Ձեր վստահելի աղբյուրը

Այսօր Նորքի 9-րդ զանգվածի բնակարաններից մեկում նռնակի պայթունից տուժած 4-ամյա երեխային այս պահին վիրահատում են: Ինչպես Panorama.am-ին հայտնեցին «Սուրբ Աստվածամայր» բժշկական կենտրոնից, երեխան հիվանդանոց է տեղափոխվել ծանր վիճակում:

«Երեխայի վիճակը շատ ծանր էր, արդեն 40 րոպե է վիրահատությունը սկսվել է, բոլոր բժիշկները մասնակցում են վիրահատությանը»,- ասացին բժշկական կենտրոնից:

Հիշեցնենք, որ այսօր, ժամը 12.40-ին, ոստիկանության Երևան քաղաքի վարչության օպերատիվ կառավարման կենտրոնից Նոր Նորքի բաժնում հաղորդում է ստացվել, որ իրենց է ահազանգել մի քաղաքացուհի և հայտնել, որ Նոր Նորքի 9-րդ զանգվածի 17-րդ շենքի բնակարաններից մեկում վիճաբանություն է տեղի ունենում, և հնարավոր է, սպանություն է կատարվել: 

Ոստիկանության լրատվական ծառայությունը հայտնում է, որ անմիջապես նշված հասցե մեկնած օպերատիվ խումբը պարզել է, որ 1969 թ. ծնված Անահիտ Խ.-ի ամուսինը, կենցաղային հարցերի շուրջ ծագած վիճաբանության ժամանակ, ձեռքին եղած նռնակը պայթեցրել է, ինչի հետևանքով Անահիտ Խ.-ն և 2011 թ. ծնված Է. Դ.-ն մարմնական վնասվածքներով տեղափոխվել են հիվանդանոց:

Ոստիկանների ձեռնարկած արագ և անհետաձգելի միջոցառումների շնորհիվ հայտնաբերվել և ոստիկանության Նոր Նորքի բաժին բերման է ենթարկվել նշված հանցագործությունը կատարելու մեջ կասկածվող , 1963 թ. ծնված Մելիք Գալստյանը: Ձեռնարկվում են միջոցառումներ դեպքի բոլոր հանգամանքները պարզելու ուղղությամբ: Կատարվում է քննություն:

Նախորդող հրապարակում`
Նոր Նորքի բնակարաններից մեկում նռնակ են պայթեցրել. 4-այմա երեխան տեղափոխվել է հիվանդանոց