Ձեր վստահելի աղբյուրը

«Ես ուսումնասիրում եմ այս պայմանագիրը, ինչպես նաև տրանպորտի և կապի նախարարության ներկայացրած տեղեկանքը, սակայն դրանք չեն համապատասխանում իրար»,- այս մասին այսօր Ազգային ժողովում ասաց ՀՀԿ-ական պատգամավոր Հակոբ Հակոբյանը՝ Հայաստանի Հանրապետության և Եվրասիական զարգացման բանկի միջև 2015 թվականի ապրիլի 14-ին ստորագրված «Հյուսիս-հարավ» ավտոճանապարհային միջանցքի շինարարության նախագծի ֆինանսավորման համար Եվրասիական տնտեսական ընկերակցության հակաճգնաժամային հիմնադրամի միջոցներից ներդրումային վարկի տրամադրման մասին» համաձայնագրի քննարկման ժամանակ:

Ըստ պատգամավորի՝ տեղեկանքում ներկայացված է, որ առաջին տրանշը 31 կիլոմետր է և արժեքը 70,4 միլիոն ԱՄՆ դոլար, բայց համաձայնագրով հաստատված տրանշը 56 կլիոմետր է, 4 շերտանի ճանապարհի համար:

«Մեր պայմանագիրը և ձեր տրանշները չեն համապատասխանում իրար»,- ասաց Հ.Հակոբյանը՝ դիմել համաձայնագիրը ներկայացնող ՀՀ տրանսպորտի և կապի փոխնախարար Արթուր Առաքելյանին:

Պատգամավորը համեմատեց 2013-ի նոյեմբերի 7-ի համաձայնագրի հետ, որտեղ Թալին-Լանջիկ ճանապարհի 17 կմ-ը կառուցվել է 100 մլն դոլարով, այն դեպքում, երբ Արտաշատ-Քաջարանը 304 կմ-ն են կառուցել 100 մլն-ով. «Անհամատեղելի են 17 և 304 կմ-ը 100 մլն դոլարով կառուցելը: Հիմա էլ այս պայմանագրով 20.5 կմ ճանապարհն եք նախատեսել կառուցել 150 մլն դոլարով: Ուզում եմ բացատրեք՝ էդ 20.5 կմ-ը էդ ի՞նչ ինժեներական կառույց է, որ արժի 150 մլն դոլար, իսկ 304 կմ ճանապարհը ինչ ճանապարհ էր, որ արժեր 100 մլն դոլար»:

Փոխնախարարն անդրադառնալով պատգամավորի մտահոգություններին, նկատեց, որ «Տրանշ 1»-ը արտոնյալ վարկային համաձայնագիր է եղել, որի ներքո նախատեսված չի եղել այդ պարտավճարը:

«Ցանկացած վարկ ներգրավվելու նախապատրաստական աշխատանքների ժամանակ բանկը ամրագրում է որոշակի գումարներ` նշված ծրագրի իրականացման համար և այդ ժամանակ որոշակի չափի գումար նախատեսվում է վճարել, դա կոչվում է պարտավճար, այսինքն` դա ամրագրում է բանկի ռիսկերը: Այստեղ ես առաջարկում եմ մեղավորներ չփնտրել, քանի որ սա ստանդարտ բանկային գործիք է, որը կոչվում է պարտավճար»,- պարզաբանեց Ա.Առաքելյանը:

Ըստ նրա՝ ցանկացած ոչ արտոնյալ պայմաններով վարկային ծրագրում այդ դրույթը նշված է:

Ինչ վերաբերում է տեղականքներին չհամապատասխանելուն, փոխնախարարը նշեց. «Մեր կողմից տրված պայմանագրերը և տեղեկանքները մեկը մյուսին բռնում են, և մենք պատրաստվում ենք 31 կիլոմետրանոց ճանապարհ կառուցել: Հավանաբար, Դուք Երևանի հատվածը շրջանցող տարածքն եք համարում բացակայող հատված: Այս ճանապարհը ենթադրում է հետևյալը` Արտաշատից մինչև Նորագավիթ և Պաշտպանության նախկին նախարարության շենքից մինչև Աշտարակի կամուրջ, այդ հատվածը 31 կիլոմետր է և արժի 70,4 միլիոն դոլար»:

Անդրադառնալով գումարին, Ա.Առաքելյանն ասաց, որ պատգամավորի հարցը դիպուկ էր, թե ինչպե՞ս կարող է այս ճանապարհի 1 կմ-ի կառուցումը արժենա, օրինակ, 2 մլն դոլար, այլ հատվածում՝ 3-4 կամ ավելի: «Քանի որ Տրանշ-1-ի հատվածում ջրագիծը մեկին մեկ կրկնում էր առկա ճանապարհի 4 երթևեկելի գոտիներով առկա ճանապարհը, ապա այնտեղ կատարվող ծախսերը համապատասխանաբար նվազ են»,- ասաց նա և հավելեց, որ թեև մասնագետ չէ, բայց կարող է բացատրել, որ հողային աշխատանքների ժամանակ տնտեսումների են գնացել, ինչպես նաև հիմքերի նախապատրաստման համար քիչ միջոցներ են ծախսել:

Նա ասաց, որ մի դեպքում 1 երթևեկելի գոտի ունեցող ճանապարհի մասին է խոսքը, մյուս դեպքում՝ 4 երթևեկելի գոտի ունեցող. «Ինչ վերաբերում է այս պայմանագրով 20 կմ հատվածին, որի համար կծախսվի 150 մլն դոլար, սա մեր բարդ լեռնային գոտին է»,- նկատեց Ա.Առաքելյանը:

Այդուհանդերձ Հակոբ Հակոբյանն ասաց, որ ինքը չի ենթադրում, այլ կարդում է այն, ինչ գրված է վարկային համաձայնագրում և Կառավարության ներկայացրած տեղեկանքում: «Դրանք չեն համապատասխանում իրար: Եթե դուք մասնագետ չեք, ես մասնագետ եմ: Ցանկացած դեպքում չեմ կարողանում հասկանալ, որ 18 կմ Թալին-Լանջիկ ճանապարհը պետք է արժենա 100 մլն դոլար, և 304 կմ Արտաշատ-Քաջարան ճանապարհը էլի պետք է լինի 100 մլն դոլար: Ես Արտաշատ-Քաջարան ճանապարհին շատ լավ ծանոթ եմ, ոտքով անցել եմ ամբողջ տրասան»,- նշեց պատգամավորը:

Ա.Առաքելյանն էլ Հ.Հակոբյանին հրավիրեց մասնակցելու ճանապարհի նախագծման աշխատանքներին:

Նախորդող հրապարակումներ՝
Մենք ձեռնամուխ ենք լինելու Հայաստան-Իրան երկաթգծի կառուցման ծրագրի իրագործմանը. Արթուր Առաքելյան
150 մլն դոլարի վարկ` «Հյուսիս-հարավ» ավտոճանապարհային միջանցքի համար