Ձեր վստահելի աղբյուրը

Հայաստանում ապաստանած սիրիահայերին «Նոր Հալեպ» թաղամասի նախագծի հեղինակներ Վահե և Գոհար Թութունջյաններն այսօր ներկայացրեցին թաղամասի ամբողջականացված հատակագիծը:

Ղամշլիից Հայաստան եկած սիրահայերից մեկը Panorama.am-ին թղթակցի հետ զրույցում ասաց, որ այս ծրագրի հետ կապված հույսեր ունեն. «Յուրաքանչյուր սիրիահայ, որ տնից դուրս է եկել, բնականաբար ծրագիր ունի իր բնակարանը ձեռք բերելու ծրագիր»:

«Նոր Հալեպ» թաղամասը լինելու է Աշտարակում՝ դեպի Էջմիածին գնացող մայրուղու վրա: Ըստ նախագծի, թաղամասն ունի երկու շենք և ակումբային շենք: Ընդհանուր 488 միավոր բնակելի տարածք է, որտեղ կլինեն մեկից երեք սենյականոց բնակարաններ` մոտ 2000 մարդու համար նախատեսված:

«Այստեղ երկհարկանի վիլլայի նման լուծումներ էլ կան, որոնք 2 և 4 սենյականոց են: Ընդհանուր նախագիծն ունի նաև խանութային մաս, որից եկած մուտքը պիտի գործածվի շենքերը պահպանելու և մաքուր պահելու ծախսերի համար: Ակումբը պիտի ծառայի մշակութային կյանքն ապահովելուն: Նաև առողջապահական հատված կլինի, լողավազան թենիսի, բասկետբոլի դաշտեր: Նախատեսվում է նաև մանկապարտեզ կառուցել, եթե անհրաժեշտություն լինի, նաև դպրոց կկառուցվի»,- ասաց ճարտարապետ Վահե Թութունջյանը: 

Թաղամասը կունենա նաև ստորգետնյա ավտոկայանատեղի, որտեղից դեպի տներ մուտք կլինի:

Թաղամասը Հալեպի ճարտարապետական ոճով չի լինելու, քանի, որ դրա համար հալեպյան քարն է անհրաժեշտ, որը խնայողաբար կառուցված շինության համար հնարավոր չէ օգտագործել, այն թանկ արժե: Թաղամասը կկառուցվի հայկական տուֆով:

Սփյուռքի նախարար Հրանուշ Հակոբյանն էլ նշեց, որ ՀՀ Նախագահի հանձնարարությամբ ծրագիրը մեկնարկել է հունիսի վերջին, հողի նվիրատվության հարցը լուծվել է Աշտարակ քաղաքի կողմից: «Մենք եկել ենք նրա համար, որ դուք ունենաք բնակարան լավ պայմաններով, բայց էժան գնով: Մենք ուզում ենք լուծել հայրենիքում արագ հաստատվելու և էժան ձևով բնակարան ձեռք բերելու հարցը: Եթե մարդիկ ցանկանում են այդ տարածքում ապրել, ապա պետք է արդեն սկսվեն նախնական վճարումները: Յուրաքանչյուր մեկն, ով ուզում է բնակարան ունենալ, պետք է ներդրում անի, մենք էլ պիտի գումարներ հայթայթենք, նվիրաբերենք, որ ամբողջացնենք ծրագիրը»,- ասաց նախարարն ու հավելեց, որ այս պահին 625 մարդ է դիմել ծրագրին:

Հարդարված և վերջնական տեսքի բերված բնակարանների քառակուսի մետրը, ըստ նախնական հաշվարկների կարժենա 500-550 ԱՄՆ դոլար, իսկ ոչ հարդարված վիճակում՝ 350-400: Ճարտարապետ Վահե Թութունջյանը նշեց, որ մարդիկ կարող են ընտրել, թե ինչպես և ինչ պայմաններով հարդարեն բնակարանները, բայց դա պետք է արվի միաժամանակ, որպեսզի թաղամասն ամբողջությամբ շահագործման հանձնվի:

Նախարարը նշեց, որ հրավիրել են նաև բանկերին, որպեսզի ներկայացնեն, թե վարկային համակարգը ինչպես կարող է նրանց ֆինանսավորել: Բանկերի ներկայացուցիչներն էլ մանրամասն ներկայացրեցին վարկավորման պայմանները:

Հրանուշ Հակոբյանը լրագրողներին տեղեկացրեց, որ այս պահին ամենամեծ ներդրումն արել է «Գրանդ Քենդի» ընկերությունը. «Օգնության մասին հայտնել են նաև Սամվել և Կարեն Կարապետյանները: Մարդիկ ներդրումներ են կատարում սկսած երկու դոլարից: Կան համայնքներ, որ 5000-ից մինչև 100 000 դրամ են նվիրաբերում: Այս ծրագիրը նաև բարեսիրական ուղղություն պիտի ունենա, ամեն մի հայ պետք է օգնի սիրիահային»: