Ձեր վստահելի աղբյուրը

Առողջապահության նախարարությունը, ԳՆ սնդամթերքի անվտանգության ծառայությունը Կապանում գրանցված բրուցելոզի դեպքերի մասին բարձրաձայնեցին միայն «Իրազեկ և պաշտպանված սպառող» ՀԿ-ի ահազանգից հետո: Կարելի է ենթադրել, եթե խնդիրը չհրապարակայնացներ կազմակերպությունը, պետական մարմիններն այդպես էլ Սյունիքում արձանագրված դեպքերի մասին չէին խոսելու: Նկատենք, որ տեղի ունեցածի մասին դեռևս չի խոսել Գյուղատնտեսության նախարարությունը:

ՀԿ նախագահ Բաբկեն Պիպոյանն աշխատանքային խմբով եղել է Կապանում, պարզել է, որ հիվանդության առաջացման պատճառը միանշանակ սպանդանոցն է, այլ հայտարարություններ կարող է անել միայն ձեռքի տակ եղած տվյալների ուսումնասիրությունից ու վերլուծությունից հետո:

«Միանշանակ պատճառը սպանդանոցն է, սակայն պետք է պարզել, սպանդանոցում առկա խնդիրը տնտեսվարողի՞ց է գալիս, թե պետությունից: Սա ուսումնասիրության կարիք ունի, այն որ մարդիկ սպանդանոցում են վարկվել, այստեղ երկրորդ կարծիք լինել չի կարող: Բայց արդյոք սպանդանոցն ունի՞ իր մեղավորությունը, թե՞ պետությունն է ավելի մեղավոր, սա դեռ հստակ չէ»,-ասաց ՀԿ նախագահը:

Պիպոյանն ավելացրեց, որ իրեն տրամադրած տեղեկությունների համաձայն կենդանիները սպանդանոց են բերվել առողջության մասին ուղեկցող փաստաթղթերով, իրենք մորթ են իրականացրել, միսն էլ արտահանվել է Իրան: Սպանդանոց կենդանիներ բերվել են ոչ միայն Սյունիքից, այլև տարբեր մարզերից: Այսօր սպանդանոցը չի գործում, որովհետև պատվեր չունի, «պատվեր ունենա, վաղն էլ կգործի, այնպես չի, որ պետություն է փակել»:

Panorama.am-ին Պիպոյանը հայտնեց, որ Սյունիք է մեկնել առանց ձեռքի տակ ունենալու պատկան մարմինների կողմից տրամադրած տեղեկություններ: Արդեն այնտեղ հանդիպել է հիվանդներին, բուժող բժիշկին:

«Խոստացել եմ փոխանցել, որ հիվանդները շատ գոհ էին բուժող բժիշկներից: Նրանք են հիվանդներին ասել, գիտե՞ք, եթե դուք վարակվել եք, հնարավոր է ձեր ընկերներն էլ վարակված լինեն: Սա մի անձի, ոչ թե համակարգի ձեռքբերում է, համակարգն ունի լուրջ պրոբլեմ, պետք է տնտետուն գնային և ստուգեին հիվանդների ընտանիքի անդամներին»,-ասաց Պիպոյանը:

Կապանում հայտնի է դարձել, որ հիվանդները 18-ն են, որից մեկը բուժում է ստանում Երևանում: Առաջին հիվանդը հիվանդանոց է դիմել է փետրվարի 20-ին: Պիպոյանը կարծում է, որ այդ մասին նախարարությունը տեղյակ է եղել հենց առաջին օրերին, իսկ եթե ոչ՝ ապա խնդիրն այստեղ ավելի է բարդանում:

«Մարտի սկզբից նախարարությունը տեղյակ է եղել, որ հիվանդների թիվն ավելանում, ու չգիտես ինչու մինչ մեր կողմից հայտարարություն տարածելը, պատկան մարմինները բացարձակապես լռություն են պահպանել, ոտնահարելով քաղաքացիների տեղեկատվություն ստանալու իրավունքը»,-ասաց նա:

Հարցին, թե ինչո՞ւ են պետական մարմինները փորձել թաքցնել իրողությունը, Պիպոյանը մի քանի պատճառ է նշում.
«Այն որ թաքցնում էին, միանշանակ է: Պետությունը պետք է ասի, թե ինչո՞ւ: Լռել են բոլորը միանշանակ: Ես դրա համար մի քանի պատճառ կարող եմ նշել, որովհետև տարեսկզբին Սյունիքում արձանագրվեց նաև հեպատիտի պատմությունը, հնարավոր է վակցիանացման համակարգի ներդրումն է պատճառը, ի վերջո չգիտենք տնտեսվարողի հետ ով ինչ պայմանավորվածություն կարող էր ունենալ առաջին օրվա համար: Հնարավոր է, որ ուզեցել են ծածկադմփոց անեն, լղոզեն, գնա»:

Պիպոյանն ուշադրություն է հրավիրում այն հանգամանքին, որ Սյունիքում իրականացվել է բրուցելոզի դեմ վակցինացման պիլոտային ծրագիրը, և հենց այս մարզում էլ գրանցվում է դեպքը:

«Ես չեմ ասում, վակցինացումը վատ բան է, ես ասում էի Հայաստանում առկա ենթակառուցվածքների պարագայում այդ համակարգը մեզ մոտ չի կարելի ներդնել: Հիմա շատերը կասեն, որ զուգադիպություն է: Լավ, ինչպե՞ս եղավ, որ մեր կանխագուշակած վատ բանը եղավ ու հենց Սյունիքում, որը միակ մարզն է, որտեղ ներդրվել է այդ պիլոտային համակարգը»,-ասաց նա:

Պիպոյանը վարակի մասին հակասական բաներ է լսել հիվանդներից, սակայն չի ցանկանում լսածները հրապարակել, ասում է՝ հայտարարություն կանի ձեռքի տակ եղած փաստաթղթերն ու ինֆորմացիան մանրամասն վերլուծելուց հետո. «Չի կարելի ժամանակավրեպ հայտարարություններ անել»:

«Այսօր հայտնի է 18 հիվանդի մասին, սակայն սպանդանոցում աշխատել է 47 մարդ: Մյուսներն ուղղակի չեն ստուգվել, չգիտենք, հիվա՞նդ են, թե՞ առողջ: Մեր հայտարարությունից հետո նոր ասում են, թե ստուգումներ են իրականացնելու»,-ասաց ՀԿ նախագահը:

Նախորդող հրապարակումներ՝
«Կապանի 6 բնակիչ տեղափոխվել է հիվանդանոց». «Իրազեկ և պաշտպանված սպառող» ՀԿ
ՍԱՊԾ. Կապանում բրուցելոզով հիվանդների թիվը 17-ն է
ԱՆ ուշացած արձագանքը Կապանում բրուցելոզի դեպքերի վերաբերյալ