Ձեր վստահելի աղբյուրը

Հավանականությունը զրոյական է, որ Եվրախորհրդի խորհրդարանական վեհաժողովի (ԵԽԽՎ) քաղաքական և ժողովրդավարական հարցերի հանձնաժողովի անդամ Ռոբերտ Ուոլթերը կփոխի իր ներկայացնելիք զեկույցի վերնագիրը` «Բռնության աճը Լեռնային Ղարաբաղում և Ադրբեջանի մյուս գրավյալ տարածքներում»: Այդ մասին Panorama.am-ի թղթակցի հետ զրույցում կարծիք հայտնեց ԼՂՀ նախագահի մամլո խոսնակ Դավիթ Բաբայանը:

Հիշեցնենք` 2014-ի հոկտեմբերի 1-ին Եվրոպայի խորհրդի խորհրդարանական վեհաժողովի քաղաքական կոմիտեն ղարաբաղյան խնդրի վերաբերյալ հարցով զեկուցող էր նշանակել բրիտանացի պատգամավոր Ռոբերտ Ուոլթերին, ով ԵԽԽՎ-ում հայտնի է իր պրոադրբեջանամետ կեցվածքով:

Ավելի վաղ հայտարարվել էր, որ Ուոլթերը Ադրբեջանի տարածքով այցելելու է նաև Լեռնային Ղարաբաղ: Բայց այդպես չեղավ:

«Նման բան չէր կարող տեղի ունենալ, դա պարզապես բացառված է: Նախևառաջ մենք իրեն ասել էինք, տեղյակ էինք պահել պաշտոնական Ստեփանակերտի կարծիքը, որ պետք է փոխել և՛ վերնագիրը, և՛ զեկույցի բովանդակությունը: Դա չի կատարել, հետևաբար սահմանը հատելը շահարկելը պարզապես անտեղի է», -հավելեց պարոն Բաբայանը:

Նրա խոսքով, Ուոլթերը բացեիբաց ցույց է տվել «իր պատկերը»` զեկույցի պատրաստման շրջանակներում այցելել է Ադրբեջան, պահպանելով զեկույցի վերնագիրը ու ստացել իր «չայեվոյները» նաև խավիարի տեսքով:

Ինչպե՞ս պետք է դրան արձագանքի հայկական դիվանագիտությունը, հարցին ի պատասխան Բաբայանը արձագանքեց, որ «հայկական դիվանագիտության անելու բան չկա» ու հավելեց.

«Սա հանցագործության նման մի բան է, կաշառակերության վրա է հիմնված այս զեկույցը, ի՞նչ անի մեր դիվանագիտությունը, ինչ պետք է արել ենք, այդ մարդը զեկույցի պատրաստման շրջանակներում չի եկել Հայաստան, Արցախ: Խնդիրն այն է, որ եվրոպական տարբեր կառույցներում ենք տեսնում նման վատ զարգացումներ, փաստորեն խավիարային դիվանագիտությունը բերում է խավիարային ժողովրդավարության կայացմանը Եվրոպայում, այսինքն` դասական ժողովրդավարության դեգրադացմանը: Որևէ մեկը չի իրականացնում հետաքննություն. դա է հիմնական խնդիրը և ոչ թե զեկույցը, որը սուբյեկտիվ է և ոչ մի նշանակություն չի ունենալու»:

Ինչ վերաբերում է զեկույցին, Բաբայանն ասաց, որ դա «գնված, պատվիրված զեկույց է, գրվել է Ադրբեջանում Ալիևի և Մամեդյարովի կողմից, ուղղակի Ուոլթերն իր ստորագրությունն է դնելու»:

Հարակից հրապարակում`
Ադրբեջանը պատանդ է վերցրել Եվրոպայի Խորհրդին. Նաիրա Զոհրաբյան