Ձեր վստահելի աղբյուրը

«Ակնհայտ է, որ գայլերը գյուղացիների վրա հարձակվում են քաղցած լինելու պատճառով, իսկ որոշ կենդանատեսակների որսն արգելելով՝ մենք այդ գիշատիչների համար անհրաժեշտ սնունդ կապահովենք»,-այսօր լրագրողների հետ հանդիպմանն ասաց բնապահպան Սիլվա Ադամյանը:

Նա նշեց, որ բնապահպանության նախարարությունը խիստ մտահոգ է գայլերի կողմից մարդկանց վրա հարձակման դեպքերի հաճախակիացմամբ, ուստի նրանց ոչնչացնելուց զատ այլ միջոցառումներ էլ է ձեռք առել, մասնավորապես՝ արգելել այն կենդանիների որսը, որոնցով սնվում են գայլերը:

Հիշեցնենք, որ մարտի 24-ին Վայոց Ձորի Չիվա գյուղում գայլը հարձակվել է սիբեխ հավաքող կանանց վրա: 5 կանանց վրա հարձակում գործած գայլը ճանկերով վնասել էր երկու կանանց դեմքը, իսկ մյուսներին վնասվածք էր հասցրել մարմնի այլ մասերին:

«Մենք նախատեսում ենք Լոռու մարզում հատուկ ֆոնդ հիմնել և հատուկ ծրագրով կրթել գյուղացիներին՝ ինչպես պաշտպանվել գայլերի հարձակումներից: Այս նպատակով մենք դիմել ենք բրիտանական կենդանապաշտպան մի կազմակերպության, և չնայած տրամադրվելիք շատ փոքր գումարին՝ ուզում ենք գործը կատարել»,- ավելացրեց բնապահպանը:

Նրա խոսքերով՝ որպես կանոն, դուրս մնացած ծեր, հիվանդ գայլերն են հարձակվում մարդկանց վրա, որոնք բնության մեջ լուրջ որսի ընդունակ չեն:

Հանդիպմանը ներկա բնապահպան Կարինե Փանոսյանն էլ նշեց, որ Հայաստանում բացի Արփի լճի ավազանում 2012-ին իրականացված մի հետազոտությունից, գայլերի կենսամիջավայրի, տեղաշարժի հետ կապված որևէ ուսումնասիրություն չի կատարվել: