Ձեր վստահելի աղբյուրը

Արցախի Հանրապետության Ազգային ժողովի նախագահ Աշոտ Ղուլյանի բնորոշմամբ, վերջին շրջանի իրադարձությունները ցույց տվեցին, որ երբ սահմանին իրավիճակը մի քիչ լարվում է, հայերը շատ ավելի հեշտ են համախմբվում:

Ստեփանակերտում՝ Մայր Աթոռի կազմակերպած Արցախ ուխտագնացության շրջանակներում, լրագրողների հետ հանդիպման ժամանակ նա պատասխանեց մի քանի հարցերի: Բացի սահմանային վերջին դեպքերը, նա անդրադարձավ Արցախում երիտասարդների զբաղվածության, ծնելիության, վերաբնակեցման, կոմունիկացիաների, միջազգային կառույցների հետ համագործակցության և այլ հարցերի:

Աշոտ Ղուլյանը նշեց, որ վերաբնակեցման գործընթացը շարունակվում է, և մշտապես ունենալով Արցախի ժողովրդագրական զարգացման ծրագիրը, հետևողականորեն պետք է աշխատեն այդ ուղղությամբ:

Panorama.am-ի հարցին, կա՞ն երիտասարդ ընտանիքների աջակցության և ծնելիության խթանման ծրագրեր, ԼՂՀ ԱԺ նախագահը պատասխանեց, որ դրանք տարրաբնույթ են և թվարկեց մի քանիսը: Մասնավորապես նա հայտնեց, որ Արցախում ապրող ընտանիքն ամեն մի երեխայի ծնունդի հետ գումար է ստանում, իսկ 6-րդ երեխայից սկսած՝ նոր բնակարան:

«Վերջին տարիների համեմատ բնակչության ոչ շատ աճ է եղել, ոչ էլ նվազել է: Ես չեմ կարող ասել, որ արտագաղթ չկա, բայց դա այն ծավալի չէ, որը մտահոգի: Հիմնականում գնում են աշխատելու համար»,- հավելեց նա:

Անդրադառնալով Արցախում ճանապարհների կառուցման և նորոգման խնդիրներին, ԱԺ նախագահը տեղեկացրեց, որ 1994-95 թվականներից սկսած մեծ ռազմավարական ծրագրեր են իրականացրել:

«Ինչ վերաբերում է գյուղերն իրար կապող ճանապարհներին, ապա դրանք շարունակական աշխատանքներ են, ամեն տարի Արցախի բյուջեից գումարներ ենք դնում դրա համար: Կարծում եմ, որ առաջիկա երկու տարիներին շատ լուրջ օժանդակություն է լինելու Վարդենիս-Մարտակերտ ճանապարհի կառուցումը, այդ տարածքում բոլոր գյուղերն էլ կապված են մայրուղուն, հետևաբար այն շատ մեծ ենթակառուցվածքների խնդիր է լուծելու: Մենք մինչև 2015թվականը ենթակառուցվածքային առումով շատ ավելի զարգացած համակարգ ենք ունենալու Արցախում: Բայց դրանով չպետք է ավարտած համարել մեր աշխատանքը, այս տարիների համար ծրագրվում է նաև Հայաստանը Արցախին կապող մեծ էներգոհամակարգի հիմնումը»,- ասաց նա:

ԱԺ նախագահը խոսեց նաև Արցախում միջազգային կառույցների ծրագրերի բացակայության մասին: Աշոտ Ղուլյանի խոսքով, այս հարցում լուրջ խոչընդոտներ կան, և դրսից դրամաշնորհներ չեն գալիս: Պատճառը ոչ թե կազմակերպություններն են կամ Արցախի իշխանությունները, այլ Արցախի կարգավիճակը և Ադրբեջանական կողմի ընդգծված գործողություններն ու քարոզչությունը:

Մանրամասն՝ Panorama.am-ի տեսանյութում:

Արցախ այցը կազմակերպված էր Վեհափառ Հայրապետի օրհնությամբ, Մայր Աթոռ Սուրբ Էջմիածնի նախաձեռնությամբ և World Vision կազմակերպության աջակցությամբ: