Ձեր վստահելի աղբյուրը

ՀՀ Գիտությունների ազգային ակադեմիայում բացվեց էքսպո-ցուցահանդես, որտեղ ներկայացված են ՀՀ նախագահի հովանու ներքո իրականացվող «Երիտասարդ գիտականների աջակցության ծրագրի» շրջանակում ֆինանսավորում ստացած 23 գիտական և հասարակական կազմակերպությունների գործունեությունը, մասնավորապես գիտական տարբեր միջոցառումների ժամանակ  ստացած արդյունքները:

Երիտասարդ գիտնականների խորհրդի նախագահ, «Երիտասարդ գիտնականների աջակցության ծրագրի» ղեկավար մարմնի անդամ Գևորգ Վարդանյանը լրագրողների հետ զրույցում ասաց, որ երիտասարդ գիտնականները ծրագրի շրջանակներում բավականին շատ աշխատանքներ ունեն կատարած, նաև տպագրվել են հոդվածներ, գրքեր:

«Տարբեր ոլորտներում իրականացված ծրագրերի արդյունքը շոշափելի է»,- ընդգծեց նա՝ հավելելով, որ սկսած 2012 թվականից «Երիտասարդ գիտնականների աջակցության ծրագրի» ընդհանուր բյուջեն կազմում է 300 միլիոն դրամ:

ԳԱԱ Արմեն Նազարովի անվան երկրաֆիզիկայի և ինժեներային սեյսմաբանության ինստիտուտի տնօրեն Ջոն Կարապետյանն ասաց, որ այս ծրագրի շրջանակում իրենք զրոյից մշակել են մի սարք, որը հնարավորություն է տալիս ուսումնասիրել շենքերի խոցելիությունը:

«Այսօր շատ կարևոր է ուսումնասիրել, թե որ շենքերն են իրենց սեյսմակայունությամբ խոցելի, վնասվածության աստիճանը, որոնք են ենթակա ամրացման: Կիրառելով ինֆորմացիոն տեխնոլոգիաները, մենք կարողացանք անալոգայինից անցնել և համակարգչով միանգամից ստանալ մեզ անհրաժեշտ տեղեկատվությունը»,- ասաց նա:

«Երիտասարդ Կենսաբանների ասոցիացիա» ՀԿ փոխնախագահ Սարգիս Աղայանը Panorama.am-ի հետ զրույցում նշեց, որ ծրագրի դրամաշնորհների արդյունքում իրենք իրականացրել են մի շարք միջոցառումներ, դասախոսություններ՝ Հայաստան հրավիրելով ոլորտի Նոբելյան մրցանակակիրներին, կապ են հաստատում արտասահմանում գործունեություն ծավալող հայազգի գիտնականների հետ, փորձում են նրանց հրավիրել Հայաստան:

««Երիտասարդ գիտնականների աջակցության ծրագիրը» հիանալի գաղափար է, օգտվում են բազմաթիվ գիտնականներ, ուղղակի անհրաժեշտ է անընդհատ ավելացնել ֆինանսավորումը»,- ասաց Ս. Աղայանը:

Ճարտարապետության ազգային թանգարան-ինտիտուտի գիտական քարտուղար Անի Հայկազուն Գրիգորյանի խոսքով, ծրագրի շրջանակներում իրենք 2014 թ. կազմակերպել են Թորոս Թորամանյանի ծննդյան 150-ամյակին նվիրված երիտասարդական միջազգային գիտաժողով, ինչպես նաև տպագրվել է «Երևանի մեմորիալ հուշարձաններ» գիրքը, որի հեղինակը հենց ինքն է:

Ինչ վերաբերում է այն հարցին, թե երիտասարդ գիտնականներն հիմնականում ի՞նչ խնդիրների են բախվում Հայաստանում, մեր զրույցակիցներից Գևորգ Վարդանյանն ասաց, որ ունեն սոցիալական խնդիրներ, ինչպես նաև կարևոր խնդիրներից է գիտական ենթակառուցվածքների՝ ժամանակին ոչ հարիր լինելը: Այսօր, ըստ նրա, առաջնային խնդիրներից է գիտության երիտասարդացման վերաբերյալ հայեցակարգի ընդունումը, որը մշակված է, սակայն մինչ օրս օրենքի ուժ չի ստանում:

«Մենք 2012 թվականին երկրի ղեկավարի հետ հանդիպման ժամանակ բարձրաձայնել ենք մի շարք հարցեր, որոնց մի մասն իրենց լուծումն արդեն ստացել են»,-ասաց նա:

Սարգիս Աղայանի խոսքով, Հայաստանում գիտությամբ զբաղվելու ամենամեծ խոչընդոտը գիտնականի խղճուկ աշխատավարձն է, որը ոչ մի չափորոշիչի մեջ չի տեղավորվում:

«Իհարկե, սա ազդում է մեր գիտության զարգացման վրա: Ինքս ստանալով ցածր աշխատավարձ, նաև բիզնեսով եմ զբաղվում: Բայց կարող եմ այդ ժամանակը տրամադրել հոդված գրելուն կամ փորձեր անելուն: Այսինքն՝ եթե ցանկանում ես զբաղվել գիտությամբ, կամ պետք է հեռանաս Հայաստանից, կամ պետք է բարձր աշխատավարձ տան»,-ասաց նա:

Միաժամանակ երիտասարդ գիտնականը նշեց, որ չնայած այս ամենին, Հայաստանը գիտությամբ հետ չի մնում աշխարհից. «Այսօր հագեցած լաբորատորիաներ ունենք, սակայն երիտասարդ գիտնականների մեծ արտահոսք կա, ինչպես արդեն նշեցի՝ հենց աշխատավարձի պատճառով: Դժվար է երիտասարդներին ներգրավել գիտության ոլորտ, եթե չես տալիս այնպիսի աշխատավարձ, որ կարողանա իր գլուխը պահել»:

Անի Հայկազուն Գրիգորյանն էլ այն կարծիքին է, որ երիտասարդ գիտնականների ներուժը, մտահղացումները, միշտ չէ, որ գնահատվում է Հայաստանում, ինչպես նաև չկա համապատասխան աշխատանք, լինելու դեպքում էլ վարձատրությունը ցածր է: Բայց և այնպես երիտասարդ գիտնականը համոզված է. «Եթե սիրում ես քո աշխատանքը և գիտես, որ ինչ-որ մի օր շատ ավելի լավ է լինելու, քան այսօր, թեկուզ այդ սակավ գումարով կարող ես աշատել և օգուտ բերել այն բնագավառին, որտեղ աշխատում ես»:

ՀՀ նախագահի հովանու ներքո իրականացվող «Երիտասարդ գիտականների աջակցության ծրագրի» նպատակն է նպաստել Հայաստանում գիտության առաջընթացին և կադրային ներուժով համալրման գործընթացին, ինչպես նաև աջակցել Հայաստանի երիտասարդ գիտնականների ստեղծագործական զարգացմանը: Ծրագիրն ունի յոթ հիմնական ուղղվածություն՝ երիտասարդ գիտնականներին միջազգային գիտական գործուղումների ֆինանսական աջակցության տրամադրում, երիտասարդ գիտնականների գիտաժողովների, սիմպոզիումների, դպրոցների, սեմինարների կազմակերպման ֆինանսական աջակցության տրամադրում, գիտական դրամաշնորհների տրամադրում, երիտասարդ գիտնականների հեղինակած գրքերի տպագրության համար ֆինանսական աջակցության տրամադրում, երիտասարդ գիտնականներին գիտական սարքերի կամ նյութերի ձեռքբերման համար ֆինանսական աջակցության տրամադրում, ազդեցության գործակից ունեցող պարբերականներում երիտասարդ գիտնականների գիտական հոդվածների տպագրության համար ֆինանսական աջակցության տրամադրում, մրցանակաբաշխության կազմակերպում: