Ձեր վստահելի աղբյուրը

Մոսկվայում կինը մահացել է տանիքից իր վրա սառույցի ընկնելու պատճառով: Հարուցվել է քրեական գործ՝ անզգուշությամբ մահ պատճառելու դեպքի առթիվ: Այս մասին լրագրողներին հայտնել է ՌԴ Քննչական կոմիտեի մայրաքաղաքային բաժնի ղեկավարի ավագ օգնական Յուլիա Իվանովան: Քննության տվյալներով՝ փետրվարի 18-ին 13-րդ Պարկովայա փողոցում գտնվող բնակելի շենքի տանիքից սառցաշերտ է ընկել 1963 թվականին ծնված կնոջ վրա, որը ստացած վնասվածքներից տեղում մահացել է:

Աղբյուր՝ ria.ru

Երկրի իշխանությունները հայտնել են, որ ուրբաթ վաղ առավոտյան հրդեհ է բռնկվել Հոնիական ծովով ընթացող Իտալիայի դրոշով լաստանավում, որի հետևանքով մոտ 300 մարդուց երեքը վնասվածքներ են ստացել: Հունաստանի առափնյա պահպանության ծառայությունից հայտնել են, որ երկու մարդ դեռ արգելափակված են եղել նավի վրա և զանգահարել են օգնություն կանչելու. նրանց վերցնելու է մեկնել Super Puma ուղղաթիռը: Իգումենիցա նավահանգստային քաղաքից Իտալիա ուղևորվող Euroferry Olympia-ի վրա հրդեհը բռնկվել է ժամը 04:30-ին:

Աղբյուր՝ france24.com

ԱՄՆ նախկին նախագահ Դոնալդ Թրամփը իր նախաձեռնությամբ ստեղծված TRUTH Social սոցիալական ցանցում հրապարակել է առաջին հաղորդագրությունը: Այս մասին ուրբաթ Twitter-ի իր էջում հայտնել է ամերիկյան վարչակազմի նախկին ղեկավար որդին՝ Դոնալդ Թրամփ կրտսերը: Ակնկալվում է, որ հարթակը կգործարկվի փետրվարի 21-ին:

Աղբյուր՝ tass.ru

Գիրք նվիրելու օրը` փետրվարի 19-ին՝ ժամը 16:00-ին, Ավետիք Իսահակյանի տուն-թանգարանը նշանավոր հոբելյանը կարժևորի երկու մեծ գրողների Ավ. Իսահակյանի և Եղ. Չարենցի բարեկամության մասին պատմող հուշերի, դրվագների բեմականացմամբ, որին կմասնակցեն Հենրիկ Մալյանի անվան թատրոնի երիտասարդ արտիստները դերասանուհի Սոֆիկ Սարգսյանի ղեկավարությամբ: Օրվա խորհուրդը կամփոփվի նախօրոք հայտարարված գրքահավաքի արարողությամբ: Հավաքված գրքերը կնվիրաբերվեն զորամասերի և «Հայ եկեղեցու համաշխարհային երիտասարդական միության» կենտրոնի գրադարաններին:

Աղբյուր՝ ՀՀ ԿԳՄՍ նախարարության հասարակայնության հետ կապերի և տեղեկատվության վարչություն

Դաֆեր եղբայրների «Տարօրինակ դեպքեր» գիտաֆանտաստիկ սերիալը կբաժանվի երկու մասի: Առաջինը կթողարկվի մայիսի 27-ին, երկրորդը՝ հուլիսի 1-ին: Այդ մասին Netflix-ը գրել է Twitter-ում: Սթրիմինգային ծառայության հայտարարությունը հայտնվել է «Ամեն վերջ ունի սկիզբ» վերնագրով: Բանն այն է, որ սերիալն արդեն երկարեցվել է հինգերորդ սեզոնով, և այն կլինի վերջինը:

Աղբյուր՝ daily.afisha.ru

Այս շաբաթ 24-ամյա մոդել Սոֆյա Ժիրաուն դարձել է Դաունի համախտանիշով առաջին մարդը, ով հայտնվել է Victoria's Secret-ի գովազդային արշավում: Պուերտոռիկացի մոդելը հայտնվել է 17 այլ կանանց կողքին՝ գովազդելու շուրջօրյա հարմարավետության Love Cloud հավաքածուն, որով բրենդը հույս ունի «ուժեղացնել Victoria's Secret-ի հանձնառությունը՝ խրախուսելու և հայտնի դարձնելու բոլոր կանանց»:

Աղբյուր՝ cnn.com

Ազորյան կղզիների (Պորտուգալիայի ինքնավար մարզ) մոտակայքում հրդեհվել է Felicity Ace բեռնանավը: Դեպքը տեղի է ունեցել փետրվարի 17-ին: Նավի վրա եղել է անձնակազմի 22 անդամ և 3965 շքեղ մեքենա, այդ թվում՝ Porsche, Audi և Lamborghini ապրանքանիշերի: Մարդկանց նավից տարհանել են պորտուգալացի զինվորական նավաստիները և ռազմածովային ավիացիան: Պորտուգալական առափնյա պարեկությունը հայտնել է, որ փետրվարի 18-ի դրությամբ մոտ 200 մետր երկարությամբ նավը շարունակում է այրվել:

Աղբյուր՝ lenta.ru

Գազայի հատվածի հյուսիսում գտնվող ափամերձ գոտում հայտնաբերվել է 2000 տարվա հնության հռոմեական գերեզմանատուն, որտեղ եղել են առնվազն 20 զարդարված գերեզմաններ: Հնությունների նախարարությունն այն անվանել է վերջին տասնամյակի ամենակարևոր տեղական հայտնաբերումը: Գազան հարուստ է հնություններով և կարևոր առևտրային վայր է եղել բազմաթիվ քաղաքակրթությունների համար՝ սկսած հին եգիպտացիներից և փղշտացիներից, մինչև Հռոմեական կայսրությունը և խաչակրաց արշավանքները:

Աղբյուր՝ reuters.com

Մեծ Բրիտանիայի օդերևութաբանական ծառայությունը երկրորդ հազվադեպ կարմիր նախազգուշացումն է հայտարարել Լոնդոնում, Անգլիայի հարավ-արևելքում և արևելքում: Հարյուրավոր դպրոցներ փակվել են, Ուելսում դադարեցվել են բոլոր գնացքները, իսկ զինվորականները բերվել են մարտական պատրաստվածության: Օդերևութաբանները նախազգուշացնում են, որ «Յունիսը» ուրբաթ կարող է մինչև 90 մղոն/ժ արագությամբ քամու պոռթկումներ հասցնել՝ առաջացնելով զգալի խափանումներ և էլեկտրաէներգիայի անջատումներ:

Աղբյուր՝ bbc.com

2020 թվականի սեպտեմբերի 27-ին սանձազերծված ռազմական գործողությունների
հանգամանքների ուսումնասիրման նպատակով ստեղծված քննիչ հանձնաժողովը
փետրվարի 21-ին` ժամը 12:00-ին, 330 դահլիճում կազմակերպում է աշխատանքային քննարկում:

Աղբյուր՝ ՀՀ ԱԺ հասարակայնության հետ կապերի և հաղորդակցության վարչություն

ՄԱԿ-ի շրջակա միջավայրի ծրագրի (UNEP) մասնագետները նշել են մարդկության համար հիմնական սպառնալիքները: Հիմնական սպառնալիքներից են համարվում լայնածավալ անտառային հրդեհները և աղմուկի «աղտոտումը»: Մասնագետներն այս երևույթները դասում են բնության ու մարդու առողջության վրա էական բացասական ազդեցություն ունեցողների շարքին: Փորձագետները էկոհամակարգերի ապասինխրոնիզացիան ևս որպես սպառնացող երևույթ են ճանաչել:

Աղբյուր՝ ria.ru

Եվս 11 անձի նկատմամբ ցմահ բանտարկություն է սահմանվել 2008 թվականին արևմտյան Ահմեդաբադ քաղաքում տեղի ունեցած մի շարք պայթյունների համար, որոնց զոհ են գնացել տասնյակ մարդիկ: Փետրվարի 8-ին դատարանը 49 մարդու մեղավոր է ճանաչել Գուջարաթ նահանգի առևտրային կենտրոնի շուկաներում, ավտոբուսներում և այլ հասարակական վայրերում համակարգված հարձակումների համար, որոնց հետևանքով զոհվել է 56 մարդ, վիրավորվել՝ 200-ը:

Աղբյուր՝ aljazeera.com

ՌԴ ժողովրդական արտիստ, կինոդերասան Գենադի Յուխտինը, ով ավելի վաղ կորոնավիրուսով հոսպիտալացվել էր մայրաքաղաքի հիվանդանոցներից մեկում, մահացել է 89 տարեկան հասակում: Այս մասին ՏԱՍՍ-ին հայտնել են ՌԴ կինեմատոգրաֆիստների միությունում: Դերասանը առավել հայտնի է դարձել «Օտար հարազատներ» (1955թ.), «Գարունը Զարեչնայա փողոցում» (1956թ.), «Բալլադ զինվորի մասին» (1959թ.), «Անորսալի վրիժառուները» (1966), «Կարամազով եղբայրներ» (1969) և այլ ֆիլմերում կատարած դերերով:
 

Աֆղանստանի Զաբուլ նահանգում 25 մետրանոց ջրհորի մեջ ընկնելուց հետո այսօր փրկված երեխան մահացել է: Այդ մասին հայտնել է Թալիբանի քաղաքական հարցերով գրասենյակի խոսնակ Անաս Հաքքանին: Ավելի վաղ աֆղանական Bakhtar լրատվականը հայտնել էր, որ 96 ժամ տևած աշխատանքներից հետո տղան փրկվել է: Երեխային օգնություն են ցուցաբերել բժիշկները։ Ariana News հեռուստաալիքի տվյալներով՝ երեխային տեղափոխելու համար օգտագործվել էր ուղղաթիռ:

Աղբյուր՝ ria.ru

«Tequila 512»-ը դատի է տվել Քենդալ Ջեների «818 Tequila»-ին՝ ապրանքանիշի խախտման, ծագման կեղծ անվանման և անբարեխիղճ մրցակցության համար՝ պնդելով, որ ապրանքանիշը պատճենել է իր լոգոն և գունային սխեման: Չորեքշաբթի Կենտրոնական Կալիֆորնիայի շրջանային դատարան ներկայացված հայցով «Tequila 512»-ը մեղադրել է «K & Soda» ՍՊԸ-ին, որին պատկանում է «818 Tequila» ապրանքանիշը, «պարզ և ակնհայտ» պատճենման մեջ: «818 Tequila»-ի ներկայացուցիչը TMZ-ին տված հայտարարության մեջ հերքել է պնդումները:

Աղբյուր՝ nbcnews.com

Փետրվարի 19-ին, ժամը՝ 13:00-ին, Կոնգրես հյուրանոցում տեղի կունենա շնորհանդես և կլոր սեղան քննարկում հայ-ամերիկյան հարաբերությունների մասին «Բուշից մինչև Բայդեն»: Քաղաքգետ Սուրեն Սարգսյանի հաղորդմամբ՝ գիրքը նվիրված է Բուշ ավագի քաղաքականությանը Հայաստանի նկատմամբ: Գրքում չհրապարակված տեղեկութուններ կան «Գոբլի պլանի», «907-րդ բանաձևի», Հայաստանի դեմ Թուրքիայի կողմից պլանավորված ինտերվենցիայի մասին:
 

Ուկրաինայի զինված ուժերն ընթացիկ օրվա սկզբից երկու անգամ գնդակոծել են ինքնահռչակ Լուգանսկի Ժողովրդական Հանրապետության տարածքը. այս մասին «Ինտերֆաքս»-ին հայտնել են հրադադարի ռեժիմի վերահսկման և համակարգման միացյալ կենտրոնում (JCCC) ԼԺՀ-ի գրասենյակից: Հաղորդման մեջ նշվում է, որ ուկրաինական կողմից 120 մմ ականանետերից գնդակոծության են ենթարկվել Պրիշիբ և Ժելոբոկ բնակավայրերը:
 

Աֆղանստան փրկարարները փորձում են հասնել տղային, ով արդեն երկու օր է, ինչ արգելափակված է ի ջրհորում: Սոցցանցերում հրապարակված տեսանյութում երևում է, որ Հայդեր անունով տղան խրված է հարավային Զաբուլ նահանգի ծայրամասում գտնվող ջրհորի մեջ: Հաղորդվում է, որ տղայի ինքնազգացողությունը վատացել է երեքշաբթի թակարդն ընկնելուց հետո: Սակայն տղային հասնելու համար թունել փորող փրկարարները մոտ են նրան դուրս բերելուն, հայտնել է տեղի պաշտոնյաներից մեկը:

Աղբյուր՝ bbc.com