Ձեր վստահելի աղբյուրը

Երևանում՝ Հանրապետության Հրապարակի հարևանությամբ, բացվեց «Հայաթ Փլեյս» հյուրանոցային ցանցին պատկանող «Հայաթ Փլեյս Երևան» հյուրանոցը, որը առաջին «Հայաթ Փլեյս» ապրանքանիշով հյուրանոցն է Եվրոպայում: «Այս կարգի հյուրանոց Ամերիկայից դուրս առաջինն է Եվրոպայում: Այս հյուրանոցն ավելի կատարելագործված է, որը ենթադրում է բոլոր տեսակի ծառայությունների մատուցում, այդ թվում նաև ֆիթնես մարզասրահ, հանդիպումների դահլիճ, ռեստորան: Հյուրերի համար մենք ապահովել ենք լավագույնը»,-հյուրանոցի բացումից հետո լրագրողներին ասաց «ԻնտերԱրմ» ընկերության տնօրենների խորհրդի նախագահ Սամվել Սարգսյանը:

«ԻնտերԱրմ» ընկերությունը հյուրանոցի սեփականատերն է: 12 տարի է համագործակցում է «Հայաթ հոթելզ քորփորայշնի» հետ, որը բարձրակարգ հյուրանոցային ցանցեր կառավարող և շահագործող ամերիկյան ընկերություն է:

Հյուրանոցի շինարարական աշխատանքները մեկնարկել են 2011թ., ավարտվել՝ ընթացիկ տարում: Հյուրանոցի կառուցման ուղղությամբ մինչ այժմ ներդրվել է շուրջ 15 մլն ԱՄՆ դոլար: 10 հարկանի և մոտ 7.0 հազ. մ2 ընդհանուր մակերեսով այս հյուրանոցում բացվել է 80 աշխատատեղ՝ 200.0 հազ. դրամ միջին աշխատավարձով:

Նախագահ Սերժ Սարգսյանը ներկա է գտնվել «Հայաթ Փլեյս Երևան» հյուրանոցի բացման արարողությանը: Երկրի ղեկավարը շրջել է միջազգային բարձրակարգ հյուրանոցային ապրանքանիշի պահանջներին համապատասխան կառուցված նորաբաց հյուրանոցային համալիրում, ծանոթացել իրականացված ներդրումներին, ստեղծված աշխատատեղերին և առաջարկվող ծառայությունների որակին:

Հայաստանում «Հայաթ Փլեյս Երևան»-ի բացումը, ըստ հյուրանոցի սեփականատեր «Ինտեռարմ-Մ» և հյուրանոցի կառավարումն իրականացնող «Հայաթ Հոթելզ Քորփորեյշն» ընկերությունների պատասխանատուների, որոշակիորեն կխթանի հյուրանոցային արդյունաբերությունում ծառայությունների որակի բարելավումը: Ակնկալվում է նաև, որ նոր հյուրանոցի մուտքը շուկա կնպաստի ոլորտում մրցակցային միջավայրի բարելավմանը ինչպես ցանցային, բրենդային հյուրանոցների շրջանում, այնպես էլ ընդհանրապես հանրապետության հյուրանոցային արդյունաբերության մեջ:

Սամվել Սարգսյանը լրագրողներին ասաց, որ միջազգային բրենդի ներկայությունն արդեն իսկ կարևոր միջոցառում է: Նա նշեց, որ առաջիկայում Ջերմուկում էլ են բացելու հյուրանոց, որը ավելի մեծ նշանակություն կտա առողջարանային այդ քաղաքին: «Հայաստանը գրավիչ երկիր է: Զբոսաշրջիկները տարեցտարի ավելանում են»,- ասաց նա՝ հավելելով, որ կարող են տուրիստական լուրջ երթուղի մշակել՝ 10-12 օրյա՝ Երևանից հյուրերին տեղափոխել Ջերմուկ, այնտեղից Տաթևի ճոպանուղի, նաև Արցախ, ապահովելով նորմալ սնունդով, քնելու վայրերով, քանի որ անհրաժեշտ բոլոր ենթակառուցվածքները կան: