Ձեր վստահելի աղբյուրը

Սեպտեմբերի 13-ին հանրապետության 9 մարզերի` Արագածոտն, Արմավիր, Գեղարքունիք, Լոռի, Կոտայք, Շիրակ, Սյունիք, Վայոց Ձոր և Տավուշ, մի շարք համայնքներում կայանալիք տեղական ինքնակառավարման մարմինների ընտրություններում այս պահին առաջադրված թեկնածուները միայն Հանրապետական կուսակցությունից են: Այդ մասին Panorama.am-ը տեղեկանում է Կենտրոնական ընտրական հանձնաժողովից:

Այսպես, Արագածոտնի մարզի Ղազարավան գյուղում առաջադրվել է երկու թեկնածու, որոնցից մեկը Հանրապետական է` Հայկ Ասատրյան: Անկուսակցական թեկնածուն նույն գյուղի միջնակարգ դպրոցի տնտեսվար Արտակ Սարգսյանն է:

Արմավիրի մարզի Նոր Կեսարիա գյուղում նույնպես առաջադրվել են երկու թեկնածուներ երկուսն էլ Հանրապետականից, բայց նրանցից միայն մեկին է կուսակցությունն առաջադրել` համայնքի գործող ղեկավար Հրայր Գալստյանին: Մյուս Հանրապետականը Վասիլ Խաչատրյանն է:

Արմավիրի մարզի Տանձուտ գյուղում առաջադրվել է գործող գյուղապետ Մխիթար Պետրոսյանը, որին կսատարի հարազատ ՀՀԿ-ն: Մյուս թեկնածուն` Էդվարդ Անտոնյանը անկուսակցական է:

Գեղարքունիքի մարզի Գեղարքունիք գյուղում առաջադրված թեկնածուները 3-ն են` երկուսը ՀՀԿ-ական են` Մարատ Աղաջանյանը և Կարապետ Ասատրյանը: Վերջինը գործող գյուղապետն է, որին էլ հենց ՀՀԿ-ն առաջադրել է համայնքի ղեկավարի ընտրություններում: Երրորդ թեկնածուն Հայ. Յեղափոխական Դաշնակցություն կուսակցությունից է, Գեղարքունիքի մարզպետարանի աշխատակից Նորիկ Հովհաննիսյանը: Ընդ որում, դաշնակցական թեկնածուն ինքնաառաջադրվել է:

Գեղարքունիքի Լճափ գյուղում դարձյալ առաջադրվել է գործող Հանրապետական գյուղապետը` Հայկ Սիմոնյանը: Նրան կպաշտպանը ՀՀԿ-ն: Մյուս թեկնածուն անկուսակցական է` Կառլեն Հակոբյան:

Լոռու մարզի Անտառամուտ գյուղում գյուղապետի պաշտոնի համար առաջադրված թեկնածուները 2-ն են` ՀՀԿ-ական Արայիկ Գևորգյանը և անկուսակցական Սանդրո Գևորգյանը: Նրանցից ոչ մեկին որևէ կուսակցություն չի առաջադրել:

Նույն մարզի Եղեգնուտ գյուղում առաջադրվածները երկուսն են` ՀՀԿ-ից գործող գյուղապետ Միշա Հովհաննիսյանը և անկուսակցական Սուրեն Առաքելյանը:

Կոտայքի մարզի Մրգաշեն գյուղում ինքնառաջադրվել է գործող գյուղապետ ՀՀԿ-ական Արամայիս Արամյանը և անկուսակցական Ոսկան Գրիգորյանը:

Նույն մարզի Ողջաբերդ համայնքում ինքնառաջադրվել է գործող գյուղապետը` անկուսակցական Նորայր Մելքոնյանը:
Կոտայքի մարզի Ֆանտան գյուղում պատկերը նույնն է. առաջադրված երեք թեկնածուներից մեկը ՀՀԿ-ական է` Դավիթ Իվանդյանը, իսկ մյուս երկուսը, որոնց թվում է նաև գործող գյուղապետ Նորայր Կարապետյանը, անկուսակցական են: Երրորդ թեկնածուն անասնաբույժ է` Աշոտ Մարտիրոսյան:

Սեպտեմբերի 13-ին կայանալիք ՏԻՄ ընտրություններում քաղաքապետի ընտրություններ կկայանան Իջևանում և Մարալիկում: Այստեղ արդեն իսկ առաջադրվել են երկու թեկնածուներ` գործող քաղաքապետ ՀՀԿ-ական Արտակ Գևորգյանը, որին կսատարի հենց ՀՀԿ-ն, իսկ մյուսը անկուսակցական Տոնական Գևորգյանն է:

Իջևան քաղաքում առայժմ թեկնածու չի առաջադրվել, թեպետ հայտնի է, որ գործող քաղաքապետ նախկին ԲՀԿ-ական Վարդան Ղալումյանը պատրաստվում է դարձյալ պայքարել քաղաքապետի պաշտոնի համար:

Վայոց Ձորի մարզի Գողթանիկ համայնքում առայժմ մեկ թեկնածու է առաջադրվել` գործող գյուղապետ, ՀՀԿ-ական Համբարձում Մանվելյանը: Վերջինին կսատարի հարազատ կուսակցությունը:

Հարակից հրապարակում`

Առայժմ միայն ՀՀԿ-ն է հստակ որոշել մասնակցել սեպտեմբերյան ՏԻՄ ընտրություններին