Ձեր վստահելի աղբյուրը

«Նույնիսկ Ադրբեջան պետության անունը չի պատկանում ադրբեջանցիներին»,-այդ մասին իրանական «Ազարիհա.օրգ» կայքի հաղորդմամբ՝ հայտարարել է իրանցի պատմաբան Սեյյեդ Ջավադ Թաբաթաբային:

Հիշեցնենք, որ վերջերս Բաքվում լույս է տեսել Ադրբեջանի նախագահի աշխատակազմի ղեկավար Ռամիզ Մեհդիևի հեղինակած «Նադիր շահ Աֆշար, դիվանագիտական զրույցներ» վերնագրով գիրքը, որտեղ փորձ է արվում Նադիր շահ Աֆշարին ներկայացնել որպես ոչ իրանցի շահ:

Իրանցի պատմաբանը, քննադատելով Բաքվի կողմից իրանական պատմությունը կեղծելու գործընթացը, մասնավորապես նշել է. «Որոշ երկրներ ստեղծվել են շատ կարճ ժամանակահատված առաջ, նրանք նույնիսկ պատմություն չունեն, սակայն ցավոք յուրացրել են իրանական մշակույթն ու պատմությունը: Օրինակ Ադրբեջանը, այդ երկրի անունը նույնիսկ իրենց (ադրբեջանցիներին) չի պատկանում: ԽՍՀՄ-ի փլուզումից հետո ընդամենը 20 տարի է անցել, որ ստեղծվել է Ադրբեջանական Հանրապետությունը, սակայն քարոզչության մեջ այդ երկիրը ներկայացվում է որպես հին ատրուշանների երկիր»:

Հավելենք, որ օրերս Թավրիզի համալսարանի Ադրբեջանագիտության կենտրոնի ղեկավար, դոկտոր Ահմադ Ֆարշբաֆիանն էլ հետևյալ կերպ էր արձագանքել Ադրբեջանի զեղծարարություններին. «Ադրբեջանում պատմաբանների մի խումբ կա, որն ամբողջովին քաղաքականացված է: Երբ ուսումնասիրում ենք Ադրբեջանի նախագահի աշխատակազմի ղեկավար Ռամիզ Մեհդիևի անցած ուղին, ապա նրա կողմից իրականացված քայլերն ամենևին էլ զարմանք չեն հարուցում, քանի որ, վերջինս, լինելով Ադրբեջանի նախագահի աշխատակազմի ղեկավար և ազգային անվտանգության խորհրդի քարտուղար, ինքնության կերտման նպատակ ունի, ուստի սրանից ավել բան Մեհդիևից պետք չէր սպասել»:

Թեմային առնչվող մեկնաբանություն՝
Իրանն արդեն գիտակցում է, որ պետք չէ հանդուրժել Բաքվի՝ իրանական պատմությունն ադրբեջանականացնելու քաղաքականությունը