջին փուլը հանդիսանում է ժխտողականությունը, ուրեմն մեր կոչն ուղղված է հիշողությանը, քանի որ այն, ինչ տեղի է ունեցել, չի կարող երբեք մոռացվել»,- պարբերականը մեջբերում է դեսպան Ղազարյանի խոսքը:

Պարբերականի փոխանցմամբ` դեսպան Ղազարյանը նկատել է, որ վերջին օրերին Հայոց ցեղասպանության շուրջ Հռոմի պապի, Եվրոպական խորհրդարանի, ԵՄ արտաքին քաղաքականության հարցերով բարձր ներկայացուցիչ Ֆեդերիկա Մոգերինիի հայտարարություններից հետո Թուրքիայի ղեկավարության արձագանքներն ի ցույց են դնում իրենց ժխտողական կեցվածքը:

«Այսօր Հայաստանի Հանրապետությունը և հայերի իմ սերունդները մի շարժման առաջամարտիկն են, որի նպատակն է կանխարգելել ցեղասպանությունները»,- նշել է Ս. Ղազարյանը:

Պարբերականի փոխանցմամբ` վերջինս նաև խոսել է հայ-թուրքական արձանագրություններից` նշելով, որ դրանց շուրջ բանակցային սեղան վերադառնալու և վավերացնելու առումով այժմ Թուրքիայի քայլ անելու հերթն է: