Ձեր վստահելի աղբյուրը

«Նախ այդպես էլ մեզ համար անհայտ մնաց, թե ինչու Տրանշ 1-ում ճանապարհի երկարությունը 56 կմ էր, իսկ հետո դարձել է 31 կմ: Սա ֆինանսական միջոցների հետ կապ չունի և ձեր ասած վճարները դրա հետ բացարձակ կապ չունեն»,- այսօր Ազգային ժողովում «Հյուսիս-Հարավ» ավտոճանապարհի շինարարության համար հերթական վարկային ծրագրի քննարկման ժամանակ ՀԱԿ խմբակցության քարտուղար Արամ Մանուկյանը:

Նա նշեց, որ ըստ առաջին տրանշի գումարը կազմել է շուրջ 500 մլն դոլար, իսկ ողջ ծրագիրը՝ 962 միլիոն դոլար, և ըստ առաջին պայմանագրի՝ առաջին տրանշի ավարտական աշխատանքները պետք է ավարտվեին 2014 թ-ի հունիսի 30-ին:

«Այսինքն՝ մենք 2014-ի ամռանը պետք է ավարտած լինեինք Երևան -Աշտարակ, Երևան-Արտաշատ ճանապարհը, և պարզ է, որ անգամ առաջին տրանշի պարտավորությունը կատարված չէ, և սա է հիմնական պատճառը, որ ծրագիրը երկարում է, ծրագրի արդյունավետությունը ցածր է»,-ասաց Ա.Մանուկյանը:

Այսպիսով, ըստ պատգամավորի, աշխատանքներն ամբողջությամբ պետք է ավարտված լինեին 2017 թվականին և հիմա արձանագրում են, որ բիզնես նախագծում սխալ են հաշվարկվել ժամկետները և 2019թ-ին այն չեն ավարտի: Բացի այդ, պատգամավորը գտնում է, որ խախտել են ֆինանսական հաշվարկները:

«Խնդրում եմ պատասխանեք՝ նախնական հաշվարկներով ճի՞շտ է արդյոք, որ դեռևս 1,5 միլիոն դոլար է պետք ծրագիրն ավարտելու համար և ինչքանով է այս վարկային ծրագիրը ավելացնելու մեր արտաքին պարտքը»,- հարցրեց նա՝ դիմելով հիմնական զեկուցող, ՀՀ կապի ու տրանսպորտի փոխնախարար Արթուր Առաքելյանին։

Պատգամավորը նաև հետաքրքրվեց, թե ովքեր են պատժվել այս ծրագրի համար, երբ հայտարարվում է, որ «Հյուսիս-Հարավ» ծրագրի 13 կետով արձանագրվել են խախտումներ:

«Միայն ծրագրերի իրականացման տնօրենն է ազատվել աշխատանքից: Փաստորեն ամենամեծ պատիժը եղել է այն, որ ծրագրերի տնօրենն ազատվել է աշխատանքից: Այ քեզի բան, էսպե՞ս էք պատժում փողերը մսխողին»,- ասաց նա՝ հավելելով, որ կարծես թե պլան դրված լինի Երևան-Աշտարակ ավտոճանապարհը հանձնելու, սակայն 2009-ից վեց տարի է անցել, բայց 30 կմ-ը չի ավարտվել։ «Փա՞ստ է, թե՞ չէ, 500 կմ-ից 30 կմ-ն դեռևս ավատված չէ, ձեզ էլ ո՞վ փող կտա, ինչի՞ պիտի տան, ես լինեմ՝ չեմ տա... Էս վարկի արդյունավետությունը խիստ ցածր է»,-եզրափակեց նա:

Փոխնախարար Արթուր Առաքելյանը նշեց, որ ծրագրի իրականացման համար մինչ օրս որևէ խնդիր չեն ունեցել:

Հավելենք, որ փոխնախարարը այդպես էլ չանդրադարձավ Ա.Մանուկյանի կողմից բարձրացված հարցին, թե քանի՞ մարդ է պատժվել Հյուսիս-հարավ ավտոճանապարհի շինարարական աշխատանքներում` Վերահսկիչ պալատի հայտնաբերած խախտումների արդյունքում:

Նախորդող հրապարակումներ՝

«Բարդ» մաթեմատիկան ու իրար չհամապատասխանող տրանշներն ու տեղեկանքները ԱԺ-ում
Մենք ձեռնամուխ ենք լինելու Հայաստան-Իրան երկաթգծի կառուցման ծրագրի իրագործմանը. Արթուր Առաքելյան
150 մլն դոլարի վարկ` «Հյուսիս-հարավ» ավտոճանապարհային միջանցքի համար