Ձեր վստահելի աղբյուրը

 Մեծ պահքի 6-րդ օրն է. Սուրբ Թեոդորոս զորավարի հիշատակության օրը:

«Այս օրը Հայոց Եկեղեցին տոնախմբում է հիշատակը հռոմեացի Թեոդորոս զորահրամանատարի, ով ճանաչելով ճշմարիտ Աստծուն` հրաժարվում է երկրպագել կուռքերին ու չաստվածներին: Աստծու վկան կանչվում է դատարան, ապա ժամանակավոր ազատ արձակվելով հրկիզում է չարիքի որջը` Ռեայի հեթանոսական տաճարը, ինչի համար և նահատակվում է:

Օրվա ընթերցվածքը պատշաճաբար խոսում է մեզ քրիստոնեական մեր առաքելության մասին. «Ահա ես ձեզ ուղարկում եմ որպես ոչխարներ` գայլերի մեջ, …ձեզ պիտի տանեն …թագավորների առաջ իմ պատճառով, որ իմ մասին վկայություն տաք նրանց և հեթանոսներին» (Մատթ. 10.16-18): Յուրաքանչյուր քրիստոնյա պատվեր ունի Տիրոջից` իր կյանքով, ընդհուպ մինչև նահատակություն, վկայելու ճշմարիտ Աստծուն:

Թվում է, թե այսօր նահատակության հարցն արդիական չէ: Սակայն այդպես չէ, որովհետև աշխարհի տարբեր ծագերում այսօր էլ քրիստոնյաները շարունակվում են հալածվել և հետապնդվել: Անգամ խաղաղության մեր պայմաններում մատնվում, տանջվում և հալածվում է յուրաքանչյուր քրիստոնյա, քանզի հոգևոր մարտը վայր ու ժամանակ չի ճանաչում և երբեք չի դադարում: Եվ ինչպես սբ Թեոդորոս զորավարն իր հավատը` վահան և Քրիստոսի մասին վկայությունը սուր դարձրած պայքարեց և արժանացավ անթառամ պսակին սրբերի պայծառացյալ դասի մեջ, այնպես էլ այսօր քրիստոնյան պիտի մաքառի իր և իրեն շրջապատող աշխարհի մեղքերի, մոլությունների և գայթակղությունների դեմ` չմտահոգվելով, թե ինչ պիտի ասի, «որովհետև այդ ժամի ձեզ կտրվի այն, ինչ պիտի խոսեք» (Մատթ. 10.19), որովհետև Հոր հոգին է խոսում նման պարագաներում մեր միջոցով:

«Ամեն ինչ գործակից է լինում նրանց բարիքի համար, ովքեր սիրում են Աստծուն, որոնք և կանչվեցին նրա նախասահմանումով», - ասում է այսօրվա առաքելական թուղթը` հուշելով, թե մենք` կանչված լինելով Քրիստոսից, գործակից ունենք նույն Տիրոջը, ով երբեք մեզ մենակ չի թողնի` մռնչացող թշնամու առջև: Եթե Աստված մեր կողմն է, ո՞վ կլինի մեզ հակառակ: Եվ եթե ճանաչում ենք Աստծուն, եթե ամուր է մեր հավատը, ապա, իրավացի է Պողոս առաքյալը, որ ասում է` ոչ ոք` ո´չ կյանքը, ո´չ մահը, ո´չ մի զորություն և այլ արարած չի կարող բաժանել մեզ Նրանից, ով իր կյանքը տվեց մեզ համար:

Ուստի Քրիստոսով պատրաստ լինենք հալածանքների, հոգևոր և մարմնական զրկանքների, նաև` ատելության և արհամարհանքի` մշտապես հիշելով տերունական խոսքը` «ով մինչև վերջ համբերի, նա պիտի փրկվի»»,- ֆեյսբուքյան էջում գրել է Մայր Աթոռ Սուրբ Էջմիածնի տեղեկատվական համակարգի ղեկավար, Տեր Վահրամ քահանա Մելիքյանը:

Հիշեցնենք, որ փետրվարի 16-ից սկսվել է Մեծ Պահքի շրջանը: Այն տևում է 48 օր` Բուն Բարեկենդանից մինչև Ս. Հարության (Զատկի) տոնի նախօրեն: Այս տարի Ս. Հարության տոնը կնշվի ապրիլի 5-ին:

Նախորդող հրապարակումներ՝

Մեծ պահք. Երկու կարևոր պատվիրան-դեղատոմս է տրվում այսօր մեզ
Մեծ պահք. Պողոս առաքյալի կարևոր պատգամներն են
Տեր Վահրամ. Մեծ պահքին ընդառաջ արտասովոր աշխուժություն է տիրում