Ձեր վստահելի աղբյուրը

Թաիլանդի թագավորական ակադեմիական խորհուրդը հայտարարել է երկրի մայրաքաղաքի պաշտոնական օտարերկրյա անվանումը Բանգքոկից Կրունգ Թհեպ Մահա Նաքհոն փոխելու մասին: Այս մասին ասվում է գերատեսչության կողմից չորեքշաբթի տարածած հաղորդագրության մեջ: Միաժամանակ փաստաթղթում ընդգծվում է, որ «երկու անուններն էլ կարող են օգտագործվել՝ Բանգքոկ և Կրունգ Թհեպ Մահա Նաքհոն»:

Աղբյուր՝ tass.ru

Կոլումբիայի Անտիոկիա շրջանում համրուկը հայտնվել էր վտանգի մեջ, երբ բարձրացել էր էլեկտրասյան վրա և որոշել կախվել հոսանքի լարերից: Տարազա գյուղաքաղաքի անհանգստացած բնակիչները դիմել են Կոլումբիայի հանրային ծառայության աշխատակիցներին՝ Empresas Publicas de Medellin-ին, որպեսզի փրկեն համրուկին հնարավոր էլեկտրահարումից: 20 րոպե տևած փրկարարական աշխատանքից հետո կենդանուն ապահով կերպով հեռացրել են լարերից և հետ բաց թողել վայրի բնություն:

Աղբյուր՝ bbc.com

Երկրի արևելյան հատվածի Կապիսա  նահանգում անհայտ անձինք հարձակվել են «Թալիբան» արմատական շարժման նախկին հրամանատարներից մեկի ազգականների մեքենայի վրա: Այս մասին չորեքշաբթի Twitter-ի իր էջում հայտնել է արմատականների կողմից ձևավորված Աֆղանստանի ժամանակավոր կառավարությունում տեղեկատվության և մշակույթի փոխնախարար Զաբիհուլլա Մուջահիդը: Հարձակման հետևանքով զոհվել է հինգ մարդ, այդ թվում՝ երկու թալիբներ:

Աղբյուր՝ tass.ru

Սերբիայի Հանրապետության պետականության օրվա առթիվ նախագահ Ալեքսանդր Վուչիչը Ջոնի Դեփին հանձնել է ոսկե մեդալ «երկրում իր բացառիկ ներդրումի, տեղական արվեստասեր հանրության ընդլայնման ու բարելավման համար»: 1993 թվականին դերասանը նկարահանվել է Էմիր Կուստուրիցայի անգլալեզու «Արիզոնյան երազանք» ֆիլմում, որը Բեռլինի կինոփառատոնում արժանացել է հատուկ մրցանակի: Դեփը նշել է, որ մրցանակն իր համար մեծ պատիվ է, որը ինքը կարդարացնի:

Աղբյուր՝ ria.ru

Ոստիկանության և շտապօգնության ծառայությունները հայտնել են, որ չորեքշաբթի Սիդնեյի լողափերից մեկում շնաձուկը սպանել է լողորդին՝ վերջին 60 տարվա մեջ առաջին մահացու հարձակման արդյունքում պատճառելով «մահացու վնասվածքներ»: Ականատեսները տեղական հեռուստատեսությանը պատմել են, որ իրենք տեսել են լողի համազգեստով լողորդի վրա հարձակումը:

Աղբյուր՝ reuters.com

Մադրիդի «Ռեալի» գլխավոր մարզիչը մեկնաբանել է «ՊՍԺ»-ից կրած պարտությունը Չեմպիոնների լիգայի 1/8 եզրափակչի առաջին խաղում: «Մենք փորձեցինք խաղը սկսել պաշտպանությունից, բայց չստացվեց»,- մեջբերում է Կարլո Անչելոտի խոսքերը Marca-ն: «Ներքևի բլոկը պետք է ավելի հարձակողական լինի: Մեզ չհաջողվեց տիրել գնդակին, ինչպես արդեն գիտենք»: Մարզիչը ընդգծել է փարիզյան թիմի հարձակվող Կիլիան Մբապպեի խաղը: «Մբապեն անկասելի է»,- ասել է նա: «Մենք փորձեցինք վերահսկել նրան, բայց նա միշտ կարող է ինչ-որ բան հորինել և վերջին պահին դա արեց»:

Աղբյուր՝ sport-express.ru

Բրազիլիայի Ռիո դե Ժանեյրո նահանգի լեռնային շրջաններից մեկում հորդառատ անձրևների հետևանքով առաջացած սելավներից և ջրհեղեղներից առնվազն 18 մարդ է զոհվել, հայտնում են պաշտոնյաները՝ մտավախություն հայտնելով, որ զոհերի թիվը կարող է աճել. որոնողական համակարգերը շարունակում են աշխատանքը աղետից տուժած տարածքներում: Նահանգի հրշեջ վարչությունը հայտնել է, որ ավելի քան 180 զինվոր աշխատում էր տուժած Պետրոպոլիս շրջանում, որտեղ երեք ժամվա ընթացքում 25,8 սանտիմետր անձրև է տեղացել:

Աղբյուր՝ aljazeera.com

Ներքին չվերթը Կուալա Լումպուրից Տավաու էր մեկնում փետրվարի 10-ին, երբ մի քանի ուղևորներ, ըստ տեղեկությունների, օձ են նկատել օդանավում: Սոցցանցերի օգտատերերից մեկը կիսվել է օդանավի լույսերի վրայով սահող օձի նկարով: Երբ օդաչուն լուր է ստացել անսպասելի հավելյալ ուղևորի մասին, ինքնաթիռի երթուղին վերափոխվել է դեպի Կուչին քաղաք: Այնտեղ օդանավը ծխարարվել է և, ենթադրաբար, անտոմս ուղևորը հեռացվել է:

Աղբյուր՝ cnn.com

Օտտավայի հիվանդանոցի գիտահետազոտական ինստիտուտի կանադացի հետազոտողները ավստրալիացի, ամերիկացի և իսպանիացի գործընկերների հետ համատեղ պարզել են, որ աուտիզմի սպեկտրի խանգարումներ և ուշադրության պակասի և հիպերակտիվության համախտանիշ ունեցող մարդկանց շրջանում մահացության աճ կա՝ համեմատած բնակչության մյուս մասի հետ: Ինչպես պարզվել է, ցանկացած պատճառներով մահացությունը այս խանգարումներ ունեցող անձանց մոտ 2,37 և 2,13 անգամ ավելի բարձր է, քան մնացած բնակչության շրջանում:

Աղբյուր՝ gazeta.ru

Տաջիկստանցին Մոսկվայի հարավում ձերբակալության ժամանակ դանակահարել է երկու ոստիկանի: Այս մասին չորեքշաբթի ՏԱՍՍ-ին հայտնել է իրավապահ մարմինների աղբյուրը: «Դեպքը տեղի է ունեցել նախօրեին՝ երեկոյան: Հանցագործներից մեկը, ով ենթադրաբար ծնունդով Տաջիկստանից է, Մեդինսկայա փողոցում ձերբակալության ժամանակ դանակով հարձակվել է ոստիկանների վրա։ Երկուսը վիրավորվել են», - ասել է աղբյուրը:

 

Թաիլանդի Միջազգային զարգացման համագործակցության կազմակերպությունը (TICA) 2022 թ. կրթաթոշակային ծրագրի շրջանակում օտարերկրյա ուսանողներին հրավիրում է մասնակցելու մագիստրոսական ծրագրի: Ծրագրին մասնակից յուրաքանչյուր երկրի հատկացվում է մինչև հինգ հայտ: Թեկնածուները պետք է ունենան բակալավրի կոչում կամ տվյալ բնագավառում մասնագիտական փորձառություն: Ծրագրի մասին մանրամասն տեղեկատվությունը զետեղված է https://tica-thaigov.mfa.go.th կայքում և կից նյութերում:

Աղբյուր՝ ՀՀ ԿԳՄՍ նախարարության հասարակայնության հետ կապերի և տեղեկատվության վարչություն 

69 տարեկանում մահացել է հնդիկ երաժշտական կոմպոզիտոր Բապպի Լահիրին, ով հայտնի էր իր գերազանց դիսկոտեկային մեղեդիներով և աչք շոյող նորաձև ոճով: Անցյալ տարվա ապրիլին Covid-ից ապաքինված Լահիրին անցած ամսվա ընթացքում գտնվել է հիվանդանոցում: Նա մահացել է երեքշաբթի օրը: Լահիրին, ում փաղաքշական կոչում են «Բապպի Դա», հայտնի է Հնդկաստանում դիսկո ժանրի զարգացմամբ:

Աղբյուր՝ bbc.com

Արցախի Հանրապետության նախագահը աշխատանքային խորհրդակցություն է հրավիրել՝ նվիրված Հանրապետությունում առողջապահական համակարգի զարգացման հայեցակարգի մշակմանը: Զեկույցով հանդես է եկել ԱՀ առողջապահության նախարար Միքայել Հայրիյանը, ներկայացրել աշխատանքների ընթացքը և նախատեսվող ծրագրերը, նախանշել դրանց կյանքի կոչման ժամկետները:

Աղբյուր՝ Արցախի նախագահի աշխատակազմ 

Իրականացված վերահսկողության ընթացքում արձանագրվել է 39 դեպք, որից 37-ով հաշվարկվել է 15.842.380 ՀՀ դրամի չափով շրջակա միջավայրին հասցված վնասի։ Նախկինում արձանագրված 6 դեպքով հաշվարկվել է 356.500 ՀՀ դրամի չափով շրջակա միջավայրին հասցված վնաս, նշանակվել է 250.000 ՀՀ դրամի չափով վարչական տուգանք: ՀՀ ԱՆ ՀԿԱԾ է ուղարկվել 6 գործ (ընդհանուր՝ 581.120 ՀՀ դրամ): Նշված ժամանակահատվածում ՀՀ պետական բյուջե մուտքագրվել է 1.195.000 ՀՀ դրամ:

Աղբյուր՝ ՀՀ բնապահպանության և ընդերքի տեսչական մարմին

Փարիզում կայացած հանդիպումն ավարտվել է 1։0 հաշվով՝ հօգուտ փարիզեցիների: Երկրորդ խաղակեսին ավելացված չորրորդ րոպեին միակ գոլը խփեց հարձակվող Կիլիան Մբապպեն: 61-րդ րոպեին «ՊՍԺ»-ի հարձակվող Լիոնել Մեսսին չէր կարողացել իրացնել 11 մետրանոցը:

Աղբյուր՝ ria.ru

Փետրվարի 17-ին՝ ժամը 16:00-ին, նախարարության 9-րդ հարկում տեղի կունենա մարզական լրագրող, տարեգիր Ալեքսանդր Գրիգորյանի՝ «Аркадий Андреасян - «Королевская булавка «Арарата»» ռուսալեզու գրքի շնորհանդեսը: Գիրքը պատմում է ԽՍՀՄ սպորտի վարպետ, ՀՀ վաստակավոր մարզիչ, լեգենդար Արկադի Անդրիասյանի կյանքի և գործունեության մասին: Միջոցառմանը, բացի գրքի հեղինակից, ներկա կլինեն նաև «Արարատ-73»-ի նախկին ֆուտբոլիստներ Սերգեյ Պողոսյանը, Նորիկ Մեսրոպյանը:

Աղբյուր՝ ՀՀ ԿԳՄՍ

Instagram-ը ներկայացրել է «Stories»-ի հավանումների առանձին համակարգ: Այժմ օգտատերերը կարող են իրենց հավանությունը հայտնել նման հրապարակումներին՝ առանց դրանց հեղինակներին հաղորդագրություն ուղարկելու: Այս մասին հայտնել է ծառայության ղեկավար Ադամ Մոսերին:

Աղբյուր՝ vesti.ru

«Ժանգը» ֆիլմի նկարահանման հրապարակում հրազենային վնասվածքից սպանված կինոօպերատորի ընտանիքը երեքշաբթի դատի է տվել Ալեք Բոլդուինին և ֆիլմի պրոդյուսերներին անօրինական գործողության հետևանքով գրանցված մահվան համար: Հալինա Հաթչինսի ընտանիքի փաստաբանները Լոս Անջելեսի մամուլի ասուլիսում հայտարարել են Նյու Մեքսիկոյում Հաթչինսի ամուսնու՝ Մեթյու Հաթչինսի և նրանց որդու՝ Անդրոսի անունով ներկայացված հայցի մասին:

Աղբյուր՝ apnews.com