Ձեր վստահելի աղբյուրը

Լրագրողական մի քանի կազմակերպություններ այսօր հայտարարություն են տարածել, որով իրենց անհանգստությունն են հայտնում Կենտրոնական ընտրական հանձնաժողովի կողմից առաջիկա ընտրությունների լուսաբանման համար լրագրողների հավատարմագրման գործընթացի վերաբերյալ:

Հայտարարության մեջ ասվում է. «Ի կատարումն 2012 թվականի հունվարի 31-ին ԿԸՀ-ի կողմից հաստատված՝ ՀՀ Կենտրոնական ընտրական հանձնաժողովում լրագրողների հավատարմագրման կարգի, այս օրերին ընթանում է լրագրողների հավատարմագրումը։ Թեև սույն Կարգի 3-րդ հոդվածի 2-րդ կետում նշվում է, որ ԿԸՀ-ն «բոլոր լրագրողների համար ապահովում է ոչ խտրական պայմաններ», այնուամենայնիվ, Կարգի որոշ դրույթներ անհանգստության տեղիք են տալիս։ Մասնավորապես, մտահոգություն են առաջացնում կարգի 9-րդ և 11-րդ հոդվածով նախատեսված հավատարմագրման մերժման և դադարեցման հետևյալ երկու հիմքերը. լրագրողի հավատարմագրումը մերժվում է կամ դադարեցվում է, եթե «նա տարածել է ընտրական հանձնաժողովների (պաշտոնատար անձանց) գործունեության մասին այնպիսի տեղեկություններ, որոնք չեն համապատասխանում իրականությանը» կամ «դատապարտվել է դիտավորյալ հանցագործության համար, և նրա դատվածությունը մարված կամ հանված չէ»: Հավատարմագրման մերժման և դադարեցման այս հիմքերն անընդունելի են հետևյալ պատճառներով.

- սույն Կարգում նախատեսվում են իրավունքի այնպիսի սահմանափակումներ, որոնք կարող են սահմանվել միայն օրենքով, և՝ ոչ ենթաօրենսդրական ակտով,

- լրատվամիջոցների իրավունքներից է բխում ընտրական գործընթացները լուսաբանելու համար լրագրողների ինքնուրույն և ազատ ընտրության հնարավորությունը։ Այդ ընտրությունը չպետք է կաշկանդված լինի որևէ կերպ, այդ թվում նաև՝ ԿԸՀ-ի կողմից,

- հաշվի առնելով, որ մոտակա ամիսներին լրագրողների բավական մեծ մասը ներգրավված է լինելու ընտրական գործընթացների լուսաբանման մեջ, Կարգը, փաստորեն, արգելք կարող է հանդիսանալ լրագրողի մասնագիտական գործունեության համար՝ զրկելով լրագրողին հավատարմագրման հնարավորությունից «անցյալի մեղքերի» համար, որն էլ անընդունելի է ժողովրդավարական արժեքներ դավանող երկրում,

- Կարգում՝ որպես լրագրողի հավատարմագրումը մերժելու և դադարեցնելու հիմք է սահմանվում՝ ընտրական հանձնաժողովների գործունեության մասին այնպիսի տեղեկությունների տարածումը, որոնք չեն համապատասխանում իրականությանը։ ԿԸՀ-ն անուղղակիորեն սահմանում է իր համար քննադատությունից պաշտպանվելու լրացուցիչ երաշխիքներ։ Տվյալ դրույթն առավել մտահոգիչ է, հաշվի առնելով, 2010 թվականի ՀՀ Քաղաքացիական օրենսգրքում զրպարտության և վիրավորանքի օրենսդրական փոփոխություններից հետո ձևավորված և բազմաթիվ քննադատությունների արժանացած դատական պրակտիկան,

- անկախ նրանից, թե նշված դրույթներն ինչպես կկիրառվեն, նման սահմանափակումների առկայությունը Կարգում արդեն իսկ որոշակի ճնշման միջոց է և կարող է անտեղի կաշկանդել լրագրողների աշխատանքը՝ այն էլ պետության համար այսքան կարևոր ընտրական շրջանում։

Հաշվի առնելով վերոշարադրյալը, մենք՝ ներքոստորագրյալներս, ՀՀ Կենտրոնական ընտրական հանձնաժողովից պահանջում ենք վերանայել ՀՀ Կենտրոնական ընտրական հանձնաժողովում լրագրողների հավատարմագրման կարգի 9-րդ և 11-րդ հոդվածով նախատեսված՝ հավատարմագրման մերժման և դադարեցման հիմքերը»:

Հայտարարությունը տարածվել է Երևանի մամուլի ակումբի, Խոսքի ազատության պաշտպանության կոմիտեի, Մամուլի աջակցության «Ինտերնյուս» ՀԿ-ի, Ժուռնալիստների «Ասպարեզ» ակումբի և Բազմակողմանի տեղեկատվության ինստիտուտ-Հայաստանի անունից:

Նախորդող հրապարակում. ԿԸՀ-ն պատասխանում է լրագրողների հավատարմագրման մասին տարբեր դատողությունենրին