Կարճ լուրեր
Հարավկորեական BTS խումբը ապրիլին կվերադառնա Միացյալ Նահանգներ՝ Լաս Վեգասում մի շարք համերգներով ներկայանալու: Տեղեկությունը չորեքշաբթի հայտնել է նրանց գործակալությունը: Կորոնավիրուսի համավարակի պատճառով ընդհատված «Permission to Dance on Stage» շրջագայության համերգները տեղի կունենան ապրիլի 8-9-ը և ապրիլի 15-16-ը, իսկ վերջին շոուն կհեռարձակվի ուղիղ եթերով, հայտնում է Bit Hit Music-ը:
Աղբյուր՝ reuters.com
Չինաստանը չի աջակցում Ռուսաստանի դեմ պատժամիջոցների սահմանմանը՝ Ուկրաինայի շուրջ ստեղծված իրավիճակի հետ կապված, և կարծում է, որ միայն երկխոսությունը կարող է օգնել կարգավորել իրավիճակը: Տեղեկությունը հաղորդում է չինական CGTN հեռուստաալիքը՝ վկայակոչելով Չինաստանի ԱԳՆ խոսնակ Հուա Չունյինգին:
Աղբյուր՝ interfax.ru
Գեմանացի թենիսիստ Ալեքսանդր Զվերևին դուրս են թողել Mexican Open-ի մրցաշարից՝ «ոչ սպորտային պահվածքի» համար. զուգախաղում կրած պարտությունից հետո նա իր ռակետով մի քանի անգամ հարվածել էր մրցավարի աթոռին: Լլոյդ Գլասփուլին և Հարի Հելիովարային խաղընկեր Մարսելո Մելոյի հետ պարտվելուց հետո Զվերևը մոտեցել է մրցավարի աթոռին և երեք անգամ հարվածել դրան:
Աղբյուր՝ cnn.com
Բրազիլիայի Պետրոպոլիս քաղաքում տեղի ունեցած հեղեղումների և սողանքների հետևանքով զոհերի թիվը հասել է 186-ի: Այս մասին հայտնում են իշխանությունները՝ զբոսաշրջային քաղաքում տեղատարափ անձրևներից մեկ շաբաթ անց: Անհետ կորածների թիվը այս պահին 69-ն է:
Աղբյուր՝ aljazeera.com
Չորեքշաբթի Բուլղարիայի մայրաքաղաքում՝ կառավարության շենքի մոտ, «Վերածնունդ» քաղաքական կուսակցության կողմից կազմակերպված զանգվածային բողոքի ցույց է անցկացվել, այնուհետև այն շարժվել է դեպի Ազգային ժողով: Բողոքի ակցիային մասնակցում է մի քանի հարյուր մարդ, ովքեր Սոֆիա են ժամանել երկրի տարբեր քաղաքներից ավտոբուսներով. քաղաքի կենտրոնը հսկում են ոստիկանության և ժանդարմերիայի ուժեղացված ջոկատները, իսկ կառավարական շենքերը շրջափակված են: Մյուս պահանջները վերաբերում են աղքատության և էներգետիկ ճգնաժամի դեմ պայքարին:
Աղբյուր՝ tass.ru
Մեծ Բրիտանիայի արտաքին գործերի նախարար Լիզ Թրասը պատասխանել է այն հարցին, թե արդյոք անգլիական ակումբները պետք է բոյկոտեն Չեմպիոնների լիգայի 2021/22 մրցաշրջանի Սանկտ Պետերբուրգում կայանալիք եզրափակիչը՝ քաղաքական դրդապատճառներով: «Այո: Նրանց փոխարեն ես կբոյկոտեի Ռուսաստանում կայանալիք եզրափակիչը։ Անձամբ ես չէի ցանկանա մասնակցել Սանկտ Պետերբուրգում կայանալիք ֆուտբոլային հանդիպմանը՝ հաշվի առնելով այն, ինչ անում է Պուտինի ռեժիմը»,- նախարարի խոսքերը մեջբերում է Daily Mail-ը:
Աղբյուր՝ gazeta.ru
Իսրայելը մի քանի հրթիռ է արձակել Սիրիայի սահմանամերձ Ալ-Կունեյտրա նահանգի ուղղությամբ՝ պատճառելով «նյութական վնաս»: Սիրիական բանակի հայտարարությունում այլ մանրամասներ չեն հաղորդվում չորեքշաբթի վաղ առավոտյան գնդակոծության ենթարկված դիրքերի մասին:
Աղբյուր՝ aljazeera.com
Ռուսական ծագումով խարդախ Աննա Սորոկինայի մասին Netflix-ի ««Հորինելով Աննային» սերիալը դիտումներով դարձել է ծառայության առաջատարը: Ըստ Deadline-ի՝ Փետրվարի 14-20-ը շոուն հավաքել է 196 միլիոն ժամ դիտում: Փետրվարի 11-ի պրեմիերայից հետո ունեցած 77 միլիոն ժամ դիտումների հետ՝ սերիալի ընդհանուր դիտումները այժմ հասել են 273 միլիոն ժամի:
Աղբյուր՝ kulturomania.ru
Չորեքշաբթի մեկ մարդու մահացած են գտել ջրի տակ մնացած մեքենայում, ևս 10-ը անհետ կորել են այն բանից հետո, երբ հորդառատ անձրևը հեղեղումներ է առաջացրել արևելյան Ավստրալիայում, մի շարք արտակարգ նախազգուշացումներ կատարվել Խաղաղ օվկիանոսի ափի ամբողջ երկայնքով: Խեղդված 60-ամյա քաղաքացու մարմինը հայտնաբերվել է Քվինսլենդ նահանգում: Վերջին 24 ժամվա ընթացքում նահանգի որոշ շրջաններում տեղացել է գրեթե կես մետր անձրև, ինչը հանգեցրել է բազմաթիվ ճանապարհների փակման և երթևեկության քաոսի:
Աղբյուր՝ france24.com
Ուկրաինայի նախագահ Վլադիմիր Զելենսկին հայտարարել է, որ այսօր համընդհանուր մոբիլիզացիայի կարիք չկա, անհրաժեշտ է լրահամալրել բանակը, ինչպես նաև հայտարարել է պահեստազորի զորահավաք: Նրա խոսքով՝ «մոտ ժամանակներս կանցկացվեն պաշտպանական համակարգի պահեստազորայինների ուսումնամարզական հավաքներ»:
Աղբյուր՝ ria.ru
Կինոակադեմիան որոշել է բացառել ութ մրցանակների հանձնումը մարտի 27-ին կայանալիք 94-րդ Օսկարի հեռուստատեսային հեռարձակումից՝ ցածր վարկանիշի պատճառով: Ուղիղ եթերում չի ցուցադրվի «Լավագույն վավերագրական կարճամետրաժ ֆիլմ», «Լավագույն մոնտաժ», «Լավագույն դիմահարդարում», «Լավագույն սաունդթրեք», «Լավագույն հանդերձանքի դիզայն», «Լավագույն անիմացիոն կարճամետրաժ ֆիլմ», «Լավագույն գեղարվեստական կարճամետրաժ ֆիլմ» և «Լավագույն հնչունավորում» անվանակարգերում:
Աղբյուր՝ hollywoodreporter.com
Անցած օրվա ընթացքում ԴԺՀ-ում 65 հրետակոծություն է գրանցվել: Այս մասին չորեքշաբթի լրագրողներին հայտնել է Դոնեցկի Ժողովրդական Հանրապետության ժողովրդական միլիցիայի ներկայացուցիչ Էդուարդ Բասուրինը: Նա հավելել է, որ վերջին մեկ օրվա ընթացքում տեղի ունեցած ռազմական գործողությունների արդյունքում զոհվել է երեք խաղաղ բնակիչ, վիրավորվել է ԴԺՀ-ի չորս զինծառայող:
Աղբյուր՝ interfax.ru
Երեքշաբթի հորդանանցի և ֆրանսիացի հնագետների խումբը հայտնել է, որ Հորդանանի արևելյան անապատում գտնվող հեռավոր նեոլիթյան հնավավայրում հայտնաբերել է մոտ 9000 տարվա հնություն: Ծիսական համալիրը գտել են մեծ կառույցների կողքին՝ հայտնի որպես «անապատի օդապարիկներ» կամ զանգվածային թակարդներ, որոնք, ենթադրաբար, օգտագործվել են վայրի գազելներին մորթելու համար: Նման թակարդները բաղկացած են երկու կամ ավելի երկար քարե պատերից, որոնք միանում են ներդիրին. դրանք շատ են հանդիպում Մերձավոր Արևելքի անապատներում:
Աղբյուր՝ apnews.com
Սադիկ Խանը հայտարարել է, որ քաղաքը պատրաստ է ընդունել Չեմպիոնների լիգայի 2021/2022 մրցաշրջանի եզրափակիչը, եթե ՈւԵՖԱ-ն որոշի խաղը տեղափոխել Սանկտ Պետերբուրգից: Եվրոպայի ամենահեղինակավոր ակումբային մրցաշարի վճռորոշ հանդիպումը պետք է կայանա «Գազպրոմ Արենայում» մայիսի 28-ին: Ավելի վաղ բրիտանական մի քանի հրապարակումներ տեղեկություն էին հրապարակել, որ Ռուսաստանը կարող է զրկվել Չեմպիոնների լիգայի եզրափակիչն անցկացնելու իրավունքից:
Աղբյուր՝ gazeta.ru
Իրանի միջուկային ծրագիրը զսպելու և պատժամիջոցների թուլացման վերաբերյալ գործարքը վերականգնելու շուրջ բանակցությունները մոտենում են ավարտին: Այս մասին երեքշաբթի հայտնել է ռուս բանագնացը, իսկ բանակցություններին մոտ կանգնած աղբյուրները հայտնում են, որ շուտով սպասվում է բանտարկյալների փոխանակում Իրանի և Միացյալ Նահանգների միջև: «Ակնհայտ է, որ #JCPOA-ի վերականգնման շուրջ բանակցությունները մոտենում են ավարտին», - Twitter-ում գրել է Միխայիլ Ուլյանովը՝ օգտագործելով 2015 թվականի համաձայնագրի ամբողջական անվանումը՝ Գործողությունների համատեղ համապարփակ ծրագիր:
Աղբյուր՝ reuters.com
Ուկրաինան «Եվրատեսիլ 2022»-ին կներկայացնի «Kalush Orchestra» խումբը, որը մրցույթի ազգային ընտրության ժամանակ զբաղեցրել էր երկրորդ տեղը: Այս մասին երաժիշտները հայտնել են Instagram-ում։ «Խոստանում ենք, որ ձեզ հուսախափ չենք անի», - հայտարարել են խմբի անդամները: Ավելի վաղ Ուկրաինայում սկանդալ էր բարձրացել Եվրատեսիլի ազգային ընտրության Ընթացքում: Մրցույթի հաղթող երգչուհի Ալինա Պաշին մեղադրել էին ռուսական Ղրիմ այցելելու, ինչպես նաև սահմանը հատելու կեղծ վկայական ներկայացնելու մեջ, որից հետո արտիստը հրաժարվել էր մասնակցել մրցույթին:
Աղբյուր՝ kulturomania.ru
Բրունո Ֆերնանդեսն ասել է, որ «Մանչեսթեր Յունայթեդը» ժամանակավոր մարզիչ Ռալֆ Ռագնիկի օրոք «ավելի շատ անհատականություն» ունի:Այժմ նրանք պատրաստվում են երեք տարվա ընթացքում Չեմպիոնների լիգայի իրենց առաջին փլեյ-օֆֆին: Ռանգնիկը նշանակվել է անգլիական գրանդի մարզիչ մինչև ընթացիկ մրցաշարի ավարտը այն բանից հետո, երբ նոյեմբերին «Յունայթեդի» նախկին հարձակվող Օլե Գուննար Սուլշերը հեռացվեց մարզչի պաշտոնից:
Աղբյուր՝ france24.com
Օլիմպիական խաղերի բրոնզե մեդալակիր, Ռուսաստանը ներկայացնող, ազգությամբ եզդի բռնցքամարտիկ Միխայիլ Ալոյանը մինչև 52,16 կգ քաշային կարգում նվաճել է Բռնցքամարտի համաշխարհային ասոցիացիայի (WBA) ոսկե գոտին: Մոսկվայում կայացած՝ իր կարիերայի եզրափակիչ մենամարտում նա մրցավարների որոշմամբ հաղթել է վենեսուելացի Դավիդ Բարետոյին: Ավելի վաղ Ալոյանը հայտարարել էր, որ Բարետոյի դեմ մենամարտը վերջինն է լինելու իր կարիերայում։ Ընդհանուր առմամբ, 33-ամյա բռնցքամարտիկը ունի ութ հաղթանակ (մեկը նոկաուտով) և մեկ պարտություն:
Աղբյուր՝ tass.ru
Լրահոս
Տեսանյութեր
Թշնամnւ հրահանգները մեր կյանք տեղափոխողները Հայաստանի թշնամիներն են. Բագրատ Սրբազան
