Ձեր վստահելի աղբյուրը

Ազգային ժողովի պատգամավոր Նիկոլ Փաշինյանը նոր կառավարության ներկայացրած ծրագրում նկատել է մեծ թվով հնչեղ  խոսքեր, որոնց կշիռը, ըստ նրա, հասկանալու համար, պետք է հասկանալ, թե դրանք ինչ նշանակություն ունեն իշխող քաղաքական թիմի համար:

Կառավարության ծրագրի քննարկման ժամանակ վարչապետին հարց տալուց առաջ Փաշինյանը վկայակոչեց կառավարության բարձրաստիճան պաշտոնյաների մասնավորապես, հենց վարչապետի, փոխվարչապետի, ֆինանսների նախարարի, կառավարության աշխատակազմի ղեկավար-նախարարի հայտարարագրերը, որոնց համաձայն, նրանց եկամուտները աստղաբաշխական գումարներ են կազմում ու հետաքրքրվեց. «Դուք այս ողջ ընթացքում եղել եք բարձրաստիճան պաշտոնյաներ, եթե բիզնեսով չեք զբաղվել, ապա ինչպես եք աշխատել այդ գումարները, եթե պաշտոնավարմանը զուգահեռ զբաղվել եք բիզնեսով, ապա դա նույն նշանակության կոռուպցիա է: Ինչպե՞ս եք մեկնաբանում այս փաստը»:

Փաշինյանի հաջորդ հարցը վերաբերում էր կուտակային համակարգի վերաբերյալ վարչապետի հայտարարած «պարտադիր, բայց ոչ պարտադրված» բառախաղին: Փաշինյանն ասաց, որ ինքը Աղայանի բացատրական բառարանում նայել է «պարտադիր» բառի բացատրությունը և ասաց, որ այնտեղ «պարտադիր» բառի դիմաց գրված է` «պարտադրված»: «Դուք ասում եք պարտադիր բայց ոչ պարտադրված, բայց հայերենում այս նախադասությունը, կներեք, իմաստ չունի: Եթե պետք է հատուկ կոնդակով նոր իմաստ հաղորդեք այս բառին, խնդրում եմ, ասեք, բայց հայերենում պարտադիր նշանակում է պարտադրված», -հավելեց Փաշինյանը:

Հարցերին պատասխանելիս Հովիկ Աբրահամյանը նախ ասաց, թե շատ լավ է, որ պատգամավորը բառարան է ընթերցում, այնուհետև հավելեց. «Ես Ձեր օրինակը կընդօրինակեմ, և ես էլ կսկսեմ ընթերցել»:

Ասաց նաև, որ Փաշինյանի խոսքերը չեն հուսալքում իրեն. «Ես իմ գործն եմ անելու, ինչքան ուզում եք, խոսեք»: Այնուհետև կոչ արեց բոլորին «նեգատիվ չտրամադրվել» գործարարության նկատմամբ:

«Գործարարների շնորհիվ է, որ դուք այստեղ նստած եք, աշխատավարձ եք ստանում, գործարարների հարկերի շնորհիվ է, որ մենք թոշակ ենք բարձրացնում: Ընդհանրապես, որոշ մարդկանց մոտ ավանդույթ է ձևավորվել, որ գործարարներին փորձում են հանրությանը ներկայացնել բոբոներ: Գործարարների շնորհիվ եք դուք ապրում», -հայտարարեց վարչապետը ու բոլորին հորդորեց գործարարների նկատմամբ հարգանք ունենալ:

Իր ունեցվածքի մասին պատգամավորի հարցին էլ, վարչապետն ասաց, որ երբեք չի թաքցրել իր ունեցվածքը և հայտարարագրել է այն, ինչ ունի: Ասաց, որ նման ունեցվածք ձեռք է բերել աստիճանաբար, երբ սկզբում զբաղվել է հողագործությամբ:

«Երբ եղել եմ կառավարությունում, ԱԺ նախագահ ես երբեք այս ունեցվածքը չեմ վաստակել այդ տարիներին և ոչ էլ զբաղվել եմ կոռուպցիայով: Դա աշխատանքի արդյունքում է եղել», -հավելեց վարչապետը:

Արձագանքելով վարչապետին, Փաշինյանը զարմանք հայտնեց, թե ինչու է Աբրահամյանը իրենից պաշտպանում գործարարներին:

«Ես գործարարների անուն չեմ տվել, ես տվել եմ կառավարության անդամների անուններ և հենց դա էլ ուզում ենք հասկանալ. Դուք գործարա՞ր եք թե՞ կառավարության անդամ: Ասում եք հող ենք մշակել, այդ ոնց ա որ ամբողջ Հայաստանի գյուղացիությունը հող ա մշակում, տոկոսի տակ ա ընկնում, դուք հող եք մշակում, միլիոնավոր դոլարներ եք աշխատում: Ձևը ասեք, իրենք էլ աշխատեն», -նկատեց Փաշինյանը:

Ի պատասխան Աբրահամյանն ասաց, որ հող տան, Փաշինյանը չի կարող մշակել:

«Դուք մի ընտանիք չեք կարող պահել կյանքում, բացի քննադատելուց», -հավելեց վարչապետը:

Փաշինյան-Աբրահամյան բանավեճը ընդհատեց նիստը նախագահող ԱԺ նախագահ Գալուստ Սահակյանը և հարց տալու հերթը փոխանցեց հերթագրված մյուս պատգամավորին: