Ձեր վստահելի աղբյուրը

Զորակոչի ընթացքին և իրականացվող աշխատանքներին տեղում ծանոթանալու նպատակով այսօր ՀՀ պաշտպանության նախարար Սեյրան Օհանյանն այցելել էր ՊՆ Կենտրոնական հավաքակայան: Հավաքակայանում նախարարը զրուցեց զինակոչիկների հետ, հետաքրքրվեց նրանց առողջական վիճակով, այնուհետև հետևեց հավաքակայանում ընթացող վիճակահանությանը:

Սեյրան Օհանյանը վիճականությանը մասնակցող ծնողներին ասաց, որ ծառայության վայրի ընտրության վիճակահանության մեթոդը հնարավորություն է տալիս բացառելու կոռուպցիոն ռիսկերը և ապահովում է զորակոչի թափանցիկությունը: Նրա խոսքերով՝ կոռուպցիոն ռիսկերի նվազեցմանն ուղղված պայքարը պետք է շարունակական լինի: Բացի այդ, ըստ նրա, նաև ծնողների օգնությամբ է հնարավոր զրոյացնել կոռուպցիոն ռիսկերը:

Այնուհետև Ս.Օհանյանն դիմելով զինակոչիկներին և նրանց ծնողներին ասաց.
«Իմ պատգամն է զինակոչիկներին՝ լսել ծնողների ասածը, արագ մտնել զինվորական ծառայության մեջ և խելացի հրամանատարների խելացի ղեկավարմամբ տիրապետել հայրենյաց պաշտպանի մասնագիտությանը և լավ կերպով ծառայել հայրենիքին»:

Լրագրողների հետ զրույցում Ս.Օհանյանն ասաց, որ իր 3 պատգամները կատարելու դեպքում զինծառայողը գիտակցաբար կկատարի իր սահմանադրական պարտքը:

Ս.Օհանյանի խոսքերով՝ բանակի այսօրվա ղեկավարությունը, զինված ուժերի հրամանատարական կազմը, ինչպես նաև յուրաքանչյուր քաղաքացի քաջ գիտակցում է համապետական այս կարևոր միջոցառման պատշաճ մակարդակի և ազնիվ կերպով իրականացման անհրաժեշտությունը: Նախարարն ասաց, որ այս գործընթացը յուրաքանչյուր տարի բարելավում է, հետագայում էլ նոր մեթոդներ կներդնեն ավելի արդար այն անցկացնելու համար:

Ս.Օհանյանը նաև նշեց, որ այս զորակոչից գոհ է: «Այսօր չտեսա որևէ մի զորակոչիկի, որը չէր ցանկանում ծառայել, կամ գիտակցաբար չէր ներկայացել: Մենք տարեցտարի մեր բանակը դարձնում ենք մարդակենտրոն բանակ, որպեսզի մեր բոլոր քաղաքացիները հասկանան, որ յուրաքանչյուր անհատ, զինծառայող, ոչ թե բանակի հրամանատարական կազմի համար ռեսուրս է, այլ անհատականություն է, որից կախված է բանակի մարտունակությունը, և այդ անհատականությունը հնարավորություն ունի բանակում և՛ սովորելու, և՛ արագ տիրապետելու զինվորի մասնագիտությունը և նաև ապահովելու նրա զարգացումը»,- ասաց Ս.Օհանյանը:

Պաշտպանության նախարարը նաև հայտնեց, որ այս տարի նորակոչիկներին տանում են մշակութային օջախներ, նրանց հնարավորություն են տալիս Երևանում այցելելու Ծիծեռնակաբերդ, Մատենադարան, Պատմության թանգարան, իսկ մարզերում հնարավորություն են տալիս ծանոթանալ տվյալ մարզի պատմամշակութային արժեքներին, քանի որ դրանք հպարտության և պատասխանատվության զգացում են առաջացնում յուրաքանչյուր անհատի մոտ՝ իր հայրենիքի պաշտպանությունը ավել բարձր մակարդակի իրականացնելու համար:

Նախորդող`
Սեյրան Օհանյան. Սահմանային իրավիճակն այսօր վերահսկելի է
Հայաստան կներմուծվեն ավելի շատ պաշտպանողական և կանխարգելիչ բնույթի զինատեսակներ. Սեյրան Օհանյան