Ձեր վստահելի աղբյուրը

ՀՀ Ազգային ժողովի նախագահ Գալուստ Սահակյանն այսօր Հաղթանակի զբոսայգում լրագրողների հետ զրույցում անդրադառնալով մայիսյան Եռատոնին՝ ասաց, որ հպարտանալու տեղ ունենք:

«Մենք չունենալով ոչինչ, կարողացել ենք արցախյան հաղթանակը հասանելի դարձնել: Դա մեր գեների մեջ է: Այսօր էլ մեր զիվորները կարողանում են պահպանել մեր սահմանները»,-նշեց նա:

Նրա խոսքերով, որպեսզի այսօր 21-րդ դարը և մարդկությունը խաղաղ լինի, պետք է քաղաքականությունը զիջի քաղաքակրթությանը:

«Այսօր մենք բոլորին կոչ ենք անում միանալ ընդդեմ ցեղապանության պայքարին, բազմաթիվ խորհրդարաններ միացել են այդ պայքարին»,- ասաց Գ.Սահակյանը:

ԱԺ նախագահը խոսելով Հայրենական մեծ պատերազմից, ասաց, որ պատերազմի ժամանակ հայրը վնասել է ձեռքը:

«Ընտանիքի ամենափոքր անդամն եմ եղել, երբ չափահաս դարձա, շատ հպարտությամբ էի նայում հորս»,- նշեց Գ.Սահակյանը:

ԱԺ նախագահ Գալուստ Սահակյանը շնորհավորական ուղերձ է հղել նաև Շուշիի ազատագրման օրվա ու Հաղթանակի և խաղաղության տոնի առթիվ։ Այս մասին տեղեկացնում է ՀՀ ԱԺ հասարակայնության և տեղեկատվության միջոցների հետ կապերի վարչությունը:

Ուղերձում ասվում է.

«Սիրելի՛ հայրենակիցներ, ջերմորեն շնորհավորում եմ Շուշիի ազատագրման օրվա ու Հաղթանակի և խաղաղության տոնի առթիվ:

Տարեցտարի մեր հաղթանակները ժամանակային իմաստով անցյալ են դառնում, սակայն տարեցտարի դրանք ավելի են արժևորվում և ուղղորդում դեպի նոր հաղթանակներ:

Շուշիի ազատագրումը հայկական ռազմարվեստի և հոգևոր կարողությունների համադրման ծնունդ էր, ինչը նշանակում է, որ զենքով հաղթելու, հայրենիքն ազատագրելու և պաշտպանելու համար մշտապես պետք է հարուստ ու հզոր պահենք մեր ներսում եղած հայրենիքը՝ մեր ներաշխարհը: Բոլոր ժամանակների մեր հաղթանակները՝ թե՛ Հայկի ու Տիգրան Մեծի ժամանակներում, թե՛ Երկրորդ համաշխարհային պատերազմի և Արցախյան ազատամարտի ժամանակ ծնվել են՝ այդ ամենը մեր բազկի ուժի հետ միասնական գործադրելով:

Հաղթանակները, ազատության ձեռքբերումը նշանակում են մեր կամքի, արժեքների և հայրենիքի հանդեպ սիրո հաղթարշավ: Ազատությունը ոչ ոք չի նվիրում, այն ձեռք է բերվում, նվաճվում, շատ հաճախ նաև կյանքի գնով: Այդպես էր և 70 տարի առաջ, երբ մեր նախնիների հերոսական մասնակցությամբ կերտվեց հաղթանակը գերմանական ֆաշիզմի հանդեպ, այդպես էր նաև ավելի քան 20 տարի առաջ, երբ մեր սերնդակիցների ձեռամբ Շուշին ազատագրվեց ադրբեջանական ֆաշիզմից: Ժամանակը հսկայական իշխանություն ունի, բայց դա անսահմանափակ չէ, որովհետև զիջում է մարդկային հիշողությանը: Մենք երբեք չենք մոռանում տարբեր ժամանակներում և տարբեր ճակատամարտերում մարտնչած, հաղթանակներ կռած զինվորին, ազատամարտիկին ու կամավորին:

Սիրելի՛ հայրենակիցներ, մենք հաղթանակներ կերտում ենք առանց խաղաղության կամ որևէ մեկի ազատության դեմ ոտնձգության, որովհետև մեր պատմության էջերի շնորհիվ շատ լավ գիտենք ե՛ւ խաղաղության, ե՛ւ ազատության գինը: Ազատությունն ու խաղաղությունը կարելի է կորցնել ոչ միայն պատերազմում կամ ճակատամարտում պարտվելով, այլև պարբերաբար տեղապտույտի մեջ գտնվելով, դրանով իսկ մոտենալով կորստյան սահմանագծին: Շուշիի հաղթանակը, Երկրորդ համաշխարհային պատերազմում տարած հաղթանակը մեզ պարտավորեցնում և պարտադրում են ձգտել ու հասնել նոր հաղթանակների և ոչ միայն ռազմի դաշտում:

Պարտադրում և պարտավորեցնում են ոչ միայն մշտապես առաջ շարժվել, այլև դա անել միասին ու համերաշխ:
Մայիսյան հաղթանակների առթիվ առանձնահատուկ ուզում եմ շնորհավորել Երկրորդ աշխարհամարտի, Արցախյան ազատամարտի վետերաններին, այսօրվա խաղաղությունն ու անվտանգությունը ապահովող մեր զինվորներին և մաղթել նրանց առողջություն, լավատեսություն ու բարօրություն: Թող խաղաղությունն ու հաջողությունը միշտ ուղեկցեն մեր ժողովրդին ու երկրին»: