Ձեր վստահելի աղբյուրը

Մեծ պահքի 19-րդ օրն է:

««Ես` Տեր Աստվածս, արդարությամբ կանչեցի քեզ, բռնեցի քո աջ ձեռքից և զորավոր դարձրի քեզ, իբրև ուխտ տվեցի քեզ ժողովրդին և իբրև լույս` հեթանոսներին, որպեսզի կույրերի աչքերը բանաս և խավարի մեջ նստած կալանավորներին հանես բանտից ու զնդանից: Ե´ս եմ Տեր Աստվածը, սա է իմ անունը, իմ փառքը ուրիշին չեմ տա, ոչ էլ իմ քաջությունը` կուռքերին» (Ես. 42.6-8): Սա Աստծու խոսքն է` ուղղված Եսայի մարգարեին, որն այսօր վերստին հնչեցվում է մեզ համար:

Այս առիթով վերհիշենք Ղազարոսի և մեծահարուստի ավետարանական պատմությունը: Վերջինս դժոխքից խնդրում էր Աբրահամին, որի գոգում հանգչում էր աղքատ Ղազարոսը, որ գոնե մեկին ուղարկի իր եղբայրներին զգուշացնելու, թե ինչպես ապրեն, որ նույն տեղում չհայտնվեն: Նրա խնդրանքը մերժվում է այն նկատառումով, թե բազում մարգարեներ, առաքյալներ գնացին ու նրանց չհավատացին, մեռելներից հարություն առած մեկի՞ն պիտի հավատան ու ապաշխարեն:

Արդյո՞ք այդ մեկին պիտի հավատային մեծահարուստի զեխ ու շվայտ կյանքով ապրող, պատվիրաններն անտեսող եղբայրները, որոնց չէր համոզել դրանում անգամ մարգարեների և առաքյալների կենդանի վկայությունը: Այդպես և մենք, որ ստացանք Հիսուս Քրիստոսի Խաչի և Հարության վկայությունը, հաճախ մեր հավատի տկարությամբ մոռանում ենք այդ մասին և ակնկալում այլ, ավելի շոշափելի նշաններ: Մինչդեռ չկա և չի տրվելու ավելի մեծ նշան, քան Միածին Որդու գալուստն աշխարհ: «Երանի´ նրանց, որոնք չեն տեսել և սակայն կհավատան», - ասաց Տերը անհավատ Թովմասին (Հովհ. 20.29):

Հիրավի, Տիրոջն է փառքը, և մենք ամենքս պիտի այդ փառքը հավելենք մեր բարի գործերով, պիտի յուրաքանչյուրս յուրօրինակ ուխտ դառնանք մեր ժողովրդի, հասարակության, ընտանիքների համար և լույս` հեթանոսության մեջ խարխափոխների, ճշմարիտ Աստծուն չճանաչողների համար: Չէ՞ որ Աստված մեզ զորություն է տալիս մեր հաջողությունների համար, ուժ` մեր հավատին, որպեսզի բարձրանանք, և ո´չ թե մեծամտանանք, հպարտանանք, այլոց անտեսենք, այլ բարձրացնենք և առաջնորդենք դեպի իրական արժեքներ ու ճշմարիտ աստվածճանաչողություն` Քրիստոսի խոնարհության, հեզության, տառապանքի ու սիրո արդար ընկալում:

Բոլորս, ինչպես և մարգարեի պարագային էր, կոչված ենք որոշակի առաքելության, ծառայության ու պաշտոնի: Մեզ տրվում են կարողություններ և հնարավորություններ, սակայն եթե մենք Աստծու հետ չենք, չարաշահում ենք դրանք և անձնական շահին ծառայեցնում և, փաստորեն, Աստծու պարգևած քաջությունը տարբեր կուռքերին տալիս: Ցավոք, մեր հասարակության մեջ այս ամենն առավել կամ նվազ չափով առկա է:

Գեթ մեկ վայրկյան անկեղծորեն մտորենք այս մասին և այդ վայրկյանը կվերափոխի մեր կյանքը, նաև հեռու կպահի մեզ` մեր կյանքում որևէ տեսակի անաստված ու սին կռապաշտությունից»,- ֆեյսբուքյան էջում օրվա խորհրդի մասին գրել է Մայր Աթոռ Սուրբ Էջմիածնի տեղեկատվական համակարգի ղեկավար Տեր Վահրամ քահանա Մելիքյանը:

Հիշեցնենք, որ փետրվարի 16-ից սկսվել է Մեծ Պահքի շրջանը: Այն տևում է 48 օր` Բուն Բարեկենդանից մինչև Ս. Հարության (Զատկի) տոնի նախօրեն: Այս տարի Ս. Հարության տոնը կնշվի ապրիլի 5-ին:

Նախորդող հրապարակումներ՝
Մեծ պահք. «Իբրև քրիստոսադրոշմ ժողովուրդ, լինենք մեկ մարմին` պահելով հոգու միությունը խաղաղության կապով»
Մեծ պահք. «Հավիտենական կյանքը ժառանգելու և վայելելու պայմանը մեր պահվածքն է»
Մեծ պահք. Աստված վարձահատույց է լինում նրանց, ովքեր փնտրում են Իրեն անպայման, անշահախնդիր ու անբիծ հավատով
Մեծ պահք. «Սա գագաթնակետն է հոգևոր կյանքի ընկալման»
Մեծ պահքի խորհրդանշական շղթայի առաջիկա կիրակին
Մեծ պահք. Ընդհանրական Եկեղեցու երեք սրբի հիշատակության օրն է
Մեծ պահք. «Անհագ մարդկային բնությունը հոժար չէ հաջողության ու օրհնաբեր իրողությունների մեջ փառքը կիսել որևէ մեկի հետ»
Մեծ պահք. Ինչպե՞ս վարվենք
Մեծ պահք. «Մենք` իբրև «ազգ և ժողովուրդ» հասկացությունը մարմնավորող անհատներ, պիտի սթափվենք»
Մեծ պահք. «Այս օրերին եկեք ձերբազատվենք մեր կյանքը բեռնավորած կուռքերից»
Մեծ պահք. «Ապրենք Տիրոջ երկյուղով, ինչը, հիրավի, կիմաստացնի մեզ»
Մեծ պահք. «Անգամ խաղաղության մեր պայմաններում մատնվում, տանջվում և հալածվում է յուրաքանչյուր քրիստոնյա»
Մեծ պահք. Երկու կարևոր պատվիրան-դեղատոմս է տրվում այսօր մեզ
Մեծ պահք. Պողոս առաքյալի կարևոր պատգամներն են
Տեր Վահրամ. Մեծ պահքին ընդառաջ արտասովոր աշխուժություն է տիրում
Սկսվում է Մեծ Պահքի շրջանը