Ձեր վստահելի աղբյուրը

«Բաղրամյան պողոտայում ցույցը ցրելու կադրերը տեսնելիս, ինձ մոտ տպավորություն էր, թե Թբիլիսիից հետո Երևանի կենդանաբանական այգուց էին գազանները փախել ու սկսել էին քաղաքում իրականացնել իրենց գազանությունները», -այսօր «Մեդիա կենտրոնում» լրագրողների հետ հանդիպման ժամանակ հայտարարեց Խոսքի ազատության պաշտպանության կոմիտեի նախագահ Աշոտ Մելիքյանը:

Նրա խոսքով, ստեղծված իրավիճակը պետք է իշխանական վերնախավի համար մտածելու տեղիք տա, այլ ոչ թե «որոշ ՀՀԿ-ականների նման ուրախանա ու հրճվի, որ արթնացել է անարյուն Երևանում»:

«Եթե այսպես շարունակվի, ինքը մի օր էլ կարթնանա դատարկ Երևանում: Այսպես չի կարելի: Կարծում եմ, որ այս տիպի գործողություններն են, որ ստիպում են մարդկանց լքել Հայաստանը», -հայտարարեց Մելիքյանը` ակնարկելով Հանրապետական կուսակցության փոխնախագահ Արմեն Աշոտյանին:

Հիշեցնենք` հունիսի 23-ին Աշոտյանը, խոսելով հավաքը ոստիկանության կողմից ցրելու գործողության մասին, ասել էր. «Այնուհանդերձ պետք է ասեմ, որ առավոտյան հետևելով լրահոսին ես սփոփվեցի, որ արյուն չկար և մենք արթնացանք ոչ արյունոտ Հայաստանում»:

Մելիքյանը նկատեց, որ լրագրողների նկատմամբ կիրառված գործողությունների առումով հունիսի 23-ը «աննախադեպ» էր. «13 լրագրող և օպերատոր այդ օրը բռնության են ենթարկվել, ԶԼՄ-ների 15 ներկայացուցիչների լրագրողական մասնագիտական աշխատանքը խոչընդոտվել է: Բերման ենթարկված լրագրողները որևէ խախտում չեն արել, որ կանչվել են հարցաքննվելու»:

Նշենք, որ հունիսի 23-ին հայտարարվեց, որ լրագրողների հետ առնչվող գործողությունների կապակցությամբ ոստիկանությունում ծառայողական քննություն է նշանակվել, իսկ ոստիկանապետ Վլադիմիր Գասպարյանը ներողություն էր խնդրել ու խոստացել, որ լրագրողների կրած վնասը կփոխհատուցեն: 

Հարակից հրապարակումներ`
Հովհաննես Իշխանյանին ապօրինի տարել են նարկոդիսպանսեր. Փաստաբան
Լրագրողներին բռնության ենթարկել են Երևանի ոստիկանապետի աչքի առաջ. հայտարարություն