Ռոբերտ Ուոլտերն արդեն պատրաստել է ԼՂ վերաբերյալ զեկույցի նախագիծը
Նոյեմբերի 4-ին Փարիզում կայանալիք Եվրոպայի խորհրդի խորհրդարանական վեհաժողովի Քաղաքական հարցերի և ժողովրդավարության հարցերով հանձնաժողովի նիստի օրակարգում ընդգրկված է նաև Լեռնային Ղարաբաղի վերաբերյալ զեկույցը։ Ինչպես տեղեկանում ենք ԵԽԽՎ կայքից, նախատեսվում է, որ «Լեռնային Ղարաբաղում և Ադրբեջանի մյուս գրավյալ տարածքներում բռնությունների աճ» վերնագրված զեկույցի զեկուցող, բրիտանացի պատգամավոր Ռոբերտ Ուոլտերը ներկայացնելու է արդեն զեկույցի նախագիծը և տեղի է ունենալու զեկույցի քննարկում և քվեարկություն հանձնաժողովում։
Հիշեցնենք, որ 2014թ․-ի սեպտեմբերի 2-ին ԵԽԽՎ Բյուրոն որոշել էր Լեռնային Ղարաբաղի հակամարտության վերաբերյալ ադրբեջանական 2 բանաձևերի նախագծերն ուղարկել ԵԽԽՎ քաղաքական հարցերով հանձնաժողով, որն էլ պետք է պատրաստեր համատեղ զեկույց։
Զեկույցը վերնագրվել էր «Լեռնային Ղարաբաղում և Ադրբեջանի մյուս գրավյալ տարածքներում բռնությունների աճ»։ Հոկտեմբերի 1-ին ԵԽԽՎ քաղաքական կոմիտեն զեկուցող նշանակեց բրիտանացի պատգամավոր Ռոբերտ Ուոլթերին, ով հայտնի է ԵԽԽՎ-ում որպես ադրբեջանական խայտառակությունների պարտակող։
ԵԽԽՎ-ում ՀՀ պատվիրակությունը հայտարարել է, որ բոյկոտում է ԼՂ վերաբերյալ զեկույցի պատրաստման գործընթացը՝ նշելով, որ սա փորձ է Ադրբեջանի կողմից խանգարել Մինսկի խմբի գործընթացին։
Զեկույցի հաստատումից հետո՝ զեկուցող Ռոբերտ Ուոլտերը 2 անգամ փաստահավաք առաքելություն է կատարել Ադրբեջան։ Ուոլտերը չէր ցանկանում ուղղակի կապի մեջ մտնել Լեռնային Ղարաբաղի հետ և ձգտում էր շրջանցել ԼՂ իշխանություններին, սակայն սեպտեմբերի 22-ին՝ զեկույցի հաստատումից 1 տարի անց, վերջապես դիմել էր ԼՂ իշխանություններին՝ այնտեղ ևս փաստահավաք այցով լինելու համար։ ԼՂՀ-ն, սակայն մերժել էր Ռոբերտ Ուոլտերի դիմումը։ ԼՂՀ ԱԳ նախարարի տեղակալ Արմինե Ալեքսանյանը «Ազատություն» ռադիոկայանին ասել էր, որ զեկույցի վերնագիրն արտացոլում է հակամարտության միայն մեկ կողմի՝ Ադրբեջանի դիրքորոշումը, ինչը կանխորոշում է զեկույցի բովանդակությունը և եզրակացությունները։
Նման բարդ խնդրի վերաբերյալ հապճեպ զեկույցի նախագիծ ներկայացնելու համար զեկուցող Ուոլտերն ունի պատճառները․ նոյեմբերի 7-ին լրանում է ԵԽԽՎ-ում պարոն Ուոլտերի մադատի ժամկետը և նա ցանկանում է գոնե իրենից հետո թողնել իր ժառանգությունը և նաև արդարանալ զեկույցի «նախաձեռնողների» մոտ, որ կատարել է իր հանձնարարությունը։
Ինչպես Panorama-ին ասել էր ԵԽԽՎ-ում ՀՀ պատվիրակության ղեկավար Հերմինե Նաղդալյանը, իրենց խորին համոզմամբ, այդ զեկույցը վաղուց արդեն պատրաստ է և պատվիրատուներն իրենք էլ հենց պատրաստել են այն, որի տակ միայն կդրվի պարոն Ուոլտերի ստորագրությունն ու կներկայացվի։
Նշենք նաև, որ ԵԽԽՎ-ում Ղարաբաղի հարցին անդրադարձող բոլոր զեկուցողները եղել են բրիտանացիները՝ Թերի Դևիսը, Դևիդ Էտկինսոնը, այժմ էլ Ռոբերտ Ուոլթերը։
Աննա Մկրտչյան
Նախորդիվ՝
ԵԽԽՎ հերթական ամոթը. Ադրբեջանական լոբբիստը նշանակվեց ԼՂ զեկուցող
ԵԽԽՎ-ում Լեռնային Ղարաբաղի հարցով զեկուցող բրիտանացին Թուրքիայի քաղաքացիություն է ստացել
ԵԽԽՎ զեկուցողն այցելում է շփման գիծ՝ Ադրբեջանի կողմից
Հերմինե Նաղդալյան. ԼՂ հարցով ԵԽԽՎ զեկուցողը ձգտում էր շրջանցել ԼՂ իշխանություններին
Բացառիկ. ՀՀ պատվիրակությունը բոյկոտում է ԵԽԽՎ-ում ԼՂ զեկույցի պատրաստման գործընթացը
Ուոլթերը պահպանել է զեկույցի վերնագիրը ու ստացել իր «չայեվոյները». Դավիթ Բաբայան
Լրահոս
Տեսանյութեր
Թալանում ու թալանում են , խաբելով, ստով ո՞ւմ փորն է կշտանում. Քաղաքացիները՝ թանկացումների մասին
