Ձեր վստահելի աղբյուրը

Սիրիայում ներկայումս ապրում են շուրջ 25 հազար հայեր, որոնց 30 տոկոսը երեխաներ են և արդեն տևական ժամանակ այդ երկրում շարունակվող պատերազմական դրությունն անգամ չի ստիպում նրանց տեղափոխվել Հայաստան: Հայաստանի վարչապետ Հովիկ Աբրահամյանը կառավարության վերջին մի քանի նիստերի ժամանակ հայտարարել է, թե մեր երկիրը պատրաստ է ընդունել հալեպահայերին և հատկապես, երեխաներին: Սակայն այս հայտարարությունները նրանց կողմից մնում են առանց որևէ գործնական արձագանքի:

«Սիրիայից արտագաղթելու որոշում այնտեղ ապրող հայերը իրենց ներկայացուցչության միջոցով չեն արտահայտել: Այսինքն, մենք որևէ գործողություն չենք կարող անել: Մենք ելնում ենք իրենց կայացրած որոշումից, որը արտահայտվում է այնտեղի հայկական համայնքի գործադիր և ներկայացուցչական մարմինների միջոցով: Իրենք ինչ որոշում կկայացնեն, մենք էլ կարձագանքենք դրան»,- Panorama.am-ի թղթակցի հետ զրույցում ասաց ՀՀ Սփյուռքի նախարարության աշխատակազմի ղեկավար, սիրիահայերի հարցերով հանձնաժողովի նախագահ Ֆիրդուս Զաքարյանը:

Նրա խոսքով, ոչ պաշտոնապես իրենց ասել են, թե ցանկություն ունեն դպրոցներում դասերն ավարտվելուց հետո երեխաներին տեղափոխել Հայաստան, բայց որոշում, որպես այդպիսին, չկա:

Հարցին, թե գուցե կառավարությունը նրանց համար բավարար կենցաղային պայմաններ չի՞ ապահովում, որ Հալեպում հայկական համայնքի ներկայացուցչությունը ցանկություն չի հայտնում հալեպահայերին տեղափոխել Հայաստան, Զաքարյանը պատասխանեց. «Չէ, նման խնդիր չկա: Մենք նրանց սիրով ընդունել, պահել ենք: Երկու շաբաթով էին եկել, բայց պատրաստ էին երկար մնալ: Կային ընտանիքներ, որ ցանկություն էին հայտնել երեխաներին պահել ավելի երկար ժամանակ, բայց ծնողները իրենք չեն համաձայնել: Ես չեմ կարող նրանց փոխարեն որևէ բան ասել»:

Արաբագետ Սարգիս Գրիգորյանի կարծիքով, հայերը չեն լքում Հալեպը, քանի որ այնտեղ համայնքի պահպանմանն ուղղված խնդիր են լուծում:

«Հիմա Հալեպից տեղաշարժը որոշակի վտանգներ է պարունակում իր մեջ: Կան մարդիկ իհարկե, որ կցանկանան դուրս գալ, բայց հնարավորություն չունեն, կան մարդիկ, ովքեր ուղղակի լսում են համայնքի աշխարհիկ և հոգևոր ղեկավարներին: Այնտեղ հայերի հիմնական մասը Անթիլիասին են պատկանում, իսկ Արամ Ա-ի խոսքը բավական ազդեցիկ է նրանց շրջանում: Կան մարդիկ ովքեր լսում են հոգևոր ղեկավարությանը: Ընդհանուր առմամբ, վիճակը շատ վատ է, իսկ իսլամականների ակտիվությունն էլ հավելյալ վատթարացնում է իրավիճակը», -մեզ հետ զրույցում ասաց արաբագետը` նկատելով, որ Հալեպն այժմ շրջափակման մեջ է` զրկված էլեկտրականությունից:

Նրա խոսքով, Հայաստանի կառավարության ձեռնարկած քայլերը համարժեք են իրավիճակին: «Ես կարծում եմ, որ այն ինչ անում է մեր կառավարությունը, մեր հնարավորությունների սահմաններում է: Էլ ի՞նչ անենք», -նկատեց արաբագետը:
Գրիգորյանը զարմանալի է համարում սիրիահայերի անվտանգության հարցում հասարակական սեկտորի պասիվությունը: Նրա խոսքով, պետք էր ցույցեր կազմակերպել միջազգային կառույցների առաջ և ցավ հայտնել, որ քրիստոնյաների նկատմամբ Սիրիայում իսլամականները բռնություն են գործադրում:

Հարակից հրապարակումներ`
Սիրիահայի մտորումներ. Ինչպես դուրս գալ Հալեպից
Սիրիահայ երեխաներին Հայաստան տեղափոխելու որոշում հայ համայնքում դեռ չի կայացվել. Ֆիրդուս Զաքարյան
Հալեպի ազգային իշխանությունները դեռ չեն որոշել սիրիահայ երեխաներին Հայաստան ուղարկել