Ձեր վստահելի աղբյուրը

Այսօր Երևանի քաղաքապետարանում կազմակերպված 100 օրվա ամփոփիչ ասուլիսում քաղաքապետ Կարեն Կարապետյանը ներկայացավ իր թիմով, ասաց, որ ելույթ չի պատրաստել ու շուրջ 15 րոպե հանդես եկավ ներածական խոսքով: Խոսքում 100 օր պաշտոնավարող քաղաքապետը խոսեց հիմնականում ապագայի անելիքներից: Նա ասաց, որ քաղաքի կառավարման համակարգում փոփոխություններ են կատարվել. եռաստիճան կառավարման համակարգ է ներդրվել ` քաղաքապետարան-վարչական շրջան- համատիրություն:

Ասաց, որ վարչական շրջանների համար ապահովել են իրավունքների և պարտականությունների բալանսը, և նրանց համար հաշվետվության նոր ձև է ներդրվել: Նա հույս ունի, որ այդպիսով մրցակցության դաշտ կստեղծվի ու վարչական շրջանների ղեկավարները լավ կաշխատեն:

Տեղեկացրեց, որ արդեն սկսել է «կայացած» համատիրությունների հետ աշխատելը ու պարբերաբար նրանց հետ խորհրդակցություններ են անցկացվում: «Քաղաքապետարան-վարչական շրջան-համատիրություն եռաստիճան կառավարման օղակում կարևոր դերակատարում ունի քաղաքացին, խնդրում ենք նրան, որպեսզի ինքն անտարբեր չլինի քաղաքի խնդիրների նկատմամբ», -հավելեց Երևանի ղեկավարը:

Քաղաքային իշխանություններն այսուհետև, ինչպես քաղաքապետը ներկայացրեց, առաջնորդվելու են «որտեղ կա բիզնես տրամաբանություն, այդտեղ պետք է բիզնես լինի» քաղաքականությամբ ու տրանսպրտի, առողջապահություն, աղբահանության ոլորտներում գործի են դրվելու բիզնեսի հիմունքները:

«Ես, ընդհանրապես, կարծում եմ, որ մասնավոր կառավարումը ավելի էֆեկտիվ է, քան պետական կառավարումը: Մենք այժմ աշխատանք ենք տանում, որ այն ոլորտները, որտեղ կա բիզնես տրամաբանություն, և որտեղ մենք 100 տոկոս սեփականատեր ենք, հանձնել լիազոր կառավարման կամ ստեղծել համատեղ ձեռնարկություն», -հայտարարեց քաղաքապետը:

Քաղաքապետն ասաց, որ աղբահանության ոլորտում շուտով մրցույթ կհայտարարվի, այժմ ներդրումային փաստաթղթերն են պատրաստվում: Ոլորտում անելիքներ, ըստ քաղաքապետի, շատ կան և այնպես են անելու, որ քաղաքացին անպայման վճարի աղբահանության համար: Կարապետյանը նախ մատնանշեց սոցհարցման տվյալները, ասաց, որ երևանցիների 40 տոկոսը սանմաքրման համար չի վճարում, այնուհետև նկատեց, որ եթե յուրաքանչյուր բնակիչ վճարի սանմաքրման դիմաց, ապա դա բավական կլինի, որ այդ աշպատանքներն իրականացվեն ըստ արժանվույն:

100 օրում տրանսպորտի ոլորտը կանոնակարգելու համար քաղաքային իշխանությունները հայեցակարգ են մշակել: Քաղաքապետն ասաց, որ Երևանի ապագայի տրանսպորտը պատկերացնում է առանց երթուղային տաքսիների, միջին և մեծ ավտոբուսներով, իսկ քաղաքացիների որոշ խմբերի համար կվաճառվեն քարտ-տոմսեր, որոնցով հնարավոր կլինի երթևեկել: «Դա թույլ կտա մաքսիմալ ֆինանսական հոսք ապահովել այդ ոլորտ», -հավելեց քաղաքապետը: Կանոնակարգվելու և բարեկարգվելու է 200 կանգառ, 60 կանգառներում տեղադրվելու են տեսախցիկներ: Միևնույն ժամանակ նա չասաց` կթանկանա՞ ուղեվարձը, թե՞ ոչ: Չմատնանշեց նաև հստակ ժամկետներ, թե երբ, ի վերջո, քաղաքակիրթ երթևեկություն կկազմակերպվի Երևանում:

Շինարարության ոլորտում շեշտը դրվելու է սոցիալական բնակֆոնդի վրա, և այդ ծրագրի շրջանակներում, քաղաքապետի ներկայացմամբ, պետք է գործարկել ադմինիստրատիվ շենքերը: «Այդ ադմինիստրատիվ շենքերը, որոնք այսօր չեն օգտագործվում, կարելի է տրամադրել բնակֆոնդին», -հավելեց քաղաքապետը:

Ինչ վերաբերում է կրթության ոլորտին, ապա քաղաքի կառավրչի խոսքով, իրենք նպատակ են դրել գրագետ ու կրթված քաղաքացի պատրաստելը: Դպրոցներում նա ասաց, որ ստեղծվել է կառավարման նոր օղակ, որի օգնությամբ դրամահավաքության դեպքեր չեն լինի: Երևանի կանաչ տարածքների պահպանման համար քաղաքապետն ասաց, որ ամեն ինչ կարվի: «Մեր թիմը շատ տրամադրված է, որ կանաչ գոտիները մաքսիմալ պահպանվեն: Բայց պետք է ասեմ, որ կանաչ գոտի, չի նշանակում, որ առավոտը Երևան քաղաքի բնակիչը զարթնելիս աքլորի ձայն ա լսում: Մենք պիտի հասկանանք, որ ապրում ենք քաղաքում, մեգապոլիսում, որտեղ կան սահմանափակումներ», -նկատեց քաղաքապետը:

Հեռահար ծրագրերի թվարկելը շարունակելով, քաղաքապետն ասաց, որ դիմել են կառավարությանը «ԿԱՆԱԶ»-ի մշակույթի տունը քաղաքապետարանին տրամադրելու խնդրանքով. Կարեն Կարապետյանը ծրագրել է այնտեղ սոցիալական կինոթատրոն հիմնել, որտեղ երեխաների համար անվճար ներկայացումներ կբեմականացվեն: Ինչ վերաբերում է Երևանի կրկեսին, ապա քաղաքապետը տեղեկացրեց, որ «Տաշիր» ընկերության հետ նրանք պայմանագիր են կնքել, որի համաձայն, կրկեսի բարեփոխման գործում կներդրվի 6-8 մլն ԱՄՆ դոլար: Բացի այդ, Հաղթանակ զբոսայգում, այսպես կոչված, հայկական «Disneyland» կկառուցվի, Նոյի համապատասխան տապանով, ռեստորաններով կհիմնվի նաև «Noyland»: