Ձեր վստահելի աղբյուրը

Նախօրեին մի նյութ էինք հրապարակել Տավուշի ու Գեղարքունիքի մի քանի դպրոցներում մեկնարկած «Դպրոցական սնունդ» ծրագրի վերաբերյալ: Բողոքը Սևան քաղաքի թիվ 3 միջնակարգ դպրոցում սովորող երեք երեխաների մորից էր: Նա դժգոհում էր, որ իրենց դպրոցում երեխաներից սնունդ են ուզում կերակուր պատրաստելու համար: Հետաքրքրվել է, քաղաքի մեկ այլ դպրոցում, որտեղ իրականացվում է ծրագիրը, շաբաթական 5 հարյուր դրամ են հավաքում:

Հրապարակման հետքերով Գեղարքունիքի փոխմարզպետը մարդիկ է ուղարկել դպրոց, նրանք տեսածի մասին պատմել են ՄԱԿ-ի ներկայացուցիչներին: Նշենք, որ ծրագիրն իրականացվում է ՄԱԿ-ի Պարենի համաշխարհային ծրագրի կողմից: Ինչպես Panorama.am-ին փոխանցեց ԿԳՆ արտաուսումնական դաստիրակության բաժնի պետ Անդրանիկ Հովհաննիսյանը, դպրոց ուղարկվածները պարզել են, «որ դպրոցում ոչ մի գումար էլ չեն հավաքել», սնունդ էլ ուզել են, որ երեխաներին տրվող սննդակարգը հագեցած լինի: «Դա պետք է լինի, որպեսզի երեխաների սնունդը միատարր չլինի»,-բացատրեց բաժնի վարիչը, ապա նշեց, որ ծրագրի իրականացմանը հավանություն են տվել տնօրենն ու ծնողկոմիտեն:

Ինչ վերաբերում է դպրոցում ջուր չլինելու խնդրին, որի պատճառով երեխաները ուտելուց առաջ ու հետո չեն կարողանում լվացվել, խոհանոցում էլ ջուր չկա, ապա ՄԱԿ-ի մասնագետները Հովհաննիսյանին բացատրել են, որ դպրոցի տնօրենն ու ծնողական կոմիտեն խոստացել են, որ ժամանակի ընթացքում ջրի խնդիրը կլուծեն ու ջուր կապահովեն, ասել են նաև, որ ՄԱԿ-ը փորձում է օգտակար լինել նաև այս հարցերում` իրականացնելով «Սնունդ աշխատանքի դիմաց» ծրագիրը:
ԿԳՆ աշխատակիցը դժգոհ ծնողներին խորհուրդ է տալիս ուղղակի երեխային չթույլատրել դպրոցում սնվել այդ ծրագրի շրջանակում: «Դա ծնողի իրավունքն է»,-նշեց նա: Այդ իրավունքի մասին հայտնեցինք խմբագրություն զանգահարած ծնողին: Պարզվեց, որ ոչ միայն նա, այլև մի քանի ծնողներ ցանկացել են «օգտվել իրենց այդ իրավունքից» ու երեխաների հետ ընդմիջման ժամին ուտելու համար բան են դրել: Դպրոցում նախ ստիպել են դա ուտել ճաշարանում, հետո ասել են, էլ տանից բրդուճներ չբերեք:

«Անգամ խոսակցություն է եկել դասվարի վրա, թե ինչու եք թույլ տալիս, որ երեխաները սնունդ են բերում տնից, պարտավոր են գան, նստեն, ճաշարանից օգտվեն, ասեք, ոչ ոք տնից չբերի: Մի երեխայի էլ պարտադրել են, զոռով ճաշը կերցրել էին, ամբողջ դեմքը դուրս էր տվել, զզվող երեխա էր եղել: Նման բաներ նրանք չեն ընդունում, ասում են, գալիս ես, պիտի ուտես: Ստիպում են»,-ասաց ծնողը: Մեր զրուցակիցը պատմեց նաև, որ հենց սկզբից ծնողները գրավոր հրաժարվել են սննդից, դրա ներքո ստորագրել են ծնողների մեծ մասը, ապա սեպտեմբերի վերջին հանձնել տնօրենին:
«Չեք պատկերացնի մենք ինչ ներվային ապրումներով էինք հավաքվում այդ օրերին դպրոցի բակում: Ամբողջ դպրոցի ծնողկոմիտեն հավաքվեց, ժողով արեցին, ընդամենը երկու դասարանի ծնողկոմիետի նախագահ համաձայնվեց այդ ծրագրին: Աշակերտներից մեկի հայրը Սևանի ավագանու անդամ է, մյուսն էլ` ատամնաբույժ է, ապահոված ընտանիքներ են, գտան, որ դա ճիշտ է, մյուս ծնողները ստորագրություններով նշել են, որ իրենք այդ ծրագրին դեմ են: Գրավոր դիմումն էլ տվել ենք տնօրենին»,-պատմեց աշակերտների մայրը, ապա հավելում, որ դպրոցին ուտելիք մատակարարող ծնողներն արդեն մոյւսներին երեսով են տալիս, թե բոլորի երեխաներն էլ դպրոցում հաց են ուտում ու յուրաքանչյուրը պարտավոր է ուտելիք ուղարկել դպրոց:

Այսքանից հետո նա գալիս է եզրակացության, ձուկը գլխից է հոտում `«եթե վերևներից ամեն ինչ նորմալ լինի, ապա մարզերում էլ ամեն ինչ լավ կլինի»:

«Տնօրենը դռան վրա փակցրել է, որ դպրոցում դրամահավաքությունը խստիվ արգելվում է, բայց այդ ամեն ինչը կատարվում է ներքին կարգով, տակտիկորեն են մոտենում այս հարցին, որպեսզի մաքուր դուրս գան, ասեն, մենք իրենցից երբ եքն փող հավաքել, իրենք իրենց կամքով բերել-տվել են»,-բացատրում է ծնողը, ապա պատմում, որ օրինակ ծնողներից մեկը մի պարկ կարտոֆիլ է տարել, մյուսն էլ պարկով հնդկաձավար: «Նրանք ունեն տարել են: Բայց դա չի նշանակում, որ բոլորը կարող են նման բան անել»,-ասաց Սևանի բնակչուհին, միևնույն ժամանակ ավելացնում, սեպտեմբերը սկսելուն պես մենք սկսում ենք գումար հավաքել մինչև ուսումնական տարվա վերջ:

Ի դեպ, նախօրեին ԿԳՆ հանրակրթության վարչության պետ Նարինե Հովհաննիսյանը մեզ հետ հեռախոսազրույցում նշեց, որ անձամբ կխոսի տնօրենի հետ կավիճի համար դրամ հավաքելու խնդրի վերաբերյալ, չնայած դա իր գործառույթներից դուրս է: