Ձեր վստահելի աղբյուրը

ՍԴՀԿ Հայաստանյան կառույցի վարչության փոխատենապետ Վազգեն Մեսրոպյանն այսօրվա ասուլիսը սկսեց բոլոր հայերին Քեսաբի ազատագրման առթիվ շնորհավորանքով:

Նա նկատեց, որ Քեսաբը սիրիական բանակի, ինչպես նաև հայ երիտասարդների ուժերով ազատագրվեց: Վազգեն Մեսրոպյանի խոսքով, տեղում է եղել քեսաբցիներից կազմված ինքնապաշտպանության ջոկատը, ինչպես նաև Արցախից իր ընկերների հետ մեկնած Վահան Բադասյանը:

«Ոչ մի այլ ջոկատ Հայաստանից չի գնացել»,- ասաց նա:

Բանախոսի վստահեցմամբ, տեղեկությունները, թե Թուրքիան փակել է սահմանները և չի թողել, որ իր տարածքով ահաբեկիչները փախնեն, ճիշտ չեն:

Անդրադառնալով Քեսաբում տիրող իրավիճակին, նա նշեց, որ հայկական եկեղեցիները, գերեզմանատները քանդված են և այրված: Մինչև հիմա կան տներ, որ այրվում են: Ամենից շատ վնասներ կան Քեսաբի կենտրոնում: Բոլոր եկեղեցիները և ներսից, և դրսից այրված են, խաչերը չկան, նույնիսկ գերեզմաններն են քանդված:

Վազգեն Մեսրոպյանը տեղեկացրեց նաև, որ Քեսաբում ոչ հոսանք կա, ոչ ջուր, ոչ հեռախոսակապ. «Լրիվ ավերված է, պայթեցրել են: Երեկվանից աշխատանքները սկսված են, մաքսիմում 15 օրից կվերականգնվեն: Մի ժամ առաջ խոսեցի Քեսաբ, բոլոր հայ ընտանիքները վերադառնում են: Հայաստանից երեք ընտանիք արդեն գնացել է Քեսաբ: Հիմնականում տղամարդիկ են գնացել: Բանակը չի թողնում, որ շատ ժողովուրդ գա, քանի որ տարածքն ամբողջությամբ ականապատված է, վնասազերծման աշխատանքներ են տանում»:

Վազգեն Մեսրոպյանը հավելեց, որ բոլոր սահմանները բանակի հսկողության տակ են և ինքը չի կարծում, որ Քեսաբի վրա հարձակումը կրկնվի:

Նախորդող հրապարակումներ՝

«Ամենքը փորձում են օր առաջ հասնել տուն». Հայերը վերադառնում են Քեսաբ

Ազատագրված Քեսաբը (Լուսանկարներ)

Քեսաբն ամբողջությամբ ազատագրված է