Ձեր վստահելի աղբյուրը

Հայաստանում գործող մի քանի եզդիական կազմակերպություններ` «Եզդիների համախմբում» հասարակական կազմակերպությունը, «Միդիա-Շանգալ» եզդիների ազգային միավորում հասարակական կազմակերպությունը, «Հայաստանի եզդի երիտասարդներ» հասարակական կազմակերպությունը, «Սինջար եզդիների ազգային միավորում» հասարակական կազմակերպությունը նամակ են հղել «Բարգավաճ Հայաստան» կուսակցության նախագահ Գագիկ Ծառուկյանին` խնդրելով ԲՀԿ համամասնական ցուցակից իրենց ներկայացուցիչը ներկայացվի ԱԺ-ում:

Նամակում նշվում է հետևյալը.

«Դուք հայ ժողովրդի այն զավակներից եք, ով միշտ հատուկ հարգանքով է վերաբերվել Հայաստանում ապրող եզդիներին: Հայ և եզդի ժողովուրդները կողք կողքի կանգնած են եղել պատմական ամենադժվարին պահերին: Եզդիներն իրենց համեստ ներդրումն են ունեցել նաև Հայաստանի երրորդ հանրապետության կայացման գործում: Քանակով ամենամեծ ազգային փոքրամասնությունը լինելով հանդերձ, այնուամենայնիվ, ազգությամբ ոչ մի եզդի մինչ օրս ներկայացված չի եղել նորանկախ Հայաստանի որևէ գումարման Ազգային Ժողովում: Առաջին կուսակցությունը, որը հաշվի առնելով եզդիների շահերը և իր ցուցակում ընդգրկեց նաև ազգային փոքրամասնության ներկայացուցչի, դա ձեր ղեկավարած «Բարգավաճ Հայաստան» կուսակցությունն էր:

Մեր ազգի ներկայացուցիչներ Ռուստամ Մախմուդյանը և Օվչի Ամոյանը ընդգրկված են «Բարգավաճ Հայաստան» կուսակցության համամասնական ցուցակում:

Եվ քանի որ հիմա կա հնարավորություն Ձեր ղեկավարած կուսակցության ցուցակով ԱԺ-ում ունենալ ազգությամբ եզդի պատգամավոր` մենք, Հայաստանի եզդիական համայնքի հազարավոր ներկայացուցիչներս, Ձեզ ենք դիմում խնդրանքով ու մեծ ակնկալիքով, որ այս անգամ մեր համայնքը հուսախաբ չի լինի, ու Ձեր օգնությամբ մենք վերջապես Ազգային ժողովում կունենանք մեր ազգի ներկայացուցչին:

Հարգելի՛ պարոն Ծառուկյան, մենք հավատում ենք Ձեր խոստմանն ու իմաստուն որոշմանը, քանի որ Դուք այն բացառիկ քաղաքական գործիչն եք, ով բազմիցս հայտարարել է, որ կապ չունի, թե մարդը որտեղից է, ինչ ծագում ունի, կարևորը, որ լինի բանիմաց, նվիրված ու լավ անձնավորություն:

Մենք հավատում ենք Ձեզ, Ձեր խոսքին ու գործին: Ամենևին չենք փորձում միջամտել Ձեր ղեկավարած քաղաքական ուժի ներքին գործերին, այլ ներկայացնում ենք այս հարցի վերաբերյալ մեր համայնքի տեսակետը»:

Նշենք, որ ԱԺ «Բարգավաճ Հայաստան» խմբակցության անդամ Գրիգոր Գրիգորյանը, ով հայտնի է «Շերիֆ» մականունով, վայր է դրել պատգամավորական մանդատը: Նրան փոխարինողի շուրջ ԲՀԿ-ում դեռ քննարկումներ են ընթանում, բայց ըստ մամուլի հրապարակումների, Գրիգոր Գրիգորյանին կփոխարինի Հրազդանի հացի գործարանի տնօրենի որդին՝ Տիգրան Ներսիսյանը:

Թեմային առնչվող հրապարակում`

«Շերիֆը» վայր դրեց մանդատը