Ձեր վստահելի աղբյուրը

Մայիսի 12-ին Արմավիր մարզի 46 համայնքներում և երկու օր առաջ ևս 4 համայնքներում աննախադեպ ուժեղ կարկտահարության հետևանքով տուժել է շուրջ 12 հազար ընտանիք` 60 հազար մարդ, իսկ մոտավոր հաշվարկներով ընդհանուր վնասը կազմել է շուրջ 25 մլրդ դրամ: Այս մասին լրագրողների հետ հանդիպմանը հայտարարեց ԱԺ ՀՀԿ խմբակցության անդամ Ալեքսան Պետրոսյանը, ով նաև նորաստեղծ «Բնական աղետներից տուժված գյուղացիներին օգնության» հիմնադրամի նախագահն է` հավելելով, որ, ցավոք, պետությունը ֆինանսական նման հնարավորություններ չունի, որպեսզի վնասը վերականգնվի.

«Այսօր կարկտահարությունից տուժած մարդկանց ֆինանսական վիճակը շատ ծանր է, որովհետև օգնությունը կառավարության կողմից արվել է հիմնականում հետագայում ծախսեր չանելու ուղղությամբ, սակայն այսօր գյուղացու ապրելու և վնասները վերականգնելու ուղղությամբ` ոչ»,- նշեց պատգամավորը, ում գնահատմամբ վնասներն իսկապես շատ ահռելի են`« Այն աստիճան, որ բնական այս աղետի հետևանքները հեշտությամբ կարելի է որակել իբրև դժբախտություն»:

Նրա խոսքով հիմնադրամի հիմնական ու ամենագլխավոր նպատակը ֆինանսական օգնությունն է այն բոլոր ընտանիքներին, ովքեր տուժել են կարկտահարությունից: Հիմնադրամի գործունեության ժամկետը մինչ օգոստոսի 1-ն ընկած ժամանակահատվածն է. այս ընթացքում, հորդորեց Ա.Պետրոսյանը, բոլոր ցանկացողները` և բարերարները, և կազմակերպություններն ու կուսակցությունները, և պետական ու մասնավոր հիմնարկությունները, ինչպես նաև անհատները կարող են իրենց աջակցությունը ցուցաբերել աղետի առջև հայտնված արմավիրցիներին.

«Կարծում եմ երկու ամիսը բավարար ժամանակ է, որպեսզի գումար հավաքագրվի ու բաշխվի ժողովրդի միջև: Հավաքագրված ամբողջ գումարն էլ, հավաստիացնում եմ, հավասարապես կբաշխվի այդ 12 հազար ընտանիքների միջև, իսկ հիմնադրամի գործունեությունն էլ կլինի թափանցիկ` մինչև օգոստոսի 1-ը մենք պարբերաբար կհանդիպենք, ինչպես նաև կգործի «Թեժ գիծ»»,- տեղեկացրեց պատգամավորը ու  տեղեկացրեց, որ հիմնադրամի ստեղծման գաղափարը ողջունել է ԱԺ նախագահ Հովիկ Աբրահամյանը և ԱԺ իր բոլոր գործընկերները, ովքեր պատրաստակամություն են հայտնել օգնել գյուղացիներին.

«Պատրաստակամություն են հայտնել օգնելու վարչապետն ու կառավարության անդամները, Կենտրոնական բանկն իր բոլոր կառույցներով ու ԿԲ նախագահը, նաև ՀՀ Ոստիկանությունն է խոստացել 11 մլն դրամ փոխանցել հիմնադրամին…. Որպեսզի հարցի լրջությունը հստակ պատկերցնենք նշեմ, որ սա եզակի դեպքն է, երբ պետական մարմիններն ու մասնավորը միասին միավորում են իրենց օգնությունը մարդկանց օգնելու համար. ես նման բան չեմ հիշում»,- շեշտեց բանախոսը:

Այս պահին դժվար է ասել, թե որքան գումար կա արդեն նախնական հիմնադրամում, քանի որ առաջիկա երկու օրն էլ բանկերը չեն աշխատելու` հանգստյան օրեր են, բայց որ մեր հայրենակիցները անտարբեր չեն մնա, Ա.Պետրոսյանը ուղղակի վստահ է:

«Ես ասել եմ ու նորից եմ կրկնում` տուժած մարդիկ ոչ մուրացկան են և ոչ էլ չաշխատող, հակառակը` նրանք շատ աշխատասեր են ու հայրենասեր, որովհետև հողի վրա աշխատելն ու բարիք ստեղծելը նախևառաջ հայրենասիրության դրսևորում է: Այդ իսկ պատճառով ես դիմում եմ բոլորին` միասին օգնենք աղետի գոտու վերածված Արմավիրին»,- նշեց նա ու հավելեց նաև, որ գումարը գյուղացիներին հասցնելու գործընթացին մասնակից է դարձնելու բոլոր լրատվամիջոցներին, որպեսզի նրանք ևս ներկա լինեն այդ 12 հազար ընտանիքներին հավաքագրված գումարի արդարացի սկզբունքներով բաժանմանը:

Ի դեպ, Ա.Պետրոսյանը նկատեց նաև, որ այս ամենի հետևանքով կանխատեսելի է նաև գյուղմթերքի գնաճ, քանի որ անհնար է, որ 11 հազար տուժած հեկտարներն իրենց բացասական ազդեցությունը չթողնեն ամբողջ հանրապետության կտրվածքով:

Նշենք, որ հիմնադրամի տնօրենն է Մակար Պետրոսյանը, հաշվեհամարները` «Կոնվերսբանկ»-ում.

հ/հ 1930047127690100 ՀՀ դրամ
հ/հ 1930047127690101 ԱՄՆ դոլար
հ/հ 1930047127690104 ԵՎՐՈ