Ռիմա Դեմիրճյան. Խաղատուն կառուցելու դեպքում համալիրը կվերածվի հայկական Լաս Վեգասի
«Կարեն Դեմիրճյանի անվան մարզահամերգային համալիր»-ի տարածքում խաղատան կառուցման դեպքում այն կվերածվի յուրատեսակ հայկական Լաս Վեգասի՝ էլ ի՞նչ համալիր, ի՞նչ մշակութային, սպորտային միջոցառումներ, ամեն ինչ կմոռացվի: Panorama.am-ի հետ զրույցում նման կարծիք հայտնեց Կարեն Դեմիրճյանի այրին՝ Ռիմա Դեմիրճյանը:
Հիշեցնենք, որ ՀՀ կառավարության որոշմամբ «Կարեն Դեմիրճյանի անվան մարզահամերգային համալիր» պետական ոչ առևտրային կազմակերպությունը վաճառքի ձևով օտարվել է ՆՏԱԱ ԻՆՎԵՍՏՄԵՆՏ ԳՐՈՒՊ ՍՊԸ–ին: Ըստ ծրագրի, նախատեսվում է վերանորոգել համալիրի շենքը, իրականացնել կառուցապատում և ստեղծել ընտանեկան ուղղվածության համալիր կենտրոն, որը ներառելու է հյուրանոցներ, փակ ջրաշխարհ, համերգային դահլիճներ, հանդիպումների սրահներ, ռեստորաններ, խանութներ և խաղատուն:
Ռ. Դեմիճյանն ասաց, որ ինքը մշտապես կողմնակից է եղել համալիրն ընդհանրապես չվաճառելուն` մնա պետության հսկողության, տնօրինության տակ. «Շատ ունիկալ կառույց է: Միշտ էլ ասել եմ՝ ծախելն անհեթեթություն է, սեփականատերը միշտ կաշխատի ցանկացած գնով շահույթ ստանալ»:
Նա հիշեցրեց, որ համալիրը նախատեսված էր ամբողջ խորհրդային միության, միջազգային միջոցառումների համար. «Իրավիճակը փոխվեց: Պահելը դժվար է, բայց անհնար չի: Պետք էր հեղինակավոր, պատասխանատու մարդկանցից կազմված խորհուրդ ստեղծվեր, որը լիներ հսկողության տակ, ոչ թե վաճառվեր: Խորհրդին կից ստեղծվեր ֆոնդ: Աշխարհով մեկ սփռված ինչքան հայեր կան, 100 հոգի մեծահարուստ չի՞ լինի որպեսզի ոչ թե մեկը հարյուր հազար ներդնի, այլ ամեն մեկը 10-15 հազար ներդնեն, հավաքեն ու ոտքի կանգնեցնեն: Համոզված եմ՝ եթե ոտքի կանգնեցնեն, հետագայում շահույթ կտա այդ կառույցը, հնարավորությունները շատ են»:
Տիկին Ռիմայի կարծիքով, պետք էր ամեն ինչ ճիշտ կազմակերպել, իսկ այժմ ինչ է կատարվում, ոչ ոք չի իմանում. պարզ չէ թե ինչ ընկերություն է, ինչ ծրագիր է. «Եթե, իրոք, պետք է կազինո կառուցեն, կազինոյով պահեն համալիրը, անհեթեթություն է: Կազինոյով հին սեփականատերն էլ կպահեր: Կտրականապես դեմ եմ կազինոյին: Ինչ վերաբերում է մնացածին, պետք է մանրամասն ծանոթանալ ծրագրին: Գուցե խելքը գլխին բաներ կան: Պետք է ամեն ինչ պարզ ու հստակ լինի, ծրագիրը տպագրեն:
Ուզում եմ ըմռնումով մոտենալ, որ պահելու հարց կա: Դժվար է, բայց համալիրի հնարավորությունները շատ են, կարող են տարածքները օգտագործել, բայց ոչ կազիոնայի համար: Կազինոն քաղաքի շրջակայքից հանեցին, տարան հեռու: Ինչ է՝ հիմա ամենահարմար տեղը գտան համալի՞րը կամ շրջակա՞յքը: Սա անհնար բան է: Այն կվերածվի ինչ-որ յուրատեսակ հայկական Լաս Վեգասի»:
Ռիմա Դեմիրճյանն ասաց, որ չի պատրաստվում այս հարցով որևէ պատկան մարմնի դիմել, քանի որ իմաստ չի տեսնում. «Ինչ որ կարծում ենք ես ու Ստեփանը (Ստեփան Դեմիրճյան), կասենք, բայց թե ինչ կանեն, չգիտենք, որքան կլսեն ձայնը, չգիտեմ»:
Տեղեկանք.
Համալիրի սպորտային մասի բացումը տեղի է ունեցել 1983 թվականին, համերգային մասի բացումը՝ 1984 թվականին:
2005-ի սեպտեմբերին պետության սեփականություն մարզահամերգային համալիրը կառավարության որոշմամբ 5 միլիոն 700 հազար դոլարով վաճառվել էր Ռուսաստանում հայտնի գործարար Մուրադյան եղբայրներին, որոնց պատկանում է «ԲԱՄՕ» ընկերությունների խումբը: Պաշտոնապես վերաբացվել էր այն 2008թ-ին, կառույցի համար ներդրվել էր 42 մլն դոլար: 2014 թվականի մայիսի 19-ին Կարեն Դեմիրճյանի անվան մարզահամերգային համալիրը հանվել էր աճուրդի (http://www.panorama.am/am/society/2014/08/30/d-harutyunyan/): Մեկնարկային գինն էր 19 350 000 000.0 դրամ
Վերջին աճուրդի ժամանակ արդեն գինը սահմանել էր 10 միլիարդ 283 միլիոն 383 հազար 350 դրամ: Գնորդ այդպես էլ չի հայտնվել: 2014 թ. օգոստոսի 21-ի կառավարության որոշմամբ Երևանի Կարեն Դեմիրճյանի անվան մարզահամերգային համալիրը պարտքի դիմաց հանձնվել էր պաշտպանության նախարարության հաշվեկշռին: Մարզահամերգային համալիրի պարտքը պետությանը կազմում է շուրջ 10 միլիարդ 400 միլիոն դրամ: Ներկայումս ՄՀՀ ՓԲԸ-ի հետ կապված Կենտրոն և Նորք Մարաշ ընդհանուր իրավասության դատարանում մեկ տարուց ավել քննվում է կառավարության և ԴԱՀԿ միջև կնքված գույքը հանձնելու վերաբերյալ պայմանագրի վիճարկումը: Ընկերության սնանկության գործընթացը ևս ավարտված չէ, սակայն 2015 թ. օգտոստոսի 13-ի ՀՀ կառավարության որոշմամբ Մարզահամերգային համալիրը 30 միլիոն դոլարով վաճառվել է «ՆՏԱԱ ԻՆՎԵՍՏՄԵՆՏ ԳՐՈՒՊ» սահմանափակ պատասխանատվությամբ ընկերությանը:
Նախորդող հրապարակումներ՝
Եթե նախագիծ ներկայացնեն, գուցե ավելի հանգիստ լինենք. Մկրտիչ Մինասյանը` Համալիրի մասին
Անահիտ Բախշյան. Համալիրի վաճառքի գործարքի տակ շատ մեծ շահ կա
Համալիրը վաճառելուց առաջ որևէ մեկը Ցեղասպանության ինստիտուտ-թանգարանի տնօրենի կարծիքը չի հարցրել
Մարզահամերգային համալիրը վաճառվեց
Մարզահամերգային համալիրի վաճառքի շուրջ հարցերն ու մտահոգություններն ավելանում են
Նորից կվերածեն ինչ-որ անճոռնի մի կառույցի. Կորյուն Գրիգորյանը ՄՀՀ-ի մասին
Լրահոս
Տեսանյութեր
Վ.Հակոբյան. Ռուսաստանի հետախուզությունն ասում է՝ գիտենք, ինչ փողեր են գալիս, ում գրպաններն են մտնում
