Ձեր վստահելի աղբյուրը

Այսօր առավոտյան Հելսինկյան քաղաքացիական ասամբլեայի Վանաձորի գրասենյակի վրա մի խումբ մարդիկ հարձակում են գործել, ձվեր ու քարեր նետել: Այդ մասին Panorama.am-ին տեղեկացրեց գրասենյակի ղեկավար Արթուր Սաքունցը: «Այս պահին ոստիկանությունը տեղազննություն է կատարում», -փոխանցեց նա:

Նշենք, որ այսօր Վանաձորում պետք է կայանար Հայաստանում «Ստոպ» ադրբեջանական ֆիլմերի փառատոնը, սակայն այն, ինչպես ավելի վաղ հայտարարել էր փառատոնի կազմակերպիչ Վանյանը, հետաձգվել է: Գրասենյակի վրա հարձակում գործած մարդիկ փորձել են այդպիսով խոչընդոտել ֆիլմերի ցուցադրությանը:

«Եկել էին պահանջում էին, որ ֆիլմը չցուցադրվի, քարեր, ձվեր էին նետում գրասենյակի ուղղությամբ: Ի դեպ, ոստիկանները կանգնած նայում էին անկարգությունը և շուտով տեսանյութեր կտարածենք, թե ինչպես է ոստիկանությունը հասարակական կարգ պահպանում, -փոխանցեց Սաքունցը և հավելեց, - Կա ոչ պոպուլյար թեմա, որը կարող է հասարակությունը չկիսի: Բայց դեռևս մեր հասարակության մեջ այլ կարծիքի, այլ մոտեցման հանդեպ վերաբերմունքը դրսևորում են նման մեղմ ասած, ոչ պատշաճ ձևով»:

Հիշեցնենք, որ հասարակական ճնշման ներքո Գեորգի Վանյանի նախաձեռնած փառատոնը Գյումրիում չկայացավ, իսկ Վանյանն էլ ոստիկանության ուղեկցությամբ դուրս բերվեց քաղաքից:

Նախորդող հրապարակումներ՝
Քաղաքացիական հասարակության ճնշման արդյունքում Գյումրիում ադրբեջանական ֆիլմեր չեն ցուցադրվի. Վանյանը ներողություն խնդրեց

Մամլո խոսնակ. Վանյանը մի կերպ թողեց փախավ…դավաճան