Ձեր վստահելի աղբյուրը

Արդյո՞ք Եվրոպական Դատարանը «Փերինչեքն ընդդեմ Շվեյցարիայի» վճռում ասել է, որ հայ ժողովրդի նկատմամբ 1915թ եւ դրանից հետո իրականացված կոտորածները ցեղասպանություն են եղել:

«Հրապարակված դատավճռում Դատարանը ընդգծել է, որ այս հարցին պատասխանելը չի եղել պարտադիր, եւ ոչ էլ Դատարանը ունեցել է լիազորություն, ինչպիսին, օրինակ, ունեն միջազգային քրեական դատարանները, իրավական առումով պարտադիր ուժ ունեցող հայտարարություններ անել այս հարցի առնչությամբ»: 

Այսպիսի պարզաբանում է հրապարակել Մարդու իրավունքների եվրոպական դատարանը այսօր, հոկտեմբերի 15-ին «Փերինչեքն ընդդեմ Շվեյցարիայի» գործով հրապարակված դատավճռի վերաբերյալ: 


Տեղեկատվական թերթիկում նաեւ ասվում է.
«Դատարանը պարտավոր չի եղել սահմանել, թե արդյոք ցեղասպանությունների կամ այլ պատմական փաստերի հերքման քրեականացումը, ըստ էության, կարող է արդարացված լինել, թե ոչ: Դատարանը միայն քննել է այն խնդիրը, թե արդյոք Շվեյցարական քրեական օրենսգրքի կիրառումը կոնկրետ այս գործի սահմաններում եղել է Եվրոպական կոնվենցիայի 10-րդ հոդվածի պահանջներին համահունչ»:

Հիշեցնենք, որ 2005 թվականի մայիս, հուլիս և սեպտեմբեր ամիսներին Շվեյցարիայի Լոզան, Օպֆիկոն և Կոնիզ քաղաքներում կազմակերպված միջոցառումների ընթացքում Դողու Փերինչեքը հրապարակայնորեն հերքել էր 1915թ. եւ հետագա տարիներին հայ ժողովրդի նկատմամբ Օսմանյան կայսրությունում տեղի ունեցած ցեղասպանության փաստը: Նա, մասնավորապես, հայկական ցեղասպանությունը որակել է որպես «միջազգային կեղծիք»:

«Փերինչեքի հայտարարությունների տոնայնությունը ցույց է տալիս, որ նրա մեղադրանքները ավելի շատ ուղղված էին Անգլիայի, Ֆրանցիայի եւ Ցարական Ռուսաստանի, ինչպես նաեւ Միացյալ Նահանգների եւ Եվրոպական Միության «իմպերիալիստների» վրա: Մյուս կողմից, չպետք է անուշադրության մատնել այն փաստը, որ իր հայտարարություններից մեկում դիմումատուն այդ իրադարձությունների մեջ ներգրավված հայերին անվանել է «իմպերիալիստական երկրների» «գործիքներ» եւ նրանց մեղադրել է թուրքերի եւ այլ մուսուլմանների զանգվածային սպանությունների մեջ: Այս դեպքում Դատարանը համաձայն է, որ միջամտությունը միտված է եղել պաշտպանելու (Ցեղասպանության զոհերի) արժանապատվությունը եւ այդպիսով նաեւ նրանց ժառանգների արժանապատվությունը», - եզրակացրել են ՄԻԵԴ Մեծ պալատի դատավորները հոկտեմբերի 15-ին հրապարակված դատավճռում: