Ձեր վստահելի աղբյուրը

Ազգային ժողովի կողմից գարնանային նստաշրջանի ընթացքում ընդունված և այս օրերին հասարակության լայն շրջանակների քննադատությանն արժանացած «Կանանց և տղամարդկանց հավասար իրավունքների և հավասար հնարավորությունների ապահովման մասին» օրենքը Հայաստանի առաքելական եկեղեցու ներկայացուցիչների մոտ ևս հարցեր է առաջացնում:

«Օրենքի երրորդ հոդվածում գենդերը, լինելով սոցիալ-հոգեբանական սեռ, սահմանվում է որպես «ձեռքբերովի, սոցիալապես ամրագրված վարք»: Ըստ էության` այս կետը հակասում է մեր դավանած բարոյական արժեքներին ու մեր ժողովրդի հոգեկերտվածքին: Ի՞նչ է նշանակում ձեռքբերովի վարքագիծ», «ԳԱԼԱ»-ի հետ զրույցում ասել է Արթիկի թեմի առաջնորդ Տեր Հովակիմ եպիսկոպոս Մանուկյանը:

Սրբազանն ասել է, որ ինքը համաձայն է կնոջ և տղամարդու միջև իրավահավասարությանը, քանզի, մարդը լինի կին թե տղամարդ, իրենից արժեք է ներկայացնում: «Ես, որպես Հայ եկեղեցու սպասավոր, կարծում եմ, որ պետք է գործընթաց սկսել այս օրենքում փոփոխություններ մտցնելու, որն արդեն իսկ սկսվել է, եթե չեմ սխալվում: Մարդ արարածն այնպիսի էակ է, որի մոտ առաջանում են շատ ու շատ ցանկություններ: Դրա համար էլ խոստովանության և զղջման աղոթքների մեջ կան կետեր, որոնք մարդուց վանում են «անասնական, իգական, արվական, նույնիսկ գրաստական» ցանկությունները: Նմանօրինակ օրենքների ընդունումով մենք դուռ ենք բացում և առիթ ստեղծում, որ մարդիկ չպայքարեն իրենց կրքերի դեմ, չլինեն ժուժկալ, չհաղթահարեն իրենց արատավոր ցանկությունները: Ես չեմ ցանկանում որևէ մեկին դատել: Սակայն վերջերս ծանոթացել եմ ու զրուցել եմ մի ռեժիսորի հետ, որ ֆիլմ էր նկարահանել սեռը փոխած տղամարդու մասին: Այս ֆիլմի մասին մի քանի հպանցիկ քննադատական հրապարակումներ եղան: Հեղինակը հրաշալի մի աղջիկ էր: Հետը բավականին քննարկեցի ֆիլմը: Իմ համոզմամբ, այդ մարդը, որ սեռը փոխել էր, իդեա ֆիքս ուներ կին դառնալ, հնարավոր է, որ նա իդեա ֆիքս ունենար Նապոլեոն Բոնապարտը կամ Ստալինը դառնալու, ի՞նչ կկատարվեր», -ասել է եպիսկոպոս Մանուկյանը:

Նկատենք, որ այս տարվա մայիսի 20-ին ընդունված «Կանանց և տղամարդկանց հավասար իրավունքների և հավասար հնարավորությունների ապահովման մասին» օրենքում «գենդեր, գենդերային» հասկացությանը տրված է հետևյալ սահմանումը. «տարբեր սեռի անձանց ձեռքբերովի, սոցիալապես ամրագրված վարք, կանանց և տղամարդկանց միջև հարաբերությունների սոցիալական հայեցակետ, որն արտահայտվում է հասարակական կյանքի բոլոր ոլորտներում, ներառյալ` քաղաքականությունը, տնտեսությունը, իրավունքը, գաղափարախոսությունը, մշակույթը, կրթությունը, գիտությունն ու առողջապահությունը»:

ԱԺ «Բարգավաճ Հայաստան» խմբակցության քարտուղար Նաիրա Զոհրաբյանը օգոստոսի 2-ին Ազգային ժողովում շրջանառության մեջ է դրել նույն օրենքում փոփոխությունների նախագիծ, որով պատգամավորը փորձում է հստակեցնել օրենքում օգտագործվող եզրույթները: